పాత సిమ్ కార్డ్స్ నుంచి రూ.22 లక్షల విలువ చేసే బంగారం.. ఎలా సాధ్యమంటే?

బంగారం ధరలు ఆకాశాన్ని తాకుతున్న వేళ, పాత సిమ్ కార్డుల నుంచి ఒక వ్యక్తి ఏకంగా కేజీల్లో బంగారం తీశాడనే వార్త ఇప్పుడు నెట్టింట హల్‌చల్ చేస్తోంది. చైనాకు చెందిన క్వియావో అనే వ్యక్తి చేసిన ఈ సాహసం చూసి అందరూ నోరెళ్లబెడుతున్నారు. మనం పనికిరావని పారేసే పాత ఎలక్ట్రానిక్ వస్తువుల్లో ఇంత సంపద దాగి ఉందా అని నెటిజన్లు ఆశ్చర్యపోతున్నారు. అయితే ఈ బంగారు ప్రయోగం వెనుక ఉన్న అసలు కష్టం, ఆసక్తికరమైన విషయాలు ఇప్పుడు తెలుసుకుందాం ..

4 లక్షల సిమ్ కార్డులు.. 200 గ్రాముల బంగారం:

చైనాలోని గ్వాంగ్‌డాంగ్‌ ప్రాంతానికి చెందిన క్వియావో, పాత ఎలక్ట్రానిక్ వ్యర్థాల నుంచి విలువైన లోహాలను వేరు చేయడంలో నిపుణుడు. తాజాగా అతను సుమారు 4 లక్షల పాత సిమ్ కార్డులు, ఇతర టెలికాం చిప్స్‌ను సేకరించి, వాటి నుంచి దాదాపు 191 నుంచి 200 గ్రాముల స్వచ్ఛమైన బంగారాన్ని వెలికితీశాడు. ప్రస్తుత మార్కెట్ ధర ప్రకారం దీని విలువ సుమారు రూ. 26 నుంచి 27 లక్షల వరకు ఉంటుంది. ఒక సిమ్ కార్డులో కేవలం 0.001 మిల్లీగ్రాముల బంగారం మాత్రమే ఉంటుందని, ఇంత మొత్తంలో సేకరించడానికి దాదాపు 2 టన్నుల ఈ-వ్యర్థాలను ప్రాసెస్ చేయాల్సి వచ్చిందని అతను వివరించాడు.

'ఆల్కెమిస్ట్' క్వియావో.. రసాయనాలతో చేసిన మ్యాజిక్:

ఈ బంగారాన్ని వేరు చేయడం అంటే ఏదో మ్యాజిక్ చేసినట్లు కాదు, దీని వెనుక అత్యంత ప్రమాదకరమైన రసాయన ప్రక్రియ ఉంది. క్వియావో ఈ సిమ్ కార్డులను శక్తివంతమైన రసాయనాలతో నిండిన డ్రమ్ముల్లో ఉంచి, వాటిని వేడి చేయడం, వడపోయడం వంటి సంక్లిష్టమైన పద్ధతుల ద్వారా బంగారు రేణువులను వేరు చేశాడు. ఈ ప్రక్రియలో వెలువడే వాయువులు ఆరోగ్యానికి చాలా హానికరం. క్వియావో తన వీడియోలో ఈ పద్ధతిని వివరంగా చూపించడంతో, నెటిజన్లు అతన్ని ఆధునిక 'ఆల్కెమిస్ట్' అంటే లోహాలను మార్చే విద్య తెలిసినవాడు అని పిలుస్తున్నారు.

మీ ఇంట్లో ఉన్న ఈ-గోల్డ్ గనులు:

సిమ్ కార్డులు మాత్రమే కాదు, మన ఇంట్లో మూలన పడేసిన పాత కంప్యూటర్లు, ల్యాప్‌టాప్‌లు అసలైన బంగారు నిక్షేపాలు. వీటిలోని మదర్‌బోర్డులు, సీపీయూ (CPU) లలో విద్యుత్ ప్రసరణ వేగంగా జరగడం కోసం స్వచ్ఛమైన బంగారాన్ని పూతలా వాడుతుంటారు. ఒక్కో పాత సీపీయూ నుంచి సుమారు 0.2 నుంచి 0.5 గ్రాముల వరకు బంగారం లభిస్తుందట. అలాగే పాత స్మార్ట్‌ఫోన్ల సర్క్యూట్ బోర్డులు, ర్యామ్ (RAM) స్టిక్స్, వీడియో గేమింగ్ కన్సోల్స్, మరియు పాత మోడల్ టెలివిజన్ల లోపల కూడా చిన్న మొత్తంలో బంగారం, వెండి, పల్లాడియం వంటి విలువైన లోహాలు ఉంటాయి. అందుకే ఇప్పుడు ప్రపంచవ్యాప్తంగా అర్బన్ మైనింగ్ పేరుతో ఈ-వ్యర్థాల నుంచి బంగారాన్ని వెలికితీసే బిజినెస్ జోరుగా సాగుతోంది.

క్వియావో వీడియో చూసి చాలామంది తమ దగ్గరున్న పాత సిమ్ కార్డులతో ప్రయోగాలు చేయాలని అనుకుంటున్నారు. కానీ, ఇది అత్యంత ప్రమాదకరమైన పని. ఈ ప్రక్రియలో వాడే ఆక్వా రెజియా వంటి రసాయనాలు చర్మాన్ని కాల్చేయడమే కాకుండా, ప్రాణాంతకమైన గ్యాస్‌ను విడుదల చేస్తాయి. పైగా, ప్రభుత్వం నుంచి సరైన లైసెన్స్ లేకుండా ఈ-వ్యర్థాలను ప్రాసెస్ చేయడం చట్టరీత్యా నేరం. అందుకే, చెత్త నుంచి సంపదను సృష్టించిన క్వియావో తెలివిని మెచ్చుకోవచ్చు కానీ, దాన్ని ఇంటి దగ్గర ప్రయత్నించడం మాత్రం అస్సలు క్షేమకరం కాదు.