భారత్ గేట్లు ఓపెన్.. పాక్ పరిస్థితి కొట్టుకుపోవడమే..
వర్షం ఎంత గట్టిగా పడిందంటే... సలాల్, దుల్హస్తి, బగ్లిహార్ ప్రాజెక్టులు చూస్తుండగానే ‘హౌస్ఫుల్’ బోర్డులు తగిలించుకున్నాయి.
By: A.N.Kumar | 22 July 2026 5:28 PM IST
జమ్మూ కాశ్మీర్లో వాన దేవుడు కరుణించడం కాదు... ఏకంగా విరుచుకుపడ్డాడు. ఎడతెరిపి లేని వర్షాలు, కొండచరియలు, ఫ్లాష్ ఫ్లడ్స్తో అటు అమర్నాథ్ యాత్రికులు, ఇటు వైష్ణోదేవి భక్తులు బేస్ క్యాంపులకే పరిమితమయ్యారు. వర్షం ఎంత గట్టిగా పడిందంటే... సలాల్, దుల్హస్తి, బగ్లిహార్ ప్రాజెక్టులు చూస్తుండగానే ‘హౌస్ఫుల్’ బోర్డులు తగిలించుకున్నాయి.
ఇక డ్యామ్ గేట్లు ఎత్తకపోతే నీళ్లు ఆనకట్టల పైనుంచి కాకుండా... అధికారుల ఆఫీసుల మీదుగా ప్రవహించేలా ఉన్నాయి. దాంతో వేరే దారి లేక అధికారులు గటగటా గేట్లన్నీ పైకెత్తేశారు. చీనాబ్ నది ఉప్పొంగిపోతోంది, తీర ప్రాంత ప్రజలకి హెచ్చరికలు జారీ అయ్యాయి.
ఉగ్రవాదానికి నో.. కానీ నీళ్లకు యస్?
ఇక్కడే ఉందండీ అసలు ట్విస్ట్.. ఉగ్రవాదాన్ని పెంచి పోషిస్తున్న పొరుగు దేశానికి "ఒక్క చుక్క నీరు కూడా ఇచ్చేదే లేదు, సింధు ఒప్పందాన్ని హోల్డ్లో పెడుతున్నాం" అని భారత్ గట్టిగానే చెప్పింది. కానీ ప్రకృతి దేవుడు మాత్రం.. "మీ రాజకీయం మీదే.. నా నీళ్లు నావే" అంటూ వర్షాన్ని కుమ్మేశాడు.
డ్యామ్లు పగిలిపోయే ప్రమాదం రావడంతో... భారత్ వద్దన్నా సరే ఆ అదనపు నీళ్లన్నీ సరదాగా పరుగులెడుతూ సరిహద్దు దాటి పాకిస్తాన్లోకి దూసుకెళ్తున్నాయి. ఒకప్పుడు చుక్క నీటి కోసం అంగలార్చే పొరుగు దేశానికి ఇప్పుడు ఒక్కసారిగా ఊహించని ‘వాటర్ రైడ్’ అనుభవం ఎదురవుతోంది. "అబ్బే! ఇదేదో ప్రేమతో ఉచితంగా పంపించిన నీళ్లు కాదండోయ్.. కేవలం మా డ్యామ్ల భద్రత కోసం ఎత్తిన గేట్లు అంతే!" అని భారత అధికారులు గొంతు చించుకుని మరీ చెప్తున్నారు.
పాకిస్తాన్ పరిస్థితి.. "సంతోషించాలా? భయపడాలా?"
1960 నాటి సింధు జలాల ఒప్పందం ప్రకారం చీనాబ్ నీళ్లు పాకిస్తాన్కు చాలా ముఖ్యం. కానీ ఇప్పుడు వస్తున్నది సాగునీరు కాదు... ఏకంగా ముంచెత్తే వరద నీరు.. "నీళ్లు వస్తున్నాయి కదా అని ఆనందించాలా? లేక ఈ ఫ్లాష్ ఫ్లడ్స్కి కొట్టుకుపోతామని భయపడాలా?" అని పాక్ అధికారులు తీవ్ర ఆలోచనలో పడిపోయారట.
మొత్తానికి జమ్మూ కాశ్మీర్లో కురుస్తున్న వర్షాలు మన భక్తులకు, ప్రజలకు కష్టాలు తెచ్చిపెడితే... వద్దనుకున్న పాకిస్తాన్కు మాత్రం వరద నీటిని ఫ్రీగా గిఫ్ట్గా పంపించేశాయి.