గ్లోబల్‌ వర్క్‌ఫోర్స్‌: అంతర్జాతీయ ఆర్థిక వ్యవస్థకు భారత్‌ కీలకం

ప్రపంచ ఆర్థిక వ్యవస్థ ముందున్న అతిపెద్ద సవాళ్లలో గ్లోబల్‌ వర్క్‌ఫోర్స్‌ కొరత ఒకటని, ఈ సమస్య పరిష్కారంలో భారత్ కీలకపాత్ర పోషించగలదని విదేశాంగ మంత్రి ఎస్‌. జైశంకర్‌ స్పష్టం చేశారు. పలు దేశాలలో నెలకొన్న జనాభా సమస్యలు, ముఖ్యంగా వృద్ధాప్య జనాభా పెరుగుదల కారణంగా ఏర్పడిన శ్రామిక శక్తి లోపం ప్రపంచ వాణిజ్యం, ఉత్పత్తి మరియు సరఫరా వ్యవస్థలకు ముప్పుగా పరిణమించిందని ఆయన హైలైట్ చేశారు.

జనాభా సమస్యలు, శ్రామికశక్తి లోపం

జైశంకర్‌ విశ్లేషణ ప్రకారం.. ముఖ్యంగా యూరోప్‌, జపాన్‌, కొంతవరకు ఉత్తర అమెరికా వంటి అభివృద్ధి చెందిన దేశాలు తీవ్రమైన డిమాండ్‌-సరఫరా అంతరాన్ని ఎదుర్కొంటున్నాయి. "చాలా దేశాల్లో డిమాండ్‌ ఉన్నప్పటికీ, జనాభా సమస్యల వల్ల శ్రామికశక్తి అందుబాటులో లేదు" అని ఆయన పేర్కొన్నారు. టెక్నాలజీ , సేవల రంగాల్లో పెరుగుతున్న డిమాండ్‌కు అనుగుణంగా స్థానిక శ్రామిక శక్తి లేకపోవడం అంతర్జాతీయ ఆర్థిక వ్యవస్థకు ప్రధాన ఆటంకంగా మారింది. దీనిని అధిగమించడానికి ట్యాలెంట్‌, స్కిల్‌డ్ లేబర్‌ కోసం అంతర్జాతీయ సరఫరా అనివార్యమని ఆయన తేల్చి చెప్పారు.

* భారత యువతకు పెరిగిన అంతర్జాతీయ అవకాశాలు

హెచ్‌-1బీ (H-1B) వీసాల ఫీజుల పెంపు వంటి చర్చలు జరుగుతున్న ప్రస్తుత తరుణంలో జైశంకర్‌ వ్యాఖ్యలు ప్రాధాన్యతను సంతరించుకున్నాయి. అమెరికా వంటి దేశాల్లో టెక్నికల్ శ్రామిక అవసరాలు అధికంగా ఉన్నప్పటికీ, స్థానిక జనాభా పరిమితులు అడ్డంకిగా మారాయి. ఈ పరిస్థితి భారత యువతకు, ముఖ్యంగా ఐటీ, ఇంజినీరింగ్ , ఇతర సాంకేతిక రంగాలలో నైపుణ్యం కలిగిన వారికి, అంతర్జాతీయ స్థాయిలో ఉద్యోగావకాశాలను విస్తృతం చేస్తుందని విదేశాంగ మంత్రి సంకేతాలిచ్చారు. జైశంకర్‌ ప్రకారం, గ్లోబల్‌ ఆర్థిక వ్యవస్థ ముందున్న అతిపెద్ద సవాలు అంతర్జాతీయ శ్రామిక శక్తిని సమర్థవంతంగా, సమకాలీనంగా సృష్టించడం. ఈ సవాలును భారత్ తన యువ జనాభా , విస్తృత సాంకేతిక నైపుణ్యంతో పరిష్కరించగలదు.

సరఫరా - ఉత్పత్తి చైన్‌లకు ముప్పు

గత మూడు, నాలుగు సంవత్సరాలలో గ్లోబల్‌ పంపిణీ వ్యవస్థలు అనేక సమస్యలు ఎదుర్కొన్నాయని జైశంకర్‌ గుర్తు చేశారు. శ్రామిక లోపం వంటి సవాళ్లను పరిష్కరించకపోతే, రాబోయే దశల్లో దేశాల ఆర్థిక వ్యవస్థలు, ఉత్పత్తి , సరఫరా చైన్‌లకు తీవ్ర నష్టాలు ఎదురయ్యే అవకాశం ఉందని ఆయన హెచ్చరించారు. మెరుగైన రోడ్లు, షిప్పింగ్ , డిజిటల్ వాణిజ్య సౌకర్యాల వల్ల అంతర్జాతీయంగా పని చేయగల శ్రామిక శక్తిని ఎక్కడ అవసరమైతే, అక్కడ వేగంగా తరలించడం సులభతరం అవుతుందని ఆయన అభిప్రాయపడ్డారు.

భారత్‌పై ప్రపంచ దృష్టి

విదేశాంగ మంత్రి వ్యాఖ్యలు భారత్ ప్రభుత్వం యొక్క విధానాన్ని ప్రతిబింబిస్తున్నాయి: ప్రపంచంలోని కార్మిక లోపాన్ని పూడ్చడంలో భారతీయుల నైపుణ్యాన్ని వినియోగించుకోవడంపై దృష్టి పెట్టాలి. అంతర్జాతీయ ఆర్థిక వ్యవస్థ, వాణిజ్యం , సరఫరా వ్యవస్థలను పునరుద్ధరించడానికి, గ్లోబల్‌ వర్క్‌ఫోర్స్‌ సరఫరాదారుగా భారత్ అత్యంత కీలకమైన అంశంగా నిలుస్తుందనడంలో సందేహం లేదు. అంతర్జాతీయ ఆర్థిక వ్యవస్థకు మనుగడకు అత్యంత అవసరమైన గ్లోబల్‌ వర్క్‌ఫోర్స్‌ అవసరాలపై భారత్‌ తన పాత్రను నొక్కి చెప్పడానికి జైశంకర్‌ చేసిన వ్యాఖ్యలు దోహదపడతాయి.