రేవంత్ సర్కార్‌పై 'హైడ్రా' కుట్ర! జగ్గారెడ్డి సంచలన ఆరోపణలు.. రాజకీయ బాణం వెనుక అసలు కథ ఏమిటి?

తెలంగాణ రాజకీయాల్లో మరోసారి పెను దుమారం రేగింది. కాంగ్రెస్‌ మాజీ ఎమ్మెల్యే, టీపీసీసీ వర్కింగ్‌ ప్రెసిడెంట్‌ తూర్పు జగ్గారెడ్డి చేసిన వ్యాఖ్యలు ఇప్పుడు రాష్ట్రవ్యాప్తంగా హాట్‌టాపిక్‌గా మారాయి. గ్రేటర్ హైదరాబాద్ మునిసిపల్ కార్పొరేషన్ (GHMC) పరిధిలో ప్రభుత్వ ఆస్తుల పరిరక్షణ, విపత్తు నిర్వహణ కోసం ముఖ్యమంత్రి రేవంత్ రెడ్డి సారథ్యంలో ఏర్పాటైన 'హైడ్రా' అధికారులు, బీఆర్‌ఎస్‌కు అనుకూలంగా పనిచేస్తూ కాంగ్రెస్ ప్రభుత్వాన్ని అప్రతిష్టపాలు చేసేందుకు కుట్రలు పన్నుతున్నారని ఆయన సంచలన ఆరోపణలు చేశారు.

*హైడ్రా చర్యల వెనుక రాజకీయ కుట్రనా?

జగ్గారెడ్డి ఆరోపణల ప్రధాన సారాంశం ప్రకారం, కొంతమంది హైడ్రా అధికారులు ఉద్దేశపూర్వకంగా అతిగా వ్యవహరిస్తూ, కాంగ్రెస్‌ ప్రభుత్వానికి చెడ్డపేరు తెచ్చేలా కూల్చివేతలు, దాడులు వంటి చర్యలకు పాల్పడుతున్నారు. "ప్రభుత్వానికి చెడ్డ పేరు తీసుకురావాలనే ఉద్దేశంతో కొంతమంది హైడ్రా అధికారులు అత్యుత్సాహంగా వ్యవహరిస్తున్నారు. వీరి చర్యలు బీఆర్‌ఎస్‌కు లాభం చేకూర్చేలా ఉన్నాయి," అని జగ్గారెడ్డి స్పష్టం చేశారు. హైడ్రా చర్యల వల్ల ప్రజల్లో ప్రభుత్వంపై వ్యతిరేకత పెంచే ప్రయత్నం జరుగుతోందని ఆయన అభిప్రాయపడ్డారు. కూల్చివేతలు, దాడులను బీఆర్‌ఎస్‌ సోషల్‌ మీడియాలో విస్తృతంగా ప్రచారం చేస్తూ, కాంగ్రెస్‌పై ప్రతికూల ప్రచారాన్ని (నెగెటివ్‌ క్యాంపెయిన్‌) నడుపుతోందని జగ్గారెడ్డి ఆరోపించారు.

* జూబ్లీహిల్స్ ఉపఎన్నికల నేపథ్యం

రాబోయే జూబ్లీహిల్స్‌ ఉపఎన్నికల నేపథ్యంలోనే ఈ కుట్ర జరుగుతోందని జగ్గారెడ్డి పేర్కొన్నారు. కాంగ్రెస్‌ అభ్యర్థి నవీన్‌ యాదవ్‌ను ఓడించేందుకు బీఆర్‌ఎస్‌ ఈ కుట్రకు పాల్పడుతోందని ఆయన విమర్శించారు. "హైడ్రా దాడులను బీఆర్‌ఎస్‌ ఎన్నికల ప్రణాళికలో భాగంగా ఉపయోగించుకుంటోంది. ఇప్పటి వరకు హైడ్రా గురించి మాట్లాడని కేటీఆర్‌ ఇప్పుడు ప్రతిరోజూ దాని పేరు ప్రస్తావించడం వెనుక పెద్ద కారణాలున్నాయి," అని జగ్గారెడ్డి ప్రశ్నించారు.

* హైడ్రా చీఫ్ దృష్టి సారించాలి

ఈ వ్యవహారంపై హైడ్రా చీఫ్ రంగనాథ్‌ను ఉద్దేశిస్తూ జగ్గారెడ్డి కీలక డిమాండ్‌ చేశారు. "కొంతమంది అధికారులు కాంగ్రెస్ ప్రభుత్వానికి చెడ్డపేరు తెస్తున్నారు. వీరి వ్యవహారంపై విచారణ జరిపి తగిన చర్యలు తీసుకోవాలి" అని ఆయన డిమాండ్‌ చేశారు.

* సీఎం రేవంత్‌ రెడ్డికి ఫిర్యాదు

ఈ అంశాన్ని త్వరలోనే ముఖ్యమంత్రి రేవంత్‌ రెడ్డి.. టీపీసీసీ అధ్యక్షుడు మహేశ్‌ గౌడ్‌ దృష్టికి తీసుకెళ్తానని జగ్గారెడ్డి స్పష్టం చేశారు. "బీఆర్‌ఎస్‌కు మద్దతుగా పనిచేస్తున్న అధికారుల కుట్రలకు అడ్డుకట్ట వేయాలి" అని అన్నారు. హైడ్రా చర్యల వల్ల నష్టపోయిన బాధితులను తాను స్వయంగా కలుసుకుని, వారి సమస్యలను తెలుసుకుని సీఎం దృష్టికి తీసుకెళ్తానని ఆయన హామీ ఇచ్చారు.

* చర్చనీయాంశంగా మారిన ప్రశ్నలు

జగ్గారెడ్డి చేసిన ఈ తీవ్రమైన ఆరోపణలు తెలంగాణ రాజకీయాలను కొత్త మలుపు తిప్పాయి. హైడ్రా చర్యల వెనుక నిజంగానే బీఆర్‌ఎస్‌ అనుకూల కుట్ర ఉందా?లేక ఇది కాంగ్రెస్‌ పార్టీలోని అంతర్గత అసంతృప్తికి ప్రతిబింబమా?జూబ్లీహిల్స్‌ ఉపఎన్నికల్లో ఈ వివాదం ఎలాంటి ప్రభావం చూపుతుంది? ఈ ప్రశ్నలకు సమాధానం రాబోయే రాజకీయ పరిణామాలు, ముఖ్యంగా హైడ్రా చీఫ్ రంగనాథ్ విచారణ.. సీఎం రేవంత్ రెడ్డి చర్యలపై ఆధారపడి ఉంటుంది. ఈ వివాదం రాబోయే రోజుల్లో రాష్ట్ర రాజకీయాల్లో మరింత వేడిని పుట్టించడం ఖాయం.