పో పోవయ్యా.. ట్రంప్‌కు యూరప్ దేశాల వరుస షాక్‌లు

అమెరికా అధ్యక్షుడు డొనాల్డ్ ట్రంప్‌కు యూరప్ దేశాల నుంచి అనూహ్య ప్రతిస్పందనలు ఎదురవుతున్నాయి. ఇరాన్‌పై కొనసాగుతున్న ఉద్రిక్త పరిస్థితుల నేపథ్యంలో అమెరికా చేపడుతున్న సైనిక చర్యలకు మద్దతు ఇవ్వడంలో కొన్ని యూరోపియన్ దేశాలు వెనుకడుగు వేస్తున్నాయి. ముఖ్యంగా ఇటలీ తాజా నిర్ణయం అంతర్జాతీయ వేదికపై చర్చనీయాంశంగా మారింది.

అంతర్జాతీయ మీడియా కథనాల ప్రకారం.. ఇరాన్‌పై యుద్ధ కార్యకలాపాల్లో పాల్గొనే అమెరికా యుద్ధ విమానాలకు తమ గగనతలాన్ని వినియోగించుకోవడానికి ఇటలీ అనుమతి నిరాకరించినట్లు తెలుస్తోంది. ఇదే కాకుండా మెడిటరేనియన్ సముద్రంలో వ్యూహాత్మకంగా కీలకమైన సిసిలీ ద్వీపంలోని వైమానిక స్థావరాన్ని కూడా అమెరికా వినియోగించుకోకుండా ఇటలీ నిర్ణయం తీసుకున్నట్లు సమాచారం. ఈ స్థావరం పశ్చిమాసియాకు వెళ్లే అమెరికా బాంబర్ విమానాలకు కీలక మధ్యంతర కేంద్రంగా పరిగణించబడుతుంది.

సమాచారం ప్రకారం ఇరాన్‌పై దాడులకు ముందుగా యూఎస్ బాంబర్ విమానాలను సిసిలీలో నిలిపేందుకు అమెరికా ఇటలీ అనుమతి కోరింది. అయితే ప్రస్తుత పరిస్థితుల్లో యుద్ధంలో నేరుగా భాగస్వామ్యం కావడం ఇటలీకి ఇష్టం లేకపోవడంతో ఈ విజ్ఞప్తిని తిరస్కరించినట్లు తెలుస్తోంది. ఈ నిర్ణయం ద్వారా యూరప్ దేశాలు పశ్చిమాసియా ఉద్రిక్తతల్లో మరింతగా చిక్కుకోకుండా జాగ్రత్తపడుతున్నాయని విశ్లేషకులు భావిస్తున్నారు.

ఇటలీకి ముందు స్పెయిన్ కూడా ఇదే తరహా నిర్ణయం తీసుకుంది. ఇరాన్‌పై జరుగుతున్న యుద్ధంలో పాల్గొనే అమెరికా విమానాలకు తమ గగనతలాన్ని అనుమతించబోమని స్పెయిన్ రక్షణ మంత్రి మార్గరెటా రొబెల్స్ స్పష్టంగా ప్రకటించారు. యూరోపియన్ యూనియన్ దేశాలు ఈ ఘర్షణలో ప్రత్యక్ష పాత్ర పోషించడంపై ఆసక్తి చూపడం లేదని ఈ నిర్ణయాలు సూచిస్తున్నాయి.

ఈ పరిణామాలు అమెరికా విదేశాంగ విధానంపై ప్రభావం చూపే అవకాశముంది. ముఖ్యంగా నాటో మిత్రదేశాల మద్దతు విషయంలో మార్పులు వస్తున్నాయనే సంకేతాలు కనిపిస్తున్నాయి. ఒకవైపు అమెరికా ఇరాన్‌పై ఒత్తిడి పెంచే ప్రయత్నం చేస్తుండగా మరోవైపు యూరప్ దేశాలు సంయమనంతో వ్యవహరించడం గమనార్హం.

మొత్తంగా చూస్తే ఇటలీ , స్పెయిన్ తీసుకున్న నిర్ణయాలు పశ్చిమాసియా సంక్షోభంలో యూరప్ పాత్రను స్పష్టంగా ప్రతిబింబిస్తున్నాయి. యుద్ధానికి దూరంగా ఉండాలని.. సమస్యలను రాజనీతిక మార్గంలో పరిష్కరించాలని యూరప్ దేశాలు భావిస్తున్నట్లు ఈ చర్యలు తెలియజేస్తున్నాయి.