భారతీయులను వదలని ఇరాన్.. లిటిల్ ఇండియాపై దాడి.. కలకలం

మధ్యప్రాచ్యంలో ముదురుతున్న యుద్ధ మేఘాలు ఇప్పుడు భారతీయ మూలాలను తాకాయి. ఇజ్రాయెల్‌పై ఇరాన్ ప్రయోగించిన బాలిస్టిక్ క్షిపణులు.. ‘లిటిల్ ఇండియా’గా పిలుచుకునే డిమోనా నగరాన్ని లక్ష్యంగా చేసుకోవడం అంతర్జాతీయంగా కలకలం రేపుతోంది. దశాబ్దాలుగా భారతీయ సంస్కృతికి, మరాఠీ మాటలకు, స్వచ్ఛమైన దేశీ రుచులకు నిలయమైన ఈ నగరం.. ఒక్కసారిగా క్షిపణుల మోతతో దద్దరిల్లింది. ఈ దాడిలో సుమారు 30 మంది గాయపడటంతో, అక్కడ నివసిస్తున్న వేలాది మంది భారత సంతతి ప్రజల భద్రతపై భారత్‌లో తీవ్ర ఆందోళన వ్యక్తమవుతోంది. అస్తిత్వ పోరాటంలో ఉన్న ఇజ్రాయెల్‌లో.. భారతీయ ఆత్మగా నిలిచే డిమోనాపై జరిగిన ఈ దాడి యుద్ధం యొక్క భీభత్సాన్ని మన గడప వరకు తెచ్చి చూపింది.

ఇజ్రాయెల్‌పై ఇరాన్ క్షిపణి దాడులు తీవ్రతరమవుతున్న నేపథ్యంలో తాజాగా డిమోనా నగరంపై జరిగిన దాడి అంతర్జాతీయంగా ఆందోళన రేకెత్తించింది. ఈ దాడుల్లో సుమారు 30 మంది గాయపడినట్టు సమాచారం. ముఖ్యంగా ఈ ప్రాంతం ‘లిటిల్ ఇండియా’గా పేరుగాంచినందున అక్కడి భారత సంతతి ప్రజల భద్రతపై భారత్‌లోనూ ఆందోళన వ్యక్తమవుతోంది.

ఇరాన్‌ నుంచి ప్రయోగించిన బాలిస్టిక్ క్షిపణులు డిమోనా పరిసర ప్రాంతాలను తాకినట్లు ఇజ్రాయెల్ అధికారులు వెల్లడించారు. దాడి జరిగిన వెంటనే అత్యవసర సేవలు రంగంలోకి దిగి గాయపడిన వారిని సమీప ఆసుపత్రులకు తరలించాయి. పరిస్థితి ఉద్రిక్తంగా మారడంతో భద్రతా దళాలు అప్రమత్తమయ్యాయి.

డిమోనా నగరానికి ‘లిటిల్ ఇండియా’ అనే పేరు రావడానికి కారణం అక్కడ పెద్ద సంఖ్యలో భారత సంతతి ప్రజలు నివసించడమే. టెల్ అవీవ్‌లోని భారత రాయబార కార్యాలయం తెలిపిన వివరాల ప్రకారం.. 1950-60 దశకాల్లో భారతదేశానికి చెందిన యూదు కమ్యూనిటీ పెద్ద ఎత్తున ఇజ్రాయెల్‌కు వలస వెళ్లింది. వీరిలో ఎక్కువ మంది మహారాష్ట్రకు చెందిన బెనె ఇజ్రాయెల్ యూదులు కాగా కేరళకు చెందిన కోచిన్ యూదులు, కోల్‌కతాకు చెందిన బగ్దాది యూదులు కూడా ఉన్నారు.

ఈ వలసదారులు ప్రధానంగా డిమోనా ప్రాంతంలో స్థిరపడటంతో అక్కడ భారతీయ సంస్కృతి బలంగా ప్రతిఫలించింది. ప్రస్తుతం డిమోనాలో సుమారు 7,500 మంది భారత సంతతి ప్రజలు నివసిస్తున్నట్లు అంచనా. వీరిలో చాలామంది మరాఠీని అనర్గళంగా మాట్లాడగలరు. హిందీ కూడా విస్తృతంగా వినిపిస్తుంది.

డిమోనాలోని వీధుల్లో భారతీయ ఆహార వాసనలు పరుచుకుని ఉంటాయి. సోన్‌పప్డీ, గులాబ్ జామ్, పాప్రి చాట్, భేల్‌పురి వంటి వంటకాలు విక్రయించే దుకాణాలు ప్రత్యేక ఆకర్షణగా నిలుస్తాయి. స్థానిక మార్కెట్లలో భారతీయ రుచులు, సంప్రదాయాలు స్పష్టంగా కనిపిస్తాయి.

ఆర్థికంగా కూడా ఈ భారతీయులు బలంగా స్థిరపడ్డారు. వజ్రాల వ్యాపారం, ఐటీ రంగాల్లో అనేక మంది కీలక పాత్ర పోషిస్తున్నారు. అంతేకాకుండా తమ మూలాలను మరవకుండా భారతీయ సంస్కృతి, సంప్రదాయాలను తరతరాలకు అందిస్తున్నారు. దీపావళి, ఓనం వంటి పండుగలను ఘనంగా జరుపుకుంటూ తమ ఐడెంటిటీని కాపాడుకుంటున్నారు.

సాంస్కృతిక కార్యక్రమాల విషయంలోనూ డిమోనా ప్రత్యేక స్థానాన్ని సంపాదించింది. 2025లో నిర్వహించిన ఇండియన్ ఫిల్మ్ ఫెస్టివల్‌కు విపరీతమైన స్పందన లభించింది. నెలరోజుల పాటు థియేటర్లు ప్రేక్షకులతో కిక్కిరిసిపోయాయి. ఇటీవల జరిగిన భారతీయ సంగీత ఉత్సవం కూడా భారీగా విజయవంతమైంది.

డిమోనాతో పాటు హైఫా, టెల్ అవీవ్, అరద్, నెతన్యా, అఫులా వంటి నగరాల్లోనూ భారత సంతతి ప్రజలు గణనీయంగా నివసిస్తున్నారు. ప్రస్తుతం కొనసాగుతున్న ఇరాన్-ఇజ్రాయెల్ ఉద్రిక్తతల నేపథ్యంలో ఈ ప్రాంతాల్లోని భారతీయుల భద్రతపై భారత్ ప్రభుత్వం ప్రత్యేక దృష్టి సారించినట్లు సమాచారం.

ఈ తాజా దాడి మరోసారి మధ్యప్రాచ్యంలో భద్రతా పరిస్థితుల సున్నితత్వాన్ని చాటిచెప్పింది. ‘లిటిల్ ఇండియా’గా గుర్తింపు పొందిన డిమోనా వంటి ప్రాంతాలు ఈ ఘర్షణల ప్రభావానికి గురికావడం ప్రపంచాన్ని మరింత ఆందోళనకు గురిచేస్తోంది.