ఇజ్రాయెల్ కు బురిడీ.. ఇరాన్ దెబ్బకు నవ్వులపాలు!

ఇరాన్, ఇజ్రాయెల్ మధ్య యుద్ధం రణరంగంలోనే కాదు, సోషల్ మీడియాలో కూడా గట్టిగానే జరుగుతోంది. తాజాగా ఇరాన్‌పై జరిపిన దాడిలో ఒక Mi-17 హెలికాప్టర్‌ను ధ్వంసం చేశామంటూ ఇజ్రాయెల్ డిఫెన్స్ ఫోర్స్ (IDF) ఒక వీడియోను విడుదల చేసింది. అయితే, ఈ వీడియో చూసిన నెటిజన్లు ఒక్కసారిగా షాక్ అవుతున్నారు. క్షిపణి వచ్చి నేరుగా తగిలినా ఆ హెలికాప్టర్ రెక్కలు కనీసం కదలకపోవడంతో, అది నిజమైన హెలికాప్టర్ కాదు.. కేవలం నేలపై వేసిన పెయింటింగ్ అని నెటిజన్లు ట్రోల్ చేస్తున్నారు. వివరాలలోకి వెళితే ..

ఇజ్రాయెల్‌ను బురిడీ కొట్టించిన ఇరాన్:

సాధారణంగా యుద్ధ సమయంలో శత్రువుల క్షిపణులను తప్పుదారి పట్టించడానికి దేశాలు రకరకాల జిమ్మిక్కులు చేస్తుంటాయి. ఇక్కడ కూడా ఇరాన్ అదే పని చేసిందని ప్రచారం జరుగుతోంది. హెలికాప్టర్ ఆకారంలో నేలపై పెయింటింగ్ వేసి, అది నిజమైన విమానం అని ఇజ్రాయెల్‌ను నమ్మించిందని నెటిజన్లు కామెంట్లు చేస్తున్నారు. ఇక వీడియోలో క్షిపణి దాడి జరిగినప్పుడు మంటలు వచ్చాయి కానీ, హెలికాప్టర్ బాడీలో ఎలాంటి కదలిక లేకపోవడం ఈ అనుమానాలకు బలాన్నిస్తోంది. ఇరాన్ వేసిన ఈ ప్లాన్ తో ఇజ్రాయెల్ విలువైన క్షిపణి వృధా అయ్యిందని సోషల్ మీడియాలో సెటైర్లు పేలుతున్నాయి.

అసలు ఆ వీడియోలో ఏముంది:

ఇజ్రాయెల్ విడుదల చేసిన వీడియోలో ఒక స్థావరంపై క్షిపణి దాడి జరుగుతున్నట్లు కనిపిస్తుంది. అక్కడ నిలిపి ఉంచిన Mi-17 హెలికాప్టర్ పై క్షిపణి పడగానే పెద్ద ఎత్తున పొగ, మంటలు వచ్చాయి. కానీ, డీప్ గా గమనిస్తే ఆ హెలికాప్టర్ కింద నీడ లేకపోవడం, పేలుడు ధాటికి రెక్కలు విరగకపోవడం అందరినీ ఆశ్చర్యపరుస్తోంది. ఒకవేళ అది నిజమైన హెలికాప్టర్ అయితే పేలుడుకు ముక్కలు ముక్కలు కావాలి, కానీ అలా జరగలేదు. దీంతో అది కేవలం ఒక డెకాయ్ లేదా పెయింటింగ్ అయి ఉంటుందని రక్షణ నిపుణులు సైతం విశ్లేషిస్తున్నారు.

ట్రిక్కులు వర్సెస్ టెక్నాలజీ.. విజయం ఎవరిది:

యుద్ధంలో కేవలం ఆయుధాలే కాదు, తెలివితేటలు కూడా ముఖ్యమే. ఇరాన్ కావాలనే ఇలాంటి నకిలీ లక్ష్యాలను ఏర్పాటు చేసి ఇజ్రాయెల్ అటాక్స్ ని తప్పుదారి పట్టిస్తోందని కొందరు అంటుంటే, లేదు అది నిజమైన హెలికాప్టరే అని మరికొందరు వాదిస్తున్నారు. ఇక ఏది ఏమైనా ఈ పెయింటింగ్ వ్యవహారం ఇప్పుడు ఇంటర్నెట్‌లో తెగ హల్చల్ చేస్తోంది. ఇలాంటి చిన్న ట్రిక్కులతో భారీ నష్టాన్ని తప్పించుకోవచ్చని ఇరాన్ భావిస్తున్నట్లు కనిపిస్తోంది. మరోవైపు ఇజ్రాయెల్ మాత్రం తన దాడుల తీవ్రతను పెంచుతూనే ఉంది. ఈ మైండ్ గేమ్స్ లో చివరికి ఎవరు గెలుస్తారో చూడాలి. యుద్ధ తంత్రాలు ఎప్పుడూ విభిన్నంగానే ఉంటాయి. ఈ పెయింటింగ్ కథ నిజమో కాదో పక్కన పెడితే, ప్రస్తుతం ఇరు దేశాల మధ్య ఉద్రిక్తతలు మాత్రం ఆందోళన కలిగించేంత పీక్స్‌కు చేరాయి అన్నది నిజం.