పతనానికి ఫుల్‌స్టాప్.. రూపాయి రాకెట్ వేగం! వరుసగా ఐదో రోజు లాభాలు

అంతర్జాతీయ ద్రవ్య మార్కెట్‌లో అమెరికన్ డాలర్ ఆధిపత్యానికి బ్రేక్ పడింది. భారత రూపాయి తిరిగి పుంజుకుంటోంది. గతంలో విదేశీ పెట్టుబడుల ఉపసంహరణ, గ్లోబల్ మార్కెట్ అస్థిరత, ముడి చమురు ధరల ఒత్తిడి కారణంగా రూపాయి మారకం విలువ భారీగా క్షీణించింది. డాలర్‌తో పోలిస్తే 97 సమీపానికి రూపాయి పడిపోగా, ప్రస్తుతం పరిస్థితులు వేగంగా మారుతున్నాయని ఆర్థిక వేత్తలు చెబుతున్నారు. భారతీయ రిజర్వ్ బ్యాంక్ (ఆర్బీఐ) సంస్కరణలు, డాలర్ బలహీనపడటం వల్ల మన కరెన్సీ వరుసగా ఐదో రోజు కూడా లాభపడిందని అంటున్నారు.

తాజా ట్రేడింగ్ సరళిని పరిశీలిస్తే, గురువారం ఉదయం ఆరంభంలోనే డాలర్‌తో పోలిస్తే రూపాయి 23 పైసల నుంచి 31 పైసల వరకు పుంజుకుని 94.92 – 94.86 శ్రేణి వద్ద అత్యంత బలమైన ఆరంభాన్ని నమోదు చేసిందని మార్గెట్ వర్గాలు చెబుతున్నాయి. ఇక మధ్యాహ్నం సమయానికి కూడా విదేశీ మారక మార్కెట్‌లో స్థిరమైన గిరాకీ నిలకడగా కొనసాగుతోంది. దీంతో రూపాయి 94.90 – 95.00 పరిధిలోనే ధృడంగా నిలిచింది. క్రితం రోజు ముగింపుతో పోలిస్తే మార్కెట్లో కొనుగోళ్ల మద్దతు స్పష్టంగా కనిపిస్తోందని చెబుతున్నారు.

రూపాయి ఈ స్థాయిలో కోలుకోవడానికి ప్రధానంగా అంతర్జాతీయ, దేశీయ ఆర్థిక అంశాలు కలసివచ్చాయని అంటున్నారు. గ్లోబల్ డాలర్ ఇండెక్స్ 0.1 శాతం తగ్గి 102.06 స్థాయికి పడిపోవడం రూపాయికి ప్రధాన ఊరటగా మారిందని చెబుతున్నారు. అమెరికా ఆర్థిక వ్యవస్థలో ద్రవ్యోల్బణ ఒత్తిళ్లు ఉన్నప్పటికీ, యూఎస్ ఫెడరల్ రిజర్వ్ అధికారులు అప్రమత్తత, యూఎస్ ట్రెజరీ ఈల్డ్స్ (బాండ్ దిగుబడులు) తగ్గడం వల్ల డాలర్‌పై ఒత్తిడి పెరిగింది. దీనికి తోడు కొరియన్ వాన్, చైనా రెన్మిన్బీ, ఇండోనేషియా రుపియా వంటి ఆసియా కరెన్సీలు కూడా కోలుకోవడం రూపాయి బలానికి సెంటిమెంట్ పరంగా తోడ్పడింది.

మరోవైపు, రూపాయి విలువ క్షీణతను అడ్డుకోవడానికి రిజర్వ్ బ్యాంక్ ఆఫ్ ఇండియా అనుసరించిన సరికొత్త నియంత్రణ విధానాలు మార్కెట్లో స్పెక్యులేషన్‌కు చెక్ పెట్టాయి. డెరివేటివ్స్ మార్కెట్లో కఠిన నిబంధనలు అమలు చేయడం, ఫారెక్స్ మార్కెట్లో నామమాత్రపు లభ్యతను పెంచడం ద్వారా ఆర్బీఐ రూపాయికి కొండంత అభయాన్నిచ్చిందని అంటున్నారు. అదే సమయంలో అంతర్జాతీయంగా ముడి చమురు ధరల్లో స్వల్ప తగ్గుదల చోటుచేసుకోవడం, ఈక్విటీ మార్కెట్లలో ఐటీ షేర్లు లాభాల్లో పయనించడం కూడా రూపాయికి సానుకూలంగా మారాయి.

ఈ తాజా పరిణామాల వల్ల దేశీయ ఆర్థిక వ్యవస్థపై భిన్నమైన ప్రభావాలు పడనున్నాయి. రూపాయి బలపడటం వల్ల భారత్‌కు ప్రధానంగా దిగుమతుల భారం తగ్గుతుంది. ఇంధన, ముడి చమురు, సాంకేతిక పరికరాల దిగుమతి వ్యయం తగ్గడం ద్రవ్యోల్బణాన్ని అదుపులో ఉంచడానికి సహాయపడుతుందని చెబుతున్నారు. అయితే ఎగుమతిదారులకు డాలర్ ద్వారా వచ్చే ఆదాయంపై కొంత ప్రభావం పడే అవకాశం ఉన్నందున ఎగుమతిదారులు రూపాయి పెరిగే ప్రతీ అవకాశాన్ని వినియోగించుకోవాలని, దిగుమతిదారులు తమ సమీప కాల అవసరాలకు తగినట్లుగా హెడ్జింగ్ చేసుకుంటూ డాలర్లను కొనుగోలు చేయడం శ్రేయస్కరమని ఫారెక్స్ విశ్లేషకులు స్పష్టం చేస్తున్నారు.