వాడి పడేసే ప్లేట్లు మళ్లీ కడిగి వాడుతున్నారా?

ట్రైన్ జర్నీలో వేడివేడిగా ఏదైనా తిందామని ఆర్డర్ ఇస్తున్నారా? అయితే ఒక్క నిమిషం ఆగండి! ముంబై - కోల్‌కతా మధ్య నడిచే జ్ఞానేశ్వరి ఎక్స్‌ప్రెస్‌లో బయటపడిన ఒక దృశ్యం ఇప్పుడు నెట్టింట సెన్సేషన్ సృష్టిస్తోంది. వాడేసి పారేయాల్సిన డిస్పోజబుల్ ప్లేట్లు, కప్పులను ప్యాంట్రీ సిబ్బంది మళ్లీ కడిగి వాడుతున్నట్లుగా ఉన్న వీడియో బయటకు వచ్చింది. మనం డబ్బులు ఇచ్చి కొనుక్కునే తిండి ఎంతవరకు సురక్షితం అనే ప్రశ్న ఇప్పుడు అందరినీ వేధిస్తోంది. ఆ వివరాలు ఇలా వున్నాయి..

వైరల్ వీడియోలో విస్తుపోయే దృశ్యం:

ముంబై నుంచి కోల్‌కతా వెళ్లే జ్ఞానేశ్వరి ఎక్స్‌ప్రెస్లో ప్యాంట్రీ కార్‌లో ఈ దారుణం వెలుగు చూసింది. సోషల్ మీడియాలో వచ్చిన వీడియోలో రైల్వే సిబ్బంది ఒక సింక్ వద్ద నిలబడి, అప్పటికే వాడేసిన ప్లాస్టిక్ ప్లేట్లు, కప్పులను నీళ్లతో శుభ్రం చేస్తున్నారు. సాధారణంగా 'యూజ్ అండ్ త్రో' వస్తువులను మళ్లీ కడగాల్సిన అవసరం ఏముంది? అంటే వాటిని మళ్లీ కొత్త ప్రయాణికులకు వడ్డించడానికి వాడుతున్నారా? అనే అనుమానాలు వ్యక్తమవుతున్నాయి. ఈ వీడియో చూసిన నెటిజన్లు రైల్వే శాఖపై మండిపడుతున్నారు.

ప్రాణాలతో చెలగాటం ఆడుతున్నారా?:

భారతీయ రైల్వేలో ప్రతిరోజూ కోట్ల మంది ప్రయాణిస్తుంటారు. ప్రయాణికుల ఆరోగ్యం దృష్ట్యా 'ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా' కఠినమైన నిబంధనలు పెట్టింది. ఒకసారి వాడిన ప్లేట్లను మళ్లీ వాడటం వల్ల ఇన్ఫెక్షన్లు, ఇతర ఆరోగ్య సమస్యలు తలెత్తే ప్రమాదం ఉంది. ప్రయాణికులు భారీగా డబ్బులు చెల్లించి ఆహారం కొంటున్నప్పుడు, కనీస శుభ్రత పాటించకపోవడం పెద్ద నేరమని ప్రయాణికులు వాపోతున్నారు. ఇక కదిలే రైలులో పరిశుభ్రత పాటించడం కష్టమే అయినా, ఇలాంటి పనులు చేయడం మాత్రం క్షమించరానిది.

ప్రయాణికుల్లో తగ్గుతున్న నమ్మకం:

రైల్వే కేటరింగ్‌పై ఇప్పటికే ప్రయాణికుల్లో మిశ్రమ స్పందన ఉంది. ఇలాంటి ఘటనలు బయటపడటం వల్ల ప్రయాణికులకు రైల్వే ఫుడ్‌పై నమ్మకం సడలుతోంది. "మేము ఇంట్లో నుంచి ఆహారం తెచ్చుకోవడమే మేలు" అని చాలా మంది ప్రయాణికులు అభిప్రాయపడుతున్నారు. లక్షల మంది ఆధారపడే ఇలాంటి ప్రజా రవాణా వ్యవస్థలో సిబ్బంది నిర్లక్ష్యం వల్ల రైల్వే శాఖ ప్రతిష్ట దెబ్బతింటోంది. నెటిజన్లు ఐతే వెంటనే ఈ విషయంపై విచారణ జరిపి, బాధ్యులైన కాంట్రాక్టర్లపై కఠిన చర్యలు తీసుకోవాలని డిమాండ్ చేస్తున్నారు.

నిఘా పెరగాల్సిన అవసరం ఉంది:

ఇలాంటి ఘటనలు మళ్లీ జరగకుండా ఉండాలంటే రైల్వే ప్యాంట్రీ సర్వీసులపై ఆకస్మిక తనిఖీలు నిర్వహించాలి. ముఖ్యంగా రద్దీగా ఉండే రూట్లలో ప్యాంట్రీ సిబ్బంది తీరును నిరంతరం గమనించాలి. ప్రయాణికులు కూడా ఏదైనా తప్పు గమనిస్తే వెంటనే ఫిర్యాదు చేసేలా మెరుగైన రిపోర్టింగ్ వ్యవస్థను అందుబాటులోకి తీసుకురావాలి. ఇక అప్పుడే రైల్వే కేటరింగ్‌లో నాణ్యత పెరుగుతుంది. అధికారులు స్పందించి నిజానిజాలు తేల్చే వరకు ప్రయాణికులు జాగ్రత్తగా ఉండటం మంచిది.