నాసిక్‌ లో ఎగిరిన ఎల్‌.సీ.ఏ తేజ‌స్ ఎంకే1ఏ.. వాటర్ సెల్యూట్ వీడియో వైరల్!

రక్షణ రంగంలో స్వయంసమృద్ధి సాధిస్తున్న భారత్‌.. అధునాతన క్షిపణి వ్యవస్థలపై దృష్టి సారిస్తోన్న సంగతి తెలిసిందే. ఈ క్రమంలో హైపర్‌ సోనిక్‌ క్షిపణి ప్రయోగాలను ముమ్మరం చేస్తోంది. ఈ సమయంలో లైట్ కాంబాట్ ఎయిర్ క్రాఫ్ట్ (ఎల్.సీ.ఏ) తేజాస్ ఎంకే1ఏ యుద్ధ విమానాన్ని హింధుస్థాన్ ఏరోనాటిక్స్ లిమిటెడ్ ఉత్పత్తి చేయగా.. దాన్ని ఈ రోజు రక్షణ మంత్రి రాజ్ నాథ్ సింగ్ ప్రారంభించారు!

అవును... ఎల్.సీ.ఏ.తేజాస్ ఎంకే1ఏ యుద్ధ విమానం శుక్రవారం.. మ‌హారాష్ట్రలోని నాసిక్ ఎయిర్‌ బేస్‌ లో ఎగిరింది. హిందుస్థాన్ ఏరోనాటిక్స్ లిమిటెడ్‌ కు చెందిన మూడ‌వ ఉత్పత్తి కేంద్రం నుంచి ఆ విమానాన్ని త‌యారు చేయగా... రాజ్‌ నాథ్ సింగ్ స‌మ‌క్షంలో ఈ విమానం త‌న విన్యాసాలు ప్రద‌ర్శించింది. ఈ సందర్భంగా... ఎల్‌.సీ.ఏ ఎంకే1ఏకు చెందిన మూడ‌వ ప్రొడ‌క్షన్ లైన్‌ ను మంత్రి ప్రారంభించారు.

ఈ సందర్భంగా... ఎల్‌.సీ.ఏ తేజ‌స్ ఎంకే1ఏ యుద్ధ విమానానికి నాసిక్ ఎయిర్‌ బేస్‌ లో వాట‌ర్ సెల్యూట్ చేశారు. తేజ‌స్ ఫైట‌ర్ విమానాల‌ను ఇప్పటికే బెంగుళూరులోని రెండు కేంద్రాల్లో ఉత్పత్తి చేస్తుండగా.. అక్కడ ప్రతి ఏటా 16 విమానాల‌ను త‌యారు చేస్తున్నారు. ఈ క్రమంలో తాజాగా నాసిక్‌ లోనూ తయారీ కేంద్రాన్ని మొద‌లుపెట్టారు. దాదాపు రు.150 కోట్ల పెట్టుబ‌డితో ఈ కేంద్రాన్ని స్థాపించినట్లు చెబుతున్నారు.

హె.ఏ.ఎల్. ను ప్రశంసించిన రాజ్ నాథ్ సింగ్!:

భారతదేశ రక్షణ స్వావలంబనకు పెరుగుతున్న కృషికిగానూ హిందుస్తాన్ ఏరోనాటిక్స్ లిమిటెడ్ (హెచ్.ఏ.ఎల్) ను రక్షణ మంత్రి రాజ్‌ నాథ్ సింగ్ ఈ సందర్భంగా ప్రశంసించారు. ఈ సందర్భంగా నాసిక్ క్యాంపస్ ను తాను తొలిసారి సందర్శించానని చెబుతూ.. అక్కడి సిబ్బంది ఉత్సాహాన్ని ఆయన ప్రశంసించారు. ఇక్కడ పనిచేస్తున్న ప్రతి ఒక్కరి ముఖాల్లోనూ తాను గర్వాన్ని చూడగలిగానని అన్నారు.

ఈ సందర్భంగా... 'హిందుస్తాన్ ఏరోనాటిక్స్ లిమిటెడ్ (హెచ్.ఏ.ఎల్) నాసిక్‌'ను దేశ రక్షణ బలానికి చిహ్నంగా ఆయన అభివర్ణించారు. ఇదే క్రమంలో... నాసిక్ భూమి ఎంతో చారిత్రాత్మకమైనదని.. ఇక్కడ శివుడు త్రయంబకేశ్వర్ రూపంలో నివసిస్తున్నాడని.. ఈ భూమి విశ్వాసం, భక్తికి మాత్రమే కాదు, ఇప్పుడు స్వావలంబనను కూడా సూచిస్తుందని రక్షణ మంత్రి జోడించారు.