ట్రంప్ టారిఫ్ లపై భారత్ రియాక్షన్ ఇదే

అమెరికా అధ్యక్షుడు డొనాల్డ్ ట్రంప్ తీసుకున్న తాజా నిర్ణయం అంతర్జాతీయ వాణిజ్య రంగాన్ని కుదిపేస్తోంది. భారతదేశం నుండి దిగుమతి అయ్యే వస్తువులపై అదనంగా 25 శాతం సుంకం విధిస్తున్నట్టు ట్రంప్ ప్రకటించారు. గతంలో విధించిన 25 శాతం టారిఫ్‌కి ఇది జత కలిస్తే మొత్తం 50 శాతం సుంకం భారత్ దిగుమతులపై అమలవుతుంది. ఈ చర్య భారత ప్రభుత్వాన్ని తీవ్రంగా ఆగ్రహానికి గురిచేసింది. దీనిని ఖండిస్తూ విదేశాంగ శాఖ ప్రకటన విడుదల చేసింది.

- ట్రంప్ నిర్ణయం – రష్యాతో చమురు వ్యాపారమే కారణమా?

ట్రంప్ ఈ టారిఫ్ నిర్ణయం తీసుకోవడానికి ప్రధాన కారణంగా భారతదేశం–రష్యా మధ్య చమురు వ్యాపారాన్ని పేర్కొన్నారు. ఉక్రెయిన్‌పై రష్యా దాడులకు నిరసనగా అమెరికా గట్టి ఆంక్షలు విధిస్తూ వస్తోంది. అయినప్పటికీ భారత్, రష్యా మధ్య కొనసాగుతున్న చమురు వ్యాపారంపై అసహనం వ్యక్తం చేస్తూ ఈ ప్రతీకార చర్యలు చేపట్టారు. ట్రంప్ కొత్త ఎగ్జిక్యూటివ్ ఆర్డర్‌ ప్రకారం, 21 రోజుల తర్వాత అమెరికాలోకి ప్రవేశించే భారతీయ దిగుమతులపై అదనపు 25 శాతం టారిఫ్ వర్తిస్తుంది. అయితే సెప్టెంబర్ 17 లోపు రవాణా అయి, క్లియరెన్స్ పొందిన సరుకులకు మినహాయింపు ఉంటుంది.

- భారత వైఖరి – దేశ ప్రయోజనాలే ప్రాధాన్యం

ఈ నేపథ్యంలో భారత్ ప్రభుత్వం ఈ చర్యలను తీవ్రంగా ఖండించింది. విదేశాంగ శాఖ అధికార ప్రతినిధి ఒక ప్రకటనలో మాట్లాడుతూ “ఈ చర్యలు దురదృష్టకరం, అన్యాయమైనవి, అసమంజసమైనవి. 140 కోట్ల ప్రజల ఇంధన భద్రతను దృష్టిలో పెట్టుకుని, మార్కెట్ అవసరాలకు అనుగుణంగా దిగుమతులు జరుగుతున్నాయి. ప్రపంచంలోని ఇతర దేశాల్లాగే, భారతదేశం కూడా తన జాతీయ ప్రయోజనాల కోసం నిర్ణయాలు తీసుకుంటుంది” అని స్పష్టం చేశారు. భారత ప్రభుత్వం ఇప్పటికే అమెరికాకు ఈ విషయమై తమ వైఖరిని స్పష్టంగా తెలియజేసిందని గుర్తు చేసింది. అలాగే, దేశ ప్రయోజనాలను కాపాడేందుకు అవసరమైన అన్ని చర్యలు తీసుకుంటామని విదేశాంగ శాఖ స్పష్టం చేసింది.

-వాణిజ్య సంబంధాల్లో ఒడిదుడుకులు

ఇప్పుడు ట్రంప్ నిర్ణయం భారత్-అమెరికా వాణిజ్య సంబంధాల్లో మరోసారి ఉద్రిక్తతలకు దారి తీసే అవకాశముంది. గతంలోనూ జీఎస్పీ ప్రోగ్రాం నుంచి భారత్‌ను తొలగించడం, భారత దిగుమతులపై టారిఫ్‌లు విధించడం వంటి చర్యల ద్వారా అమెరికా వాణిజ్యపరంగా కఠిన వైఖరిని తీసుకుంది. తాజా నిర్ణయం ఆ దిశలో మరో ఘట్టంగా అభివర్ణించవచ్చు.

అమెరికా తీసుకున్న టారిఫ్ నిర్ణయం వల్ల రాజకీయ, ఆర్థిక ప్రభావాలు అనేకం. భారత ప్రభుత్వం దేశ ప్రయోజనాలను రక్షించేందుకు ఎంతదూరమైనా వెళ్ళేందుకు సిద్ధమని తెలిపింది. ఇకపై రెండు దేశాల మధ్య సంబంధాలు ఏ దిశగా మలుపుతీస్తాయో వేచి చూడాల్సిందే.