ఆసిం మునీర్, నఖ్వీ ఓపెనర్లు దిగితేనే భారత్ పై గెలుస్తాం

మాజీ ప్రధాని , ప్రముఖ మాజీ క్రికెటర్ కూడా అయిన ఇమ్రాన్‌ ఖాన్‌ పాకిస్థాన్ క్రికెట్ జట్టుపై తీవ్ర విమర్శలు, వ్యంగ్యాస్త్రాలు సంధించారు. ఆసియా కప్‌లో టీమిండియాపై పాకిస్థాన్ ఓటమి పాలైన నేపథ్యంలో ఈ వ్యాఖ్యలు ప్రాధాన్యతను సంతరించుకున్నాయి. ఈ ఓటమికి పీసీబీలో ఉన్న అంతర్గత సమస్యలు, బంధుప్రీతి ప్రధాన కారణమని ఇమ్రాన్ ఖాన్ ఆరోపించారు. జైలులో ఉన్న ఇమ్రాన్ ఖాన్ ఈ విషయాలను తన సోదరి అలీమా ఖాన్ ద్వారా మీడియాకు వెల్లడించారు.

* ఇమ్రాన్ ఖాన్ వ్యంగ్య వ్యాఖ్యలు

ఆసియా కప్‌లో పాకిస్థాన్ జట్టు భారత్‌పై రెండుసార్లు ఓటమిని చవిచూసిన తర్వాత.. ఇమ్రాన్ ఖాన్ మాట్లాడుతూ పాకిస్థాన్ గెలవాలంటే ఆర్మీ చీఫ్ జనరల్ ఆసీం మునీర్, పీసీబీ ఛైర్మన్ నఖ్వీ ఓపెనర్లుగా బ్యాటింగ్ చేయాలని, మాజీ ప్రధాన న్యాయమూర్తి ఖాజీ ఫయోజ్‌ ఇసా, ప్రధాన ఎన్నికల కమిషనర్ సికందర్ సుల్తాన్ రాజా, ఇస్లామాబాద్‌ హైకోర్ట్‌ చీఫ్ జస్టిస్ సర్ఫరాజ్ డోగర్‌లు అంపైర్లుగా ఉండాలని అన్నారు. ఈ వ్యాఖ్యలు రాజకీయ, సైనిక నాయకుల జోక్యంపై ఆయనకున్న ఆగ్రహాన్ని సూచిస్తున్నాయి. ఈ వ్యంగ్య వ్యాఖ్యలు పాకిస్థాన్‌లోని క్రికెట్ వర్గాలతో పాటు రాజకీయ వర్గాలలో కూడా తీవ్ర చర్చకు దారితీశాయి.

*పాక్ క్రికెట్ జట్టులో అంతర్గత సమస్యలు

పాకిస్థాన్ క్రికెట్ జట్టులో అంతర్గత సమస్యలు, రాజకీయ జోక్యం చాలా కాలంగా ఉన్నాయి. పీసీబీ ఛైర్మన్ల మార్పులు, ఆటగాళ్ల ఎంపికపై ఉన్న వివాదాలు ఈ సమస్యలకు నిదర్శనం. ఇమ్రాన్ ఖాన్ వ్యాఖ్యలు ఈ సమస్యలను మరింత స్పష్టంగా బహిర్గతం చేశాయి. అవినీతి, బంధుప్రీతి వంటి అంశాలు పాకిస్థాన్ క్రికెట్‌ను నాశనం చేస్తున్నాయని ఇమ్రాన్ ఖాన్ ఆరోపించారు.

*ఇమ్రాన్ ఖాన్ జైలు జీవితం.. అరెస్టు

1992లో పాకిస్తాన్‌కు ప్రపంచకప్‌ను అందించిన ఇమ్రాన్ ఖాన్ ప్రస్తుతం అవినీతి ఆరోపణలపై జైలులో ఉన్నారు. 2023 మే 9న ఆయన అరెస్టు తర్వాత లాహోర్‌లో జరిగిన హింసాత్మక సంఘటనలకు సంబంధించిన ఆరోపణలను కూడా ఆయన ఎదుర్కొంటున్నారు. ఆగస్టు 2023 నుంచి జైలులో ఉన్న ఆయన బెయిల్ కోసం అనేకసార్లు ప్రయత్నించినప్పటికీ అవి సఫలం కాలేదు. ఆయన వ్యాఖ్యలు రాజకీయ నాయకులు, సైనిక అధికారులు క్రీడా ప్రపంచంలోకి చేస్తున్న జోక్యంపై పెరుగుతున్న చర్చకు దారితీస్తున్నాయి.