ప్రకృతిలో 'అమర జీవి' ఇదే… వయసు పెరిగినా మళ్లీ యవ్వనంగా మారే జీవి

పుట్టిన ప్రతి ప్రాణి చనిపోవాల్సిందే అనేది సృష్టి ధర్మం. కానీ ఈ నియమాన్ని సవాల్ చేస్తూ సముద్ర గర్భంలో ఒక వింత జీవి నివసిస్తోంది. అదే 'టురిటోప్సిస్ డోర్ని' అనే జెల్లీఫిష్. దీనికి అసలు సహజ మరణమే లేదు! మరణాన్ని జయించి మళ్ళీ మళ్ళీ పుట్టే ఈ అద్భుత జీవి విశేషాలు వింటే మీరు ఆశ్చర్యపోవడం ఖాయం. వయసు పెరిగినా తిరిగి యవ్వన దశకు చేరుకునే ఈ 'అమర జీవి' రహస్యం ఏమిటో ఇప్పుడు చూద్దాం.

మరణాన్ని జయించే మంత్రం.. రివర్స్ లైఫ్ సైకిల్:

సాధారణంగా ఏదైనా ప్రాణి ముసలిదైపోతే చనిపోతుంది. కానీ ఈ జెల్లీఫిష్ కథే వేరు. దీనికి వయసు పైబడినప్పుడు లేదా ఏదైనా ప్రమాదానికి గురైనప్పుడు, ఇది చనిపోవడానికి బదులుగా తన జీవిత చక్రాన్ని వెనక్కి తిప్పుకుంటుంది. అంటే, ఇది నేరుగా ముసలితనం నుంచి తిరిగి పాలిప్ దశకు మారిపోతుంది. శాస్త్రవేత్తలు దీనిని 'బయోలాజికల్ ఇమ్మోర్టాలిటీ' అని పిలుస్తారు. ఇలా తన జీవితాన్ని ఎన్నిసార్లైనా రీస్టార్ట్ చేయగలగడం ప్రకృతిలో ఈ జీవికి మాత్రమే ఉన్న ప్రత్యేకత.

కణాల మార్పిడి.. యవ్వన దశకు ప్రయాణం:

ఈ జెల్లీఫిష్ తనను తాను ఎలా మార్చుకుంటుందో తెలుసా? దీనికి 'ట్రాన్స్‌డిఫరెన్సియేషన్' అనే ప్రక్రియ తోడవుతుంది. ఇక దీని ప్రకారం, ముసలిదైన జెల్లీఫిష్ తనలోని కణాలను పూర్తిగా కొత్తగా మార్చేసుకుంటుంది. ఒక కణం మరొక రకమైన కణంగా రూపాంతరం చెంది, తిరిగి యవ్వన దశకు చేరుకునేలా చేస్తుంది. ఇక ఈ ప్రక్రియ వల్ల దానికి గాయాలైనా లేదా ఆహారం దొరకకపోయినా చనిపోకుండా మళ్ళీ చిన్న బిడ్డలా మారిపోయి జీవనాన్ని కొనసాగిస్తుంది. అందుకే దీనిని 'బెంజమిన్ బటన్ ఆఫ్ ద సీ' అని కూడా అంటుంటారు.

శాస్త్రవేత్తలకు సవాల్:

ప్రకృతిలో సహజ మరణం లేని ఏకైక జీవిగా ఈ జెల్లీఫిష్ గిన్నిస్ రికార్డుల్లోనూ చోటు సంపాదించుకుంది. మానవ శరీరం వయసు పెరిగే కొద్దీ బలహీనపడిపోతుంటే, ఈ చిన్ని జెల్లీఫిష్ మాత్రం కణాలను పునరుద్ధరించుకుంటూ కొన్ని శతాబ్దాల నుంచి సముద్రాల్లో మనుగడ సాగిస్తోంది. ఈ అత్యంత ఆసక్తికరమైన విషయం, మున్ముందు వైద్య రంగంలో ముసలితనాన్ని అడ్డుకునే పరిశోధనలకు కూడా ఉపయోగపడవచ్చని పరిశోధకులు భావిస్తున్నారు.