భారత్ లో అత్యంత ఖరీదైన కార్ రిజిస్ట్రేషన్ నంబర్ ఇదే!

కొంతమందికి కార్లపై అమితమైన ఇష్టం ఉంటే.. మరి కొందరికి మాత్రం వాటి రిజిస్ట్రేషన్ నెంబర్ పై మోజు ఉంటుంటుంది. అది వీలైనంత ఫ్యాన్సీగా ఉండాలని.. ఉన్న నాలుగు నెంబర్లూ ఒకేలా ఉండాలని.. టోటల్ 9 రావాలని, 7 రావాలని, 3 రావాలని ఇలా రకరకాల కోరికలతో ఉంటుంటారు. ఈ క్రమంలో తాజాగా అత్యంత ఖరీదైన కారు రిజిస్ట్రేషన్ నంబర్ వ్యవహారం తెరపైకి వచ్చింది.

అవును... కొంతమందికి కార్ల రిజిస్ట్రేషన్ నంబర్స్ విషయంలో చాలా పట్టింపు ఉంటుంటుంది. అది ఎంతలా అంటే... ఆ కారు ధర కంటే దాని రిజిస్ట్రేషన్ ధర ఎక్కువగా ఉండేటంతగా! ఈ క్రమంలో తాజాగా వీఐపీ లేదా ఫ్యాన్సీ నంబర్ ప్లేట్ల కోసం వారానికోసారి హర్యానాలో ఆన్ లైన్ వేలం జరుగుతుండగా... ఈ సారి రికార్డ్ స్థాయిలో కోటిపైనే ఓ నంబర్ పలికింది.

ఇందులో భాగంగా... శుక్రవారం సాయంత్రం 5 గంటల నుంచి సోమవారం ఉదయం 9 గంటల వరకూ బిడ్డర్లు తమకు నచ్చిన నంబర్ కోసం దరఖాస్తు చేసుకోవచ్చు. ఆ తర్వాత బుధవారం సాయంత్రం 5 గంటలకు ఫలితాలు ప్రకటించే వరకు బిడ్డింగ్ ప్రారంభమవుతుంది. ఈ వేలం వ్యవహారం పూర్తిగా ఆన్ లైన్ లో ప్రభుత్వ పోర్టల్ లో అధికారికంగా జరుగుతుంది.

ఈ నేపథ్యంలో ఈ వారం బిడ్డింగ్ కోసం వచ్చిన అన్ని నంబర్లలోనూ హెచ్.ఆర్.88బీ8888 అనే నంబర్ కు అత్యధికంగా 45 దరఖాస్తులు వచ్చాయి. ఈ నంబర్ బేస్ బిడ్డింగ్ ధరను రూ.50వేలుగా నిర్ణయించారు. ఈ నేపథ్యంలో మధ్యానం 12 గంటలకు బిడ్డింగ్ ధర రూ.88 లక్షలుగా ఉండగా... ఇది ప్రతి నిమిషం పెరుగుతూ సాయంత్రం 5 గంటలకు రూ.1.17 కోట్ల వద్ద స్థిరపడింది.

ఈ నంబర్ ప్లేట్ ప్రత్యేకత ఏమిటంటే.. ఇందులో "బి" అనే అక్షరాన్ని ఇంగ్లిష్ క్యాపిటల్ లెటర్ లో పరిగణలోకి తీసుకుంటే... మొత్తం ఇది 8 అంకెల సిరీస్ (HR88B8888) లా కనిపిస్తుంది. అంటే వరుసగా... 8 అంకె ఏడు సార్లు కనిపిస్తుందన్నమాట. ఇక గత వారం హెచ్.ఆర్.22డబ్ల్యూ222 అనే రిజిస్ట్రేషన్ నంబర్ రూ.37.91 లక్షలు పలికింది.

కాగా... ఈ ఏడాది ఏప్రిల్ లో కేరళకు చెందిన టెక్ బిలియనీర్ వేణు గోపాలకృష్ణన్ తన లాంబోర్గిని ఉరుస్ కోసం "కేఎల్07డీజీ0007" అనే నంబర్ ను రూ.45.99 లక్షలకు కొనుగోలు చేసిన సంగతి తెలిసిందే. ఈ నంబర్ కోసం తొలుత బిడ్డింగ్ రూ.25 వేల వద్ద ప్రారంభమవ్వగా.. ఫైనల్ గా రూ.45.99 లక్షల దగ్గర ఆగింది.