బ్రేకప్ అయిందంటూ లీవ్ అడిగిన ఉద్యోగి.. సీఈవో స్పందన వైరల్!
ఒక ఉద్యోగి తన సీఈవోకు సెలవు కోసం పంపిన ఈమెయిల్, దానిపై బాస్ ఇచ్చిన స్పందన ప్రస్తుతం సోషల్ మీడియాలో సంచలనం సృష్టిస్తున్నాయి.
By: A.N.Kumar | 29 Oct 2025 3:00 PM IST
ఒక ఉద్యోగి తన సీఈవోకు సెలవు కోసం పంపిన ఈమెయిల్, దానిపై బాస్ ఇచ్చిన స్పందన ప్రస్తుతం సోషల్ మీడియాలో సంచలనం సృష్టిస్తున్నాయి. సెలవులకు సాధారణంగా అనారోగ్యం, కుటుంబ అత్యవసరాలు వంటి కారణాలు చెబుతారు. కానీ, ఇక్కడ ఒక ఉద్యోగి నేరుగా "నాకు బ్రేకప్ అయింది సర్, పనిపై దృష్టి పెట్టలేకపోతున్నాను, మానసిక బాధ నుంచి బయటపడటానికి కొద్ది రోజులు విరామం కావాలి" అంటూ సెలవు అడగడం అందరి దృష్టిని ఆకర్షించింది.
* అత్యంత నిజాయితీ గల లీవ్ రిక్వెస్ట్
ప్రేమలో వైఫల్యం తర్వాత కలిగే మానసిక వేదనను దాచుకోకుండా ఆ ఉద్యోగి నేరుగా తన బాస్కు ఈమెయిల్ ద్వారా తన పరిస్థితిని వివరించారు. "నాకు బ్రేకప్ అయింది. ఈ బాధ కారణంగా నేను పనిపై దృష్టి పెట్టలేకపోతున్నాను. దయచేసి నాకు సెలవు మంజూరు చేయండి," అని కోరారు.
ఈ సంఘటనను ఉద్యోగి రాసిన మెయిల్ను 'నాట్ డేటింగ్' ( అనే సంస్థ సీఈవో జస్వీర్ సింగ్ తన సోషల్ మీడియా ఖాతాలో పంచుకోవడంతో ఇది వైరల్గా మారింది.
* సీఈవో అద్భుతమైన స్పందన
సీఈవో జస్వీర్ సింగ్ ఈ రిక్వెస్ట్ను కేవలం చదివి వదిలేయకుండా, దానిపై సానుకూలంగా స్పందించారు. ఆయన దీనిని "తన కెరీర్లో చూసిన అత్యంత నిజాయితీ గల లీవ్ రిక్వెస్ట్"గా అభివర్ణించారు.
*ఆయన స్పందనలో
"ఈ తరం (Gen Z) తమ మనసులో ఉన్నదాన్ని దాచుకోకుండా, తమ భావోద్వేగాలు, మానసిక సమస్యలు అన్నీ స్పష్టంగా చెప్పగలుగుతున్నారు. ఇది చాలా మంచి మార్పు," అని ప్రశంసించారు. లీవ్ మంజూరు గురించి ఓ నెటిజన్ అడిగిన ప్రశ్నకు, "మెయిల్ చదివిన వెంటనే అప్రూవ్ చేశాను" అని నవ్వుతూ సమాధానం ఇచ్చారు. ఈ సీఈవో సానుభూతి, అవగాహనతో కూడిన స్పందన ఉద్యోగికి మానసిక ఉపశమనాన్ని ఇచ్చి ఉంటుంది అనడంలో సందేహం లేదు.
* మానసిక ఆరోగ్యానికి పెరుగుతున్న ప్రాధాన్యత
ఈ సంఘటన ఉద్యోగ వాతావరణంలో పెరుగుతున్న మార్పును సూచిస్తుంది. గతంలో, వ్యక్తిగత భావోద్వేగాలు లేదా మానసిక ఆరోగ్యాన్ని సెలవులకు కారణాలుగా చెప్పేవారు కాదు. కానీ ఇప్పుడు, యువతరం తమ మానసిక ఆరోగ్యం యొక్క ప్రాముఖ్యతను గుర్తించి, దానిని బహిరంగంగా, నిజాయితీగా వ్యక్తపరచడానికి వెనుకాడడం లేదు.
ఈ ఉద్యోగి నిజాయితీని, అలాగే దానిని అర్థం చేసుకున్న సీఈవో ఔదార్యాన్ని నెటిజన్లు బలంగా ప్రశంసిస్తున్నారు. "ఇలా అర్థం చేసుకునే బాస్లు అందరికీ ఉండాలి," "ఎంత నిజమైన మనసు," అంటూ కామెంట్లు పెడుతున్నారు.
ఈ చిన్న ఉదంతం, ఉద్యోగ ప్రదేశాల్లో భావోద్వేగాలను అంగీకరించడం.. మానసిక ఆరోగ్యానికి మద్దతు ఇవ్వడం అనే కొత్త సంస్కృతి వైపు సమాజం అడుగులు వేస్తోందని తెలియజేస్తోంది.