H4 EAD రద్దు రూమర్లు: నిజమెంత? భారతీయ కుటుంబాల్లో పెరుగుతున్న ఆందోళన

అమెరికాలో నివసిస్తున్న వేలాది మంది H1B వీసా హోల్డర్ల కుటుంబాలను ఇటీవల ఒక వదంతి తీవ్ర భయాందోళనలకు గురి చేస్తోంది. "వచ్చే నెలలోనే H4 EAD రద్దు అవుతుందట" అనే ఊహాగానాలు సోషల్ మీడియాలో విపరీతంగా ప్రచారం అవుతున్నాయి. Blind, Reddit వంటి ప్లాట్‌ఫారమ్‌లలో ఈ అంశంపై చర్చలు పెరగడంతో, ఆర్థిక భద్రతపై ఆశ పెట్టుకున్న అనేక కుటుంబాలు భవిష్యత్తుపై అనిశ్చితితో ఆందోళన చెందుతున్నాయి.

* ఏమిటీ H4 EAD? దాని ప్రాముఖ్యత ఏమిటి?

H4 EAD అనేది H1B వీసా హోల్డర్ల జీవిత భాగస్వాములకు అమెరికాలో చట్టబద్ధంగా పని చేసుకునేందుకు ఇచ్చే అనుమతి. 2015లో అప్పటి ఒబామా ప్రభుత్వం దీన్ని ప్రవేశపెట్టింది. ముఖ్యంగా గ్రీన్ కార్డ్ కోసం దరఖాస్తు చేసుకున్న H1B హోల్డర్ల జీవిత భాగస్వాములకు ఇది ఒక పెద్ద ఊరట. ఉద్యోగం ద్వారా ఆర్థికంగా నిలదొక్కుకునే అవకాశాన్ని కల్పించడంతో పాటు, కుటుంబాలకు ఆర్థిక భద్రతను కూడా ఇది అందిస్తోంది. ప్రస్తుతం ఐదు లక్షలకు పైగా కుటుంబాలకు ఇది జీవనాధారంగా నిలుస్తోంది.

*రూమర్లకు కారణాలు, వాస్తవాలు

అధికారిక ప్రకటన లేకపోయినా.. ఈ రూమర్లు ఎందుకు పుట్టుకొచ్చాయన్న దానిపై అనేక అంచనాలు ఉన్నాయి. గతంలో డోనాల్డ్ ట్రంప్ పరిపాలనలో H4 EAD రద్దుకు ప్రయత్నాలు జరిగాయి.. కానీ న్యాయపరమైన సవాళ్ల వల్ల ఆ ప్రయత్నాలు ముందుకు సాగలేదు. ప్రస్తుతం ఉన్న వదంతుల వెనుక కూడా DHS కొత్త నిబంధనలను తీసుకురావచ్చనే అనుమానాలున్నాయి.

అయితే ఇమ్మిగ్రేషన్ నిపుణులు ఈ రూమర్లను ఖండిస్తున్నారు. వారి అభిప్రాయం ప్రకారం.. ఒక చట్టాన్ని లేదా నిబంధనను రద్దు చేయాలంటే దానికి ఒక సుదీర్ఘమైన చట్టపరమైన ప్రక్రియ ఉంటుంది. దీనిలో భాగంగా ప్రభుత్వం ప్రజల నుంచి అభిప్రాయాలు సేకరించడం, న్యాయ పోరాటాలను ఎదుర్కోవడం వంటివి తప్పనిసరి. ఈ ప్రక్రియ పూర్తి కావడానికి చాలా ఏళ్లు పట్టే అవకాశం ఉంది. కాబట్టి "వచ్చే నెలలోనే రద్దు" అనే మాటలు నిరాధారమైనవి.

*గందరగోళానికి కారణం ఏమిటి?

H4 EAD రద్దుపై వస్తున్న వార్తల మధ్య ఇటీవల అమెరికా డిపార్ట్‌మెంట్ ఆఫ్ జస్టిస్ సుప్రీంకోర్టులో DHS అధికారాన్ని సమర్థించడం గందరగోళాన్ని మరింత పెంచింది. ఇది ఒకవైపు రద్దు రూమర్లు, మరోవైపు ప్రభుత్వం యొక్క వైఖరి మధ్య ఉన్న వైరుధ్యాన్ని సూచిస్తోంది. దీనితో H1B కుటుంబాలు మరింత ఆందోళన చెందుతున్నాయి.

*భవిష్యత్తుపై నిపుణుల అభిప్రాయం

అధికారికంగా ఎటువంటి సమాచారం లేనందున ప్రస్తుతానికి ఆందోళన చెందాల్సిన అవసరం లేదని ఇమ్మిగ్రేషన్ నిపుణులు సూచిస్తున్నారు. ఇప్పటివరకు H4 EAD రద్దుకు సంబంధించిన ఏ అధికారిక ప్రకటన కానీ.., నియంత్రణ ఫైలింగ్ కానీ జరగలేదు. ప్రభుత్వం తరపున అధికారిక ప్రకటన వచ్చేవరకు, కేవలం ఊహాగానాలతో భయపడటం సరికాదని వారు స్పష్టం చేస్తున్నారు.

అమెరికా ఇమ్మిగ్రేషన్ విధానాలలోని అస్థిరతే ఇలాంటి రూమర్లకు మూల కారణమని నిపుణులు అభిప్రాయపడుతున్నారు. ఈ అనిశ్చితి తొలగేవరకు H1B కుటుంబాలు ఆశతో, జాగ్రత్తతో ముందుకు సాగాల్సి ఉంటుంది. అధికారిక సమాచారం కోసం విశ్వసనీయమైన వనరులను మాత్రమే అనుసరించడం ఇప్పుడు అవసరం.