సడన్గా పడిపోయిన బంగారం, వెండి ధరలు.. కొనుగోలుకు ఇది సరైన సమయమా?

బంగారం కొనాలనుకునే వారికి ఇది నిజంగానే ఒక అదిరిపోయే గుడ్ న్యూస్. గత కొన్ని రోజులుగా ఆకాశాన్ని తాకుతూ ఊరిస్తున్న పసిడి ధరలు ఒక్కసారిగా భారీగా పడిపోయాయి. అంతర్జాతీయ మార్కెట్లో జరిగిన కొన్ని కీలక పరిణామాల వల్ల బంగారం, వెండి ధరలు ఊహించని రేంజ్‌లో పతనమయ్యాయి. కేవలం ఒక్క రోజులోనే వేలల్లో ధరలు తగ్గడంతో మధ్యతరగతి ప్రజలు, పెళ్లిళ్ల కోసం నగలు చేయించాలనుకునే వారు ఫుల్ ఖుషీ అవుతున్నారు. ఆ వివరాలు చూద్దాం..

ట్రంప్ సంతకంతో మారిన అంతర్జాతీయ మార్కెట్:

బంగారం ధరలు ఇలా ఒక్కసారిగా పడిపోవడానికి ప్రధాన కారణం ప్రపంచ రాజకీయాల్లో జరిగిన ఒక పెద్ద మార్పు. అమెరికా అధ్యక్షుడు డొనాల్డ్ ట్రంప్ ఒక కీలకమైన 'పీస్ డీల్' (శాంతి ఒప్పందం) పై సంతకం చేయడంతో అంతర్జాతీయ మార్కెట్లో ఒక్కసారిగా పరిస్థితులు మారిపోయాయి. ఇక దీని ప్రభావంతో ప్రపంచవ్యాప్తంగా ఇన్వెస్టర్లు బంగారంపై పెట్టుబడులు తగ్గించి ఇతర మార్కెట్ల వైపు చూడటంతో పసిడి ధరలు భారీగా పతనమయ్యాయి.

హైదరాబాద్‌లో భారీగా తగ్గిన పసిడి ధరలు:

ఈ అంతర్జాతీయ ప్రభావంతో హైదరాబాద్ బులియన్ మార్కెట్లో బంగారం ధరలు కుప్పకూలాయి. ఇవాళ 10 గ్రాముల 24 క్యారెట్ల గోల్డ్ రేటు ఏకంగా రూ.3,650 పతనమై రూ.1,45,860కి చేరింది. అలాగే ఆభరణాల తయారీకి వాడే 22 క్యారెట్ల పసిడి ధర కూడా రూ.3,350 తగ్గి రూ.1,33,700 పలుకుతోంది. నిన్నటితో పోలిస్తే ఈ తగ్గుదల కొనుగోలుదారులకు పెద్ద ఉపశమనం అని చెప్పాలి.

కేజీ వెండిపై ఏకంగా రూ.15 వేలు డౌన్:

కేవలం బంగారం మాత్రమే కాదు.. అటు వెండి కూడా కొనుగోలుదారులకు గట్టి షాక్ ఇస్తూ భారీగా తగ్గింది. కేజీ సిల్వర్ రేటు ఏకంగా రూ.15,000 తగ్గి ప్రస్తుతం రూ.2,55,000 గా పలుకుతోంది. అయితే తెలుగు రాష్ట్రాల్లోని వివిధ నగరాలు, ప్రాంతాలను బట్టి మేకింగ్ ఛార్జీలు, స్థానిక పన్నుల వల్ల ఈ ధరల్లో స్వల్ప మార్పులు ఉండే అవకాశం ఉంది.

గత కొంతకాలంగా కొండెక్కి కూర్చున్న బంగారం, వెండి ధరలు ఇలా సడన్‌గా దిగిరావడం నిజంగా గోల్డ్ లవర్స్‌కు మంచి ఛాన్స్. అయితే మార్కెట్ నిపుణుల ప్రకారం.. అంతర్జాతీయ పరిణామాల వల్ల ధరలు ఎప్పుడు ఎలా మారతాయో చెప్పలేం కాబట్టి, ఇప్పుడిప్పుడే నగలు కొనాలనుకునే వారికి లేదా పెట్టుబడి పెట్టాలనుకునే వారికి ఇది ఖచ్చితంగా సరైన సమయమే అని చెప్పవచ్చు.