Gen Z ఆటిట్యూడ్.. అట్లుంటదీ మరీ

ఇటీవల ఒక ప్రముఖ సాఫ్ట్‌వేర్ కంపెనీలో నిర్వహించిన ఉద్యోగ ఇంటర్వ్యూలో చోటుచేసుకున్న ఒక సంఘటన సోషల్ మీడియాలో చర్చనీయాంశమైంది. ఒక Gen Z అభ్యర్థి తన ఆత్మవిశ్వాసాన్ని ప్రదర్శిస్తూ “నేను ఈ కంపెనీలో చేరదలుచుకోలేదు. ఎందుకంటే నేను లీడ్ డెవలపర్ కంటే వెయ్యి రెట్లు మెరుగైనవాణ్ని” అంటూ స్పష్టం చేశాడు. ఈ సంఘటనతో టెక్ పరిశ్రమలో , సోషల్ మీడియాలో “Gen Z యాటిట్యూడ్” అనే పదం మళ్లీ తీవ్రమైన చర్చకు దారితీసింది. అయితే ఇది నిజంగా వాస్తవమా? లేక అపోహా? అనే ప్రశ్నలకు సమాధానాలు వెతుకుదాం.

Gen Z ప్రత్యేకతలు: మారుతున్న ఆలోచనా విధానం

1997 తర్వాత జన్మించిన వారిని Gen Z గా పరిగణిస్తారు. వీరు డిజిటల్ యుగంలో పెరిగినవారు. వీరు తమ ఆలోచనలు, ఆకాంక్షల పట్ల చాలా స్పష్టంగా ఉంటారు. పాత తరం ఉద్యోగులకు ఉన్న ‘కష్టపడితేనే ఫలితం’ అనే భావన కంటే ‘స్మార్ట్‌గా పని చేసి ఆనందించాలి’ అనే తత్వానికి వీరు ఎక్కువ ప్రాధాన్యం ఇస్తారు. వర్క్-లైఫ్ బాలెన్స్, పర్సనల్ స్పేస్, మానసిక ఆరోగ్యం వంటి అంశాలను కూడా వీరు చాలా ముఖ్యమైనవిగా భావిస్తారు.

వాస్తవం: ఆత్మవిశ్వాసం & క్లారిటీ

Gen Z లోని చాలా మంది తమ విలువను గుర్తించుకుంటారు. కంపెనీలకు తాము “cheap labour” కాదని, తమ నైపుణ్యాలకు తగ్గ గుర్తింపు.. వేతనం కావాలని నిర్మొహమాటంగా కోరుకుంటారు. ఈ ధైర్యం వారికి ఉన్న ప్రధానమైన బలం. తాము పనిచేసే కంపెనీలో రెడ్ ఫ్లాగ్స్ అంటే ఉదాహరణకు, అధిక పనిభారం, అవమానకరమైన పని వాతావరణం, తక్కువ జీతం ఉంటే వాటిని గుర్తించి, అటువంటి పని వాతావరణానికి “నో” చెప్పగలరు. ఇది వారి ఆత్మవిశ్వాసం, తమ విలువను నిలబెట్టుకునే తత్వం.

అపోహ: అహంకారం & అప్రొఫెషనలిజం

కొన్నిసార్లు పై సంఘటన వంటి వ్యక్తిగత ఉదాహరణలను చూసి Gen Z అందరూ అహంకారంతో అప్రొఫెషనల్‌గా ప్రవర్తిస్తారనే భావన చాలామందిలో ఉంటుంది. కానీ ఇది నిజం కాదు. ప్రతీ తరం లోనూ అహంకారంతో ప్రవర్తించే వారు ఉంటారు. ఒక్కోసారి సోషల్ మీడియాలో హైలైట్ అయ్యే ఒకటి లేదా రెండు సంఘటనల వల్ల మొత్తం తరం మీద తప్పుడు అభిప్రాయాలు ఏర్పడతాయి. వ్యక్తిగత వైఖరులను మొత్తం తరం యొక్క ప్రవర్తనగా భావించడం సరైనది కాదు.

సంస్థల దృష్టిలో కీలకమైన నైపుణ్యాలు

నేటి రిక్రూటర్లకు కేవలం టెక్నికల్ స్కిల్స్ మాత్రమే కాకుండా, అభ్యర్థి యొక్క వైఖరి (ఆటిట్యూడ్ ) కూడా చాలా ముఖ్యం. “Team player”గా పనిచేయగలగడం, వినయం, ప్రొఫెషనలిజం వంటివి ఉద్యోగి విలువను పెంచుతాయి. ఎంత మంచి కాలేజీ నుంచి చదివినా, ఎంత నైపుణ్యం ఉన్నా, అహంకారంతో కూడిన ప్రతిస్పందనలు, అసభ్యకరమైన సంభాషణలు ఆ అభ్యర్థిని ఎంపిక కాకుండా వెనక్కు నెడతాయి.

సమతుల్యం: ఆత్మవిశ్వాసం + వినయం

Gen Z కి ఉన్న ఆత్మవిశ్వాసం, తమ హక్కుల కోసం పోరాడే తత్వం, పాత పద్ధతులను ప్రశ్నించే వైఖరి అభినందనీయమైనవి. కానీ అదే సమయంలో, ప్రొఫెషనల్ కమ్యూనికేషన్, వినయం కూడా అవసరం. ఆత్మవిశ్వాసం, ప్రొఫెషనలిజం సమతుల్యంగా ఉన్నప్పుడే కెరీర్లో వృద్ధి ఉంటుంది. ఆత్మవిశ్వాసం అహంకారంగా మారితే అది కెరీర్‌కు అడ్డంకి అవుతుంది.

“Gen Z attitude” అనేది పూర్తిగా వాస్తవం కాదు, పూర్తిగా అపోహ కూడా కాదు. ఇందులో కొంత సత్యం ఉంది. కొంత అతిశయోక్తి ఉంది. నిజానికి ప్రతి తరం లోనూ మంచి, చెడు వైఖరులు కలగలిపి ఉంటాయి. కానీ భవిష్యత్తులో విజయవంతమైన వృత్తిజీవితానికి అవసరమయ్యేది ఒక సమతుల్య దృక్పథం. నైపుణ్యం, ఆత్మవిశ్వాసం, వినయం , ప్రొఫెషనలిజం. జెన్-Z ఉద్యోగులు ఈ నైపుణ్యాలను అలవర్చుకుంటే వారు మరింత విజయవంతమవుతారు.