వెలుగులోకి హైదరాబాద్‌లో రూ.15,000 కోట్ల భారీ భూకుంభకోణం

హైదరాబాద్‌లో భూ మాఫియా ఏ స్థాయికి చేరిందో మరోసారి రుజువు చేస్తూ.. గాజులరామారం ప్రాంతంలో రూ.15,000 కోట్ల విలువైన భారీ భూకుంభకోణం వెలుగులోకి వచ్చింది. హైదరాబాద్ డిజాస్టర్ మేనేజ్‌మెంట్ అండ్ అసెట్ ప్రొటెక్షన్ ఏజెన్సీ (HYDRAA) చేపట్టిన విస్తృత స్థాయి కూల్చివేత చర్యల ద్వారా ఈ కుంభకోణం బట్టబయలైంది. గాజులరామారం పరిధిలోని సుమారు 300 ఎకరాల ప్రభుత్వ భూమిలో 100 ఎకరాలకు పైగా భూమి కబ్జాకు గురైనట్లు అధికారులు గుర్తించారు.

వందల ఎకరాల ప్రభుత్వ భూమి కబ్జా

అధికారుల సమాచారం ప్రకారం.. కబ్జా చేయబడిన భూమిలో వేల సంఖ్యలో చిన్న చిన్న ఇళ్లను నిర్మించి, అక్రమంగా విక్రయించారు. ఒక్కో ఇల్లు 60-70 గజాల విస్తీర్ణంలో నిర్మించి, సుమారు రూ.10 లక్షలకు పైగా ధరలకు విక్రయించినట్లు తెలుస్తోంది. ఈ భూమి ప్రస్తుత మార్కెట్ విలువ ఎకరానికి రూ.40-50 లక్షలుగా అధికారులు అంచనా వేశారు. ఈ లెక్కన మొత్తం కబ్జాకు గురైన 100 ఎకరాల భూమి విలువ సుమారు రూ.15,000 కోట్లకు పైగా ఉంటుందని నిపుణులు అంచనా వేస్తున్నారు.

పౌరుల నిరసన.. కూల్చివేత చర్యలు

HYDRAA అధికారులు ఆదివారం ఉదయం నుంచే గాజులరామారం ప్రాంతంలో అక్రమ నిర్మాణాల కూల్చివేత చర్యలను ప్రారంభించారు. దీనిపై స్థానికులు తీవ్రంగా ఆందోళన వ్యక్తం చేశారు. తాము ఏ మాత్రం తెలియకుండానే ఈ భూములను నమ్మకంతో కొనుగోలు చేశామని, తమను మోసం చేసిన రియల్ ఎస్టేట్ దళారులపై, భూ మాఫియాపై కఠిన చర్యలు తీసుకోవాలని వారు డిమాండ్ చేశారు. నిరసనకారులను శాంతపరిచి, చట్ట ప్రకారం చర్యలు తీసుకుంటామని అధికారులు హామీ ఇచ్చారు.

సంవత్సరాల నిర్లక్ష్యం.. కబ్జాకు దారి

ఈ భూమి మొదట స్టేట్ ఫైనాన్స్ కార్పొరేషన్, తెలంగాణ స్టేట్ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్ (TSIIC), హైదరాబాద్ మెట్రోపాలిటన్ డెవలప్‌మెంట్ అథారిటీ (HMDA), హౌసింగ్ బోర్డు వంటి ప్రభుత్వ సంస్థలకు కేటాయించబడింది. అయితే ఈ భూమిని సంవత్సరాల తరబడి ఉపయోగించకపోవడంతో అది భూ కబ్జాదారుల పాలిట వరంగా మారింది. క్రమంగా అక్రమ ఆక్రమణలు పెరిగిపోయాయి. ఇప్పటికే కొంత భూమిలో శాశ్వత నిర్మాణాలు సైతం జరిగాయని HYDRAA గుర్తించింది.

ప్రభుత్వ భూమికి రక్షణ చర్యలు

కూల్చివేత తర్వాత స్వాధీనం చేసుకున్న భూమికి వెంటనే కంచె వేసి, భద్రతా చర్యలు చేపడతామని అధికారులు స్పష్టం చేశారు. భవిష్యత్తులో ఇటువంటి సంఘటనలు పునరావృతం కాకుండా, ప్రభుత్వ ఆస్తులను రక్షించడానికి కఠినమైన చర్యలు తీసుకుంటామని వారు తెలిపారు.

ఈ భారీ కుంభకోణంపై పూర్తిస్థాయిలో విచారణ జరిపి, అసలు దోషులను పట్టుకోవాలని సామాజిక కార్యకర్తలు.. ప్రజలు డిమాండ్ చేస్తున్నారు. ప్రభుత్వం ఈ అంశాన్ని సీరియస్‌గా తీసుకుని, కబ్జాదారులపై, అక్రమ వ్యాపారాలపై కఠినమైన నిబంధనలు తీసుకురావాలని కోరుతున్నారు. హైదరాబాద్‌లో భూ మాఫియా ఎంత భయంకరమైన స్థాయిలో విస్తరించి ఉందో ఈ సంఘటన మరోసారి చాటి చెప్పింది.