క్యాబ్ డ్రైవర్‌ నుంచి కోటీశ్వరుడిగా.. అమెరికాలో భారతీయుడి అద్భుత ప్రయాణం

సాధారణంగా మొదలైన జీవితాన్ని అసాధారణ విజయ శిఖరాలకు చేర్చిన మనీ సింగ్‌ కథ ఎందరికో స్ఫూర్తిదాయకం. పంజాబ్‌ నుంచి అమెరికాకు వలస వెళ్లిన ఈ యువకుడు.. నెలకు కేవలం కొన్ని వందల డాలర్ల సంపాదన నుంచి ప్రస్తుతం ఏటా 2 మిలియన్‌ డాలర్లు (సుమారు ₹17 కోట్లు) టర్నోవర్‌ కలిగిన రెండు విజయవంతమైన వ్యాపారాలను నడుపుతున్నాడు.

* కష్టాల నుంచి మొదలు

మనీ సింగ్‌ 2006లో కేవలం 19 ఏళ్ల వయసులో పంజాబ్‌ను విడిచి అమెరికాలోని సాన్‌ఫ్రాన్సిస్కోకు వెళ్లారు. కొత్త దేశం, సంస్కృతి, భాష... ఈ మార్పుల మధ్య ఆయన తీవ్ర ఒంటరితనం, డిప్రెషన్‌ అనుభవించారు. "తిరిగి భారత్‌కు రావాలనిపించింది" అని ఆయన ఆనాటి కష్టాలను గుర్తు చేసుకున్నారు.

అమెరికాలో తన కాలేజీ డిగ్రీకి గుర్తింపు లభించకపోవడంతో చదువు ఆగిపోయింది. తల్లి సలహా మేరకు చిన్న పనులు చేయడం ప్రారంభించారు. మొదట డ్రగ్‌స్టోర్‌లో, ఆ తర్వాత తన మామగారి క్యాబ్ కంపెనీలో డిస్పాచర్‌గా గంటకు $6 వేతనంతో పనిచేశారు.

* క్యాబ్ వ్యాపారం నుంచి ATCS Platform Solutions వరకు

డిస్పాచర్‌గా అనుభవం సంపాదించిన తర్వాత, మనీ సింగ్‌ స్వయంగా టాక్సీ నడపడం ప్రారంభించారు. క్రమంగా ఐదు క్యాబ్‌లను కలిగి ఉన్న చిన్న వ్యాపారాన్ని ఏర్పాటు చేశారు. ఈ అనుభవమే ఆయనకు “Driver’s Network” అనే స్వంత సంస్థను స్థాపించడానికి ప్రేరణనిచ్చింది. ఈ సంస్థే ఇప్పుడు ATCS Platform Solutionsగా మారి, స్వతంత్ర డ్రైవర్లకు మార్కెటింగ్‌, అడ్వర్టైజింగ్‌ సేవలను అందిస్తోంది.

* బార్బర్‌ షాప్‌ మలుపు: దండీస్ బార్బర్ షాప్

2019లో తల్లి సలూన్ వ్యాపారం నుంచి స్ఫూర్తి పొందిన మనీ సింగ్‌, మౌంటేన్ వ్యూ లో “Dandies Barbershop & Beard Stylist”ను ప్రారంభించాలని నిర్ణయించుకున్నారు. అయితే, ఈ కొత్త వ్యాపారంలో అనుభవం లేకపోవడం, అనుమతులు, లైసెన్స్‌ల కోసం ఒక సంవత్సరం సమయం, భారీ ఖర్చుతో పాటు, ప్రారంభించిన ఆరు నెలలకే కోవిడ్‌ మహమ్మారి రావడంతో షాప్‌ మూసివేయాల్సి వచ్చింది.

* త్యాగం, దృఢ సంకల్పం

వ్యాపారాన్ని నిలబెట్టుకోవడానికి మనీ సింగ్‌ భారీ త్యాగాలు చేయాల్సి వచ్చింది. బిజినెస్‌ అప్పులు తీర్చడానికి లైఫ్‌ ఇన్స్యూరెన్స్‌ నుంచి డబ్బు తీసుకుని, స్టాక్‌ పోర్ట్‌ఫోలియోను అమ్మి, రోజుకు కేవలం $1 విలువైన ఆహారం మాత్రమే తినేవాడట. "బిజినెస్‌ బతికించేందుకు అన్నీ త్యాగం చేశాను," అని ఆయన గుర్తు చేసుకున్నారు. ఈ క్లిష్ట సమయంలోనే మనీ సింగ్‌ బార్బర్‌ స్కూల్‌లో చేరి కట్‌, స్టైలింగ్‌ నేర్చుకుని తన నైపుణ్యాలను మెరుగుపరుచుకున్నారు.

* రెండు విజయవంతమైన వ్యాపారాలు

ఆయన పట్టుదల, శ్రమ ఫలించాయి. ఇప్పుడు Dandies Barbershop & Beard Stylist ఈ షాప్ ప్రస్తుతం మూడు బ్రాంచ్‌లను కలిగి, 25 మందికి ఉపాధి కల్పిస్తోంది. గత సంవత్సరం ఇది $1.07 మిలియన్‌ టర్నోవర్‌ సాధించింది.

ATCS Platform Solutions సంస్థ $1.18 మిలియన్‌ రాబడిని తెచ్చింది. రెండు వ్యాపారాలు లాభాల్లో నడుస్తూ, అప్పులన్నీ తీరిపోయాయి.

*శ్రమను ఆస్వాదించడం

పంజాబ్‌లో బాల్యంలో చూసిన హింస, అస్థిరతలే తనకు కష్టపడే అలవాటు నేర్పాయని మనీ సింగ్‌ చెబుతారు. "నేను రోజుకు 15–16 గంటలు పనిచేస్తాను. రిటైర్‌ అవ్వాలనుకోవడం లేదు. పని చేయడం నా ఊపిరి లాంటిది," అని ఆయన చెబుతున్నారు.

ప్రస్తుతం ఆయన బార్బర్‌ అపాయింట్‌మెంట్‌ల బుకింగ్‌ కోసం ప్రత్యేకంగా రూపొందించబడుతున్న “Barber’s Network” యాప్‌ అనే కొత్త ప్రాజెక్ట్‌పై దృష్టి సారించారు.

క్యాబ్ డ్రైవర్‌గా మొదలై, అప్పులు, కష్టాలను ఎదుర్కొని, దృఢ సంకల్పంతో కోటీశ్వరుడిగా ఎదిగిన మనీ సింగ్‌ ప్రయాణం, ప్రవాస భారతీయుల పట్టుదలకు, విజయానికి నిదర్శనం.