ఎఫ్35లో లోపం.. 50 నిమిషాలు సంభాషణ.. విసిగి కూల్చేసిన పైలెట్

అమెరికా ఎయిర్‌ఫోర్స్‌కు చెందిన అత్యాధునిక F-35 యుద్ధవిమానంలో సాంకేతిక లోపం తలెత్తడంతో ఓ పైలట్ చివరికి విమానం నుంచి ఎజెక్ట్ కావాల్సి వచ్చింది. ఈ ఘటన అలాస్కాలోని ఎయెల్సన్ ఎయిర్‌ఫోర్స్ బేస్‌లో జరిగింది. ప్రమాదానికి సంబంధించిన పూర్తి నివేదిక తాజాగా వెలువడగా దానిలో అసాధారణ వివరాలు వెలుగులోకి వచ్చాయి.

- ప్రమాదానికి కారణాలు

జనవరి 28న టేకాఫ్ చేసిన తర్వాత, పైలట్ ల్యాండింగ్ గేర్‌ను వెనక్కి తీసుకోవడానికి ప్రయత్నించగా అది విఫలమైంది. విమానాన్ని తిరిగి దించే ప్రయత్నంలో నోస్ గేర్ (ముందు చక్రం) ఒక వైపు లాక్ అయిపోయింది. ఈ సమస్యను పరిష్కరించేందుకు పైలట్ గాల్లో ఉండగానే లాక్‌హీడ్ మార్టిన్‌కు చెందిన ఐదుగురు ఇంజనీర్లతో ఏకంగా 50 నిమిషాలు ఫోన్ కాల్‌లో మాట్లాడాడు.

అనంతరం రెండు సార్లు "టచ్ అండ్ గో" ల్యాండింగ్స్ నేలను తాకి మళ్లీ గాల్లోకి ఎగరడం ప్రయత్నించినా సమస్య పరిష్కారం కాలేదు. దీనికి కారణం, విమానంలోని హైడ్రాలిక్ సిస్టమ్ ఘనీభవించిపోవడమే. ఫలితంగా విమానంలోని సెన్సార్లు అది నేల మీద ఉందని తప్పుగా గుర్తించాయి. ఈ పరిస్థితిలో విమానంపై నియంత్రణ కోల్పోయిన పైలట్ కుప్పకూలే ముందు విజయవంతంగా ప్యారా చూట్ సాయంతో బయటపడి ఎజెక్ట్ అయ్యాడు.

-ఘనీభవించిన హైడ్రాలిక్ ద్రవం

ప్రమాదం తర్వాత జరిగిన పరిశీలనలో విమానం యొక్క హైడ్రాలిక్ సిస్టమ్‌లో దాదాపు మూడో వంతు నీరు కలిసిపోయినట్లు తేలింది. ఆ రోజు అక్కడ ఉష్ణోగ్రత -18°C ఉండటంతో, ఈ నీరు మంచుగా మారి హైడ్రాలిక్ లైన్లను మూసివేసింది. ఇలాంటి సమస్య మరో విమానంలో కూడా తలెత్తినప్పటికీ, అది సురక్షితంగా ల్యాండ్ అయింది.

ఎయిర్‌ఫోర్స్ యాక్సిడెంట్ ఇన్వెస్టిగేషన్ బోర్డు నివేదిక ప్రకారం, ఈ ప్రమాదానికి పలు కారణాలు ఉన్నాయని తెలిపారు. పైలట్, ఇంజనీర్ల నిర్ణయాల్లో లోపాలు కనిపెట్టారు. హైడ్రాలిక్ ద్రవాల నిల్వ పంపిణీలో నిర్లక్ష్యం వహించారు. విమాన సర్వీసింగ్ సమయంలో నిబంధనలను పాటించకపోవడం ప్రధాన లోపంగా మారింది.

ఈ నివేదిక ఒక కీలకమైన సాంకేతిక వ్యవస్థలో ఏర్పడిన చిన్న లోపం ఎంత పెద్ద ప్రమాదానికి దారితీసిందో స్పష్టం చేసింది. ఈ ఘటన, భద్రతా ప్రమాణాలను మెరుగుపరచాల్సిన ఆవశ్యకతను నొక్కి చెప్పింది.