నార్తర్న్ వర్జీనియాలో ICE దాడులు : విదేశీ విద్యార్థుల నియామకాల్లో మోసం

అమెరికాలోని ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) సంస్థ తాజాగా నార్తర్న్ వర్జీనియాలో ఉన్న అనేక ఐటీ కంపెనీలపై ఆకస్మిక దాడులు నిర్వహించి, విదేశీ విద్యార్థుల నియామకాలపై కీలక దర్యాప్తు చేపట్టింది. ముఖ్యంగా F-1 వీసాపై ఉన్న విద్యార్థులను ఉద్యోగులుగా నియమించుకున్న యజమానులు అమెరికా చట్టాలను OPT (ఆప్షనల్ ప్రాక్టికల్ ట్రైనింగ్ ) కార్యక్రమ నియమావళిని సక్రమంగా పాటిస్తున్నారా లేదా అన్నది ఈ దర్యాప్తులో ప్రధాన ఉద్దేశ్యంగా ఉంది.

* మోసాలు వెలుగులోకి: పత్రాలపైనే కంపెనీలు!

ఈ పరిశీలనల్లో భాగంగా ICE అధికారులు పలు ఐటీ సేవల సంస్థల్లో తీవ్రమైన నిబంధనల ఉల్లంఘనలను గుర్తించారు. అనేక కంపెనీలు కేవలం పత్రాలపైనే ఉన్నట్లు, వాస్తవానికి అక్కడ పనులు ఏవీ జరగకపోయినప్పటికీ విదేశీ విద్యార్థులను ఉద్యోగులుగా చూపిస్తున్నట్లు తేలింది. వీటిని నకిలీ పనిస్థలాలుగా అధికారులు పేర్కొన్నారు.

మరింత ఆశ్చర్యకరమైన విషయం ఏమిటంటే.., దర్యాప్తు చేసిన అధికారులకు వర్జీనియా సబర్బ్స్‌లోని ఒక నివాస గృహమే కంపెనీ ప్రధాన కార్యాలయమని, అందులో డజన్ల కొద్దీ OPT విద్యార్థులు పనిచేస్తున్నారని తెలిపిన సంఘటన బయటపడింది. ఇది స్పష్టమైన మోసపూరిత చర్యగా ICE గుర్తించింది.

* ICE హెచ్చరిక: "మోసగాళ్లకు చోటు లేదు"

ఈ దాడుల నేపథ్యంలో ICE యాక్టింగ్ డైరెక్టర్ టాడ్ ఎం. లియన్స్ గట్టి హెచ్చరిక జారీ చేశారు. “స్టూడెంట్ అండ్ ఎక్స్చేంజ్ విజిటర్ ప్రోగ్రాం సమగ్రతను కాపాడడంలో ICE కట్టుబడి ఉంది. ఈ వ్యవస్థను దుర్వినియోగం చేసే వ్యక్తులకు ఇందులో స్థానం లేదు. మోసపూరిత చర్యల్లో పాల్గొన్న వారిపై కఠిన చర్యలు తీసుకుంటాం” అని ఆయన స్పష్టం చేశారు.

ICE అధికారులు ఈ సైట్‌ సందర్శనల ద్వారా OPT నియామకాల్లో చట్టపరమైన అనుసరణ జరుగుతోందో లేదో క్షుణ్ణంగా పరిశీలిస్తామని, భవిష్యత్తులో కూడా ఇలాంటి మోసపూరిత చర్యలపై మరింత కఠిన చర్యలు తీసుకుంటామని హెచ్చరించారు.

* OPT కార్యక్రమంపై ఆందోళనలు

విదేశీ విద్యార్థులు తమ విద్య పూర్తి చేసిన తర్వాత అమెరికాలో కొంత కాలం పనిచేయడానికి అనుమతించే OPT ప్రోగ్రామ్ ప్రారంభమైనప్పటి నుంచీ దీనిపై ఆందోళనలు వ్యక్తమవుతూనే ఉన్నాయి. అమెరికా కాంగ్రెస్‌, భద్రతా సంస్థలు, వాచ్‌డాగ్ ఏజెన్సీలు దీనిపై ప్రధానంగా విమర్శలు చేస్తున్నాయి.

మోసపూరిత నియామకాలు: చట్టాన్ని దుర్వినియోగం చేయడం.

అమెరికన్ కార్మికులకు ఉద్యోగాలు తగ్గడం: స్థానిక ఉద్యోగ అవకాశాలపై ప్రభావం.

భద్రతా ప్రమాదాలు: వలస వ్యవస్థలో లోపాల కారణంగా తలెత్తే సమస్యలు.

ఈ దాడులు విదేశీ విద్యార్థులను నియమించుకునే కంపెనీలకు, అలాగే ఆ ప్రోగ్రామ్ ద్వారా పనిచేస్తున్న విద్యార్థులకు చట్టపరమైన అనుసరణ యొక్క ప్రాముఖ్యతను మరోసారి గుర్తు చేశాయి.