ఎలోన్ మస్క్ బంపర్ ఆఫర్: 'X'లో ఒక ఆర్టికల్ రాస్తే రూ. 9 కోట్ల భారీ బహుమతి!

కంటెంట్ క్రియేటర్లకు కాసుల వర్షం కురిపించేందుకు సిద్ధమైన టెక్ దిగ్గజం. అయితే ఈ పోటీలో గెలవాలంటే కొన్ని కఠినమైన షరతులు పాటించాల్సిందే. ప్రపంచ కుబేరుడు ఎక్స్ అధినేత ఎలోన్ మస్క్ మరోసారి వార్తల్లో నిలిచారు. ప్లాట్‌ఫామ్‌పై నాణ్యమైన కంటెంట్‌ను పెంచేందుకు ఆయన ఏకంగా $1 మిలియన్ (సుమారు ₹9 కోట్లు) బహుమతిని ప్రకటించారు. సోషల్ మీడియా చరిత్రలోనే ఒకే ఒక్క ఆర్టికల్‌కు ఇంత భారీ మొత్తం అందించడం ఇదే తొలిసారి.

పోటీ నిబంధనలు ఇవే

ఈ భారీ బహుమతిని సొంతం చేసుకోవడం అంత సులభం కాదు. మస్క్ ఈ పోటీ కోసం చాలా స్పష్టమైన నియమాలను విధించారు. ఆర్టికల్ కనీసం 1,000 పదాలకు తగ్గకుండా ఉండాలి. కేవలం చిన్న పోస్టులు కాకుండా లోతైన విశ్లేషణతో కూడిన రచనలకు మాత్రమే ప్రాధాన్యత ఉంటుంది. ప్రస్తుత కాలంలో ఏఐ సాయంతో కంటెంట్ సృష్టించడం పెరిగిపోయింది. కానీ, ఈ పోటీలో పాల్గొనే ఆర్టికల్ పూర్తిగా మానవ మేధస్సుతో రాసి ఉండాలి. ఏఐ టూల్స్ వాడినట్లు తేలితే సదరు యూజర్ అనర్హుడిగా ప్రకటించబడతారు. కంటెంట్ ఎక్కడా కాపీ చేయకుండా, పూర్తిగా రచయిత స్వంత ఆలోచనలతో కూడి ఉండాలి.

ఎవరికి ఈ అవకాశం?

ప్రస్తుతానికి ఈ పోటీ కేవలం అమెరికాలోని 'ఎక్స్' ప్రీమియం సబ్‌స్క్రైబర్లకు మాత్రమే అందుబాటులో ఉంది. ఈ పోటీకి దరఖాస్తు చేసుకోవడానికి జనవరి 28 ఆఖరి తేదీ. ఈ పరిమితి వల్ల భారతీయ క్రియేటర్లతో పాటు ఇతర దేశాల రచయితలు కొంత నిరాశకు గురైనప్పటికీ భవిష్యత్తులో గ్లోబల్ స్థాయిలో ఇలాంటి పోటీలు నిర్వహిస్తామని మస్క్ హింట్ ఇచ్చారు.

మస్క్ అసలు లక్ష్యం ఏంటి?

ట్విట్టర్‌ను 'ఎక్స్'గా మార్చినప్పటి నుండి మస్క్ దానిని కేవలం ఒక మైక్రో బ్లాగింగ్ సైట్‌గా కాకుండా ఒక 'ఎవ్రీథింగ్ యాప్'గా మార్చాలని ప్రయత్నిస్తున్నారు. స్వతంత్ర జర్నలిస్టులను లోతైన విశ్లేషణలు చేసే మేధావులను ప్లాట్‌ఫామ్ వైపు ఆకర్షించడం ప్రధాన ఉద్దేశం. నాణ్యమైన కంటెంట్ ఉంటే యూజర్లు ఎక్కువ సమయం యాప్‌లో గడుపుతారు, తద్వారా ప్లాట్‌ఫామ్ విలువ పెరుగుతుందన్నది మస్క్ ప్లాన్.. టెక్నాలజీ రంగంలో ఉన్నప్పటికీ మానవ సృజనాత్మకతకు ఉన్న విలువను చాటిచెప్పడం మస్క్ ఉద్దేశంగా కనిపిస్తోంది.

ఈ ₹9 కోట్ల ఆఫర్ సోషల్ మీడియా రంగంలో కొత్త ట్రెండ్‌కు తెరలేపింది. యూట్యూబ్, ఇన్‌స్టాగ్రామ్ వంటి సంస్థలు వీడియో క్రియేటర్లకు ప్రాధాన్యత ఇస్తుంటే మస్క్ మాత్రం 'రాత' కు మళ్ళీ పూర్వ వైభవం తీసుకురావాలని చూస్తున్నారు. జనవరి 28 తర్వాత ఆ అదృష్టవంతుడైన రచయిత ఎవరో ఆ ఆర్టికల్ ఏ అంశంపై ఉంటుందో అని ప్రపంచమంతా ఆసక్తిగా ఎదురుచూస్తోంది.