వైర్డ్, వైర్‌లెస్ కాదు… ఇవే బెస్ట్ ఇయర్‌ఫోన్స్ అంటున్న డాక్టర్లు

ఈ రోజుల్లో ఉదయం లేచినప్పటి నుంచి రాత్రి పడుకునే వరకు చేతిలో ఫోన్, చెవుల్లో ఇయర్‌ఫోన్స్ ఉండటం సర్వసాధారణం అయిపోయింది. పాటలు వినాలన్నా, ఆఫీస్ కాల్స్ మాట్లాడాలన్నా, సినిమాలు చూడాలన్నా ఇయర్‌ఫోన్స్ లేకపోతే గడవదు. అయితే మనం నిత్యం వాడే ఈ అలవాటు మన చెవులను తీవ్రంగా దెబ్బతీస్తోందని ఈఎన్‌టీ నిపుణులు హెచ్చరిస్తున్నారు. వైర్డ్, వైర్‌లెస్ బడ్స్ వాడటం కంటే మెరుగైన ప్రత్యామ్నాయాలు ఉన్నాయని చెబుతున్నారు. అవేంటో ఇప్పుడు వివరంగా తెలుసుకుందాం.

వైర్డ్, వైర్‌లెస్ ఇయర్‌ఫోన్స్‌తో ప్రమాదం ఏంటి?:

మనం రోజూ వాడే వైర్డ్ ఇయర్‌ఫోన్స్ వల్ల చెవి లోపల గాలి ఆడక తేమ చేరి ఫంగల్ ఇన్ఫెక్షన్లు వచ్చే అవకాశం చాలా ఎక్కువ. ఇక వైర్‌లెస్ బడ్స్ అయితే చెవి రంధ్రం లోపలికి బాగా దూరిపోతాయి. వీటిని గంటల తరబడి వాడటం వల్ల లోపల చెమట పట్టి బ్యాక్టీరియా వేగంగా పెరుగుతుంది. ఇవి లోపలి భాగాన్ని నొక్కివేసి, వినికిడి శక్తిపై నెమ్మదిగా తీవ్రమైన ప్రభావం చూపిస్తాయి.

డాక్టర్లు సూచిస్తున్న బెస్ట్ ఆప్షన్లు ఇవే:

ఈఎన్‌టీ సర్జన్ల ప్రకారం చెవులకు తక్కువ హాని చేసేవి 'ఓవర్-ది-ఇయర్ హెడ్‌ఫోన్స్' మరియు 'బోన్ కండక్షన్ ఇయర్‌ఫోన్స్' ఓవర్-ది-ఇయర్ హెడ్‌ఫోన్స్ చెవి బయట భాగంలో కూర్చుంటాయి కాబట్టి లోపలికి గాలి బాగా అందుతుంది. ఇక బోన్ కండక్షన్ హెడ్‌ఫోన్స్ అసలు చెవి రంధ్రంలోకి వెళ్లకుండా, దవడ ఎముకల కంపనాల ద్వారా శబ్ద తరంగాలను లోపలికి పంపుతాయి. అందుకే వైద్యులు వీటికే ఎక్కువ రేటింగ్ ఇస్తున్నారు.

ఏవి వాడినా ఈ జాగ్రత్తలు తప్పనిసరి:

ఏ మోడల్ ఇయర్‌ఫోన్స్ ఎంచుకున్నా సరే, పరిమితికి మించి వాడటం ఎప్పుడూ ప్రమాదకరమే. ప్రతి 40 నుంచి 50 నిమిషాల వాడకం తర్వాత చెవులకు కాసేపు విశ్రాంతి ఇవ్వడం అలవాటు చేసుకోవాలి. అలాగే సౌండ్ వాల్యూమ్ ఎప్పుడూ 60 శాతానికి మించకుండా చూసుకోవాలి. ఇక మీ ఇయర్‌ఫోన్స్‌ను ఇతరులతో పంచుకోకపోవడం ఇన్ఫెక్షన్ల నివారణకు మంచిది.

సంగీతం వినడం లేదా ఆఫీస్ పనులు చేసుకోవడం ముఖ్యమే అయినప్పటికీ, మన చెవుల ఆరోగ్యం అంతకంటే ముఖ్యం. ఇక రోజూ వాడే బడ్స్, వైర్డ్ ఇయర్‌ఫోన్ల స్థానంలో ఓవర్-ది-ఇయర్ లేదా బోన్ కండక్షన్ పరికరాలను వాడటం శ్రేయస్కరం. సరైన ఇయర్‌ఫోన్ ఎంచుకుంటూ, పరిమిత సమయం మాత్రమే వాడుతూ వినికిడి శక్తిని సురక్షితంగా కాపాడుకోండి.