వావ్ విజువల్ ట్రీట్… ఆకాశంలో డబుల్ బొనాంజా షో వైరల్!

అనంత ఆకాశంలో మరో అద్భుత దృశ్యం కనువిందు చేయబోతోంది. నిశ్శబ్దంగా ఉండే రాత్రివేళ ఆకాశంలో ఒక్క ఉల్కాపాతం కనిపిస్తేనే మనం ఎంతో సంబరపడతాం. అలాంటిది ఒకేసారి రెండు వేర్వేరు ఉల్కాపాతాలు ఆకాశంలో కాంతి రేఖలను కురిపిస్తూ విజువల్ ట్రీట్ ఇవ్వబోతున్నాయి! జూలై 30, 31 తేదీల రాత్రి వేళల్లో 'సదరన్ డెల్టా అక్వారిడ్స్', 'ఆల్ఫా క్యాప్రికార్నిడ్స్' కలిసి డబుల్ మెటీయోర్ షోతో నక్షత్ర ప్రేమికులకు మధురానుభూతిని అందించడానికి సిద్ధమయ్యాయి.

ఆకాశంలో ఒకేసారి జంట ఉల్కాపాతాలు:

సాధారణంగా ప్రతి ఏటా జూలై, ఆగస్టు నెలల్లో ఉల్కాపాతాలు జరుగుతుంటాయి. కానీ ఈసారి ప్రత్యేకత ఏంటంటే.. సదరన్ డెల్టా అక్వారిడ్స్ మరియు ఆల్ఫా క్యాప్రికార్నిడ్స్ అని పిలిచే రెండు రకాల ఉల్కాపాతాలు ఒకే సమయంలో గరిష్ట స్థాయికి చేరుకుంటున్నాయి. ఇక రాత్రి మొదలుకుని తెల్లవారుజాము వరకు ఆకాశంలో రాకెట్లలా రివ్వుమంటూ రంగురంగుల వెలుగులు దూసుకెళ్తూ కన్నుల పండుగ చేయబోతున్నాయి.

పౌర్ణమి వెన్నెలతో కాస్త సవాల్:

ఈ అందమైన దృశ్యాన్ని చూడాలనుకునే నక్షత్ర ప్రేమికులకు పున్నమి చందమామ కాస్త సవాల్‌గా మారింది. ఇక జూలై 29న ఏర్పడే పౌర్ణమి వల్ల, ఆ మరుసటి రోజుల్లో కూడా చంద్రబింబం దాదాపు 98 శాతం నిండుగా ప్రకాశిస్తుంది. ఈ వెన్నెల వెలుతురు వల్ల డెల్టా అక్వారిడ్స్ రాల్చే బలహీనమైన చిన్న చిన్న కాంతి రేఖలు కంటికి స్పష్టంగా కనిపించకపోవచ్చు.

వెలుగులు విరజిమ్మే ఫైర్‌బాల్స్:

అయితే ఇక్కడే ఆల్ఫా క్యాప్రికార్నిడ్స్ తన ప్రత్యేకతను చాటుకోనుంది. వీటి సంఖ్య గంటకు 5 మాత్రమే ఉన్నప్పటికీ, ఇవి అత్యంత కాంతివంతమైన 'ఫైర్‌బాల్స్'ను సృష్టిస్తాయి. ఇక అంతరిక్ష శిలలు భూ వాతావరణంలోకి ప్రవేశించినప్పుడు కలిగే రాపిడి వల్ల పెద్ద ఎత్తున మండిపోతూ ప్రయాణిస్తాయి. అందువల్ల నిండు చందమామ వెలుగులు ఉన్నప్పటికీ, ఈ రంగురంగుల ఫైర్‌బాల్స్ ఆకాశంలో ఎంతో స్పష్టంగా మెరుస్తూ కనిపిస్తాయి.

ఎలా, ఎప్పుడు వీక్షించాలి?:

ఈ అరుదైన ఖగోళ వింతను చూడటానికి అర్ధరాత్రి దాటిన సమయం నుంచి తెల్లవారుజాము వరకు అత్యంత అనుకూలం. ఇక ఆ సమయంలో కుంభ రాశి ఆకాశంలో గరిష్ట ఎత్తుకు చేరుకుంటుంది. పట్టణాల్లో ఉండే విద్యుత్ కాంతులు, చందమామ వెలుతురు నేరుగా కంటిపై పడకుండా ఉండే ఎత్తయిన చీకటి ప్రదేశాల నుంచి ఈ మెటియోర్ మెరుపులను స్పష్టంగా చూడవచ్చు.

మిస్ అవ్వకూడని అద్భుతం:

ప్రకృతి ఒడిలో చోటుచేసుకునే ఇలాంటి అరుదైన ఖగోళ వింతలు మనకు కొత్త అనుభూతిని ఇస్తాయి. పౌర్ణమి వెలుగులు ఉన్నప్పటికీ, ఆకాశంలో మెరిసే ఫైర్‌బాల్స్ క్రియేట్ చేసే వండర్ నైట్ సీన్స్ చూడటం నిజంగా ఒక డబుల్ బొనాంజా ఆఫరే. కాబట్టి ఖగోళ ప్రియులంతా ఈ అద్భుతమైన విజువల్ ట్రీట్‌ను వీక్షించడానికి సిద్ధమైపోండి.