ట్రంప్‌ తీరని కోరిక: మూడోసారి అధ్యక్షుడు అవుతారా?

అమెరికా అధ్యక్షుడు డొనాల్డ్ ట్రంప్ మరోసారి తన ఆసక్తికర వ్యాఖ్యలతో వార్తల్లో నిలిచారు. రెండోసారి అధ్యక్షుడిగా ఎన్నికైన తర్వాత, ఇప్పుడు ఆయనకు మరో తీరని కోరిక తలెత్తింది. అదే మూడోసారి అధ్యక్ష పదవికి పోటీ చేయడం! అయితే, ఈ కోరిక నెరవేరడం అమెరికా చట్టాల ప్రకారం దాదాపు అసాధ్యం.

* ఏం జరిగింది?

మలేషియా నుంచి టోక్యోకు ప్రయాణిస్తున్న సందర్భంగా ఎయిర్ ఫోర్స్ వన్ విమానంలో విలేకరులతో మాట్లాడిన ట్రంప్ ఈ విషయాన్ని వెల్లడించారు. "నేను మళ్లీ పోటీ చేస్తానా? ఆ విషయం గురించి ఇంకా నిర్ణయం తీసుకోలేదు. కానీ మూడోసారి అధ్యక్షుడిగా అవ్వడం అసాధ్యం కాదు" అని ఆయన వ్యాఖ్యానించారు.

అయితే, వచ్చే ఎన్నికల్లో వైస్ ప్రెసిడెంట్ గా నిలబడతారన్న వాదనలను ఆయన పూర్తిగా కొట్టిపారేశారు. మూడోసారి అధ్యక్షుడిగా పోటీ చేసేందుకు మార్గాలున్నాయని తాను విశ్వసిస్తున్నట్టు తెలిపారు. కానీ ఆ దిశగా ఇంకా ఆలోచించలేదన్నారు.

* చట్టం ఏం చెబుతోంది?

ట్రంప్ కోరికపై అమెరికా రాజకీయ వర్గాల్లో చర్చలు మొదలయ్యాయి. ఎందుకంటే, అమెరికా రాజ్యాంగం ప్రకారం, ఏ వ్యక్తి గరిష్టంగా రెండు సార్లు మాత్రమే అధ్యక్షుడిగా ఎన్నిక కావచ్చు. ఈ నిబంధన 22వ సవరణ ద్వారా 1951లో అమలులోకి వచ్చింది. అందువల్ల ట్రంప్ మూడోసారి అధ్యక్ష పదవికి పోటీ చేయడం చట్టపరంగా అసాధ్యం.

* ట్రంప్‌ వ్యూహం ఏమిటి?

అమెరికా చరిత్రలో 22వ సవరణకు ముందు ఫ్రాంక్లిన్ డి. రూస్వెల్ట్ మాత్రమే ఏకైక వ్యక్తిగా నాలుగు సార్లు అధ్యక్షుడిగా ఎన్నికయ్యారు. ఆ తర్వాత నుంచి, రెండు సార్లు మాత్రమే పదవిలో ఉండాలనే నిబంధన కఠినంగా అమలవుతోంది.

రాజకీయ విశ్లేషకులు ట్రంప్ వ్యాఖ్యలపై భిన్న అభిప్రాయాలు వ్యక్తం చేస్తున్నారు. ట్రంప్ ఈ వ్యాఖ్యలు తన రాజకీయ ప్రాధాన్యతను నిలబెట్టుకోవడానికి.. తన మద్దతుదారులలో ఉత్సాహాన్ని పెంచడానికి చేసి ఉండవచ్చు. ట్రంప్‌ తరచూ వివాదాస్పద వ్యాఖ్యలు చేస్తూ చట్టపరమైన పరిమితులను సవాలు చేసే స్వభావం కలిగిన వ్యక్తి. మూడోసారి పోటీకి మార్గాలను వెతకాలని ఆయన నిజంగా భావించినా ఆ ప్రయత్నాలు సవాలుతో కూడుకున్నవి.

మొత్తానికి డొనాల్డ్ ట్రంప్ మూడోసారి అధ్యక్షుడిగా పోటీ చేయాలన్న కోరిక ప్రస్తుతానికి ఒక కలగానే కనిపిస్తున్నా, ఆయన భవిష్యత్తు రాజకీయ వ్యూహాలు.. అమెరికా రాజకీయాలపై ఆయన ప్రభావం ఎలా ఉంటుందో చూడాలి. ట్రంప్ పేరు మళ్లీ హాట్ టాపిక్‌గా మారడం మాత్రం ఖాయం.