7 కోట్ల సంవ‌త్స‌రాల నాటి డైనోసార్ గుడ్లు చెక్కు చెద‌ర‌కుండా!

దక్షిణ ఫ్రాన్స్‌లోని మీజ్ ప్రాంతంలో పురావస్తు శాస్త్రవేత్తలు ఒక అద్భుతమైన నిధిని కనుగొన్నారు. సుమారు 7 కోట్ల సంవ‌త్స‌రాల (70 మిలియన్ ఏళ్ల క్రితం) నాటి వందలాది డైనోసార్ గుడ్లు ఇక్కడ బయటపడ్డాయి. ఈ తవ్వకాలు గత అక్టోబర్‌లో ప్రారంభమయ్యాయి. భారీ వర్షాలు, బురద వల్ల శాస్త్రవేత్తలు అనేక సవాళ్లను ఎదుర్కొన్నారు. చివరకు బంకమట్టి పొరల కింద దాగి ఉన్న ఈ గుడ్లను వారు విజయవంతంగా వెలికితీశారు.

ఈ గుడ్లు క్రెటేషియస్ కాలం చివరి దశకు చెందినవని పరిశోధకులు నిర్ధారించారు. అంటే డైనోసార్ల జాతి అంతరించిపోవడానికి కొద్ది కాలం ముందు ఈ గుడ్లు పెట్టాయి. అప్పట్లో ఈ ప్రాంతం నదులు, చిత్తడి నేలలతో కూడిన ఉష్ణమండల మైదానంగా ఉండేది. ఆడ డైనోసార్లు నేలపై చిన్న గుంతలు తవ్వి అందులో గుడ్లు పెట్టేవి. ఆ తర్వాత వాటిని ఇసుక లేదా ఆకులతో కప్పి భద్రపరిచేవి.

ఇక్కడ లభించిన గుడ్లలో వివిధ జాతులకు చెందినవి ఉండటం విశేషం. వీటిలో ముఖ్యంగా టైటానోసార్ అనే భారీ శాకాహార డైనోసార్ గుడ్లు ఎక్కువగా ఉన్నాయి. అలాగే కవచం వంటి చర్మం ఉండే అంకిలోసార్మ .. మాంసాహార థెరోపాడ్ గుడ్లు కూడా ఇక్కడ లభించాయి. వేర్వేరు జాతుల డైనోసార్లు పదేపదే ఇదే ప్రాంతానికి వచ్చి గుడ్లు పెట్టడం శాస్త్రవేత్తలను ఆశ్చర్యపరిచింది. ఇది వాటికి ఒక సురక్షితమైన సంతానోత్పత్తి కేంద్రంగా ఉండేదని తెలుస్తోంది.

ఈ గుడ్లు ఇన్నేళ్లయినా చెక్కుచెదరకుండా ఉండటానికి అప్పటి వరదలే కారణం. గుడ్లు పెట్టిన కొద్దిసేపటికే వరదలు రావడం వల్ల అవి మట్టిలో త్వరగా కూరుకుపోయాయి. ఈ మట్టి పొరలు కవచంలా మారి గుడ్లు పగిలిపోకుండా కాపాడాయి. బంకమట్టి పొరల వల్ల గాలి తగలకుండా ఉండటంతో ఇవి శిలాజాలుగా మారాయి. ఈ సహజమైన పరిరక్షణ వల్ల నేడు మనం వాటిని చూడగలుగుతున్నాము.

ఈ చారిత్రక సంపదను కాపాడటానికి శాస్త్రవేత్త అలైన్ కాబోట్ ఆ ప్రదేశంపైనే ఒక మ్యూజియం నిర్మించారు. ప్రైవేట్ వ్యక్తులు ఈ అరుదైన గుడ్లను దొంగిలించకుండా ఉండటమే దీని ప్రధాన ఉద్దేశ్యం. ప్రస్తుతం సందర్శకులు ఇక్కడ జరుగుతున్న ప్రత్యక్ష తవ్వకాలను చూసే అవకాశం ఉంది. ఈ ఆవిష్కరణ డైనోసార్ల జీవనశైలిని, వాటి చివరి రోజులను అర్థం చేసుకోవడానికి ఎంతో సహాయపడుతుంది.