సంచలనం : లాడెన్ టార్గెట్ హిట్ లిస్ట్ లో భారత్.. సీఐఏ పత్రాలు లీక్

ప్రపంచాన్ని కుదిపేసిన 9/11 దాడులకు మూడేళ్ల ముందే ఉగ్రవాద ముప్పుపై ప్రమాద ఘంటికలు మోగాయా? ఒసామా బిన్ లాడెన్ నేతృత్వంలోని అల్‌ఖైదా నెట్‌వర్క్ అమెరికాను మాత్రమే కాకుండా భారత్ సహా అనేక దేశాలను టార్గెట్‌గా పరిశీలించిందా? తాజాగా వెలుగులోకి వచ్చిన అమెరికా నిఘా పత్రాలు ఇప్పుడు ఈ ప్రశ్నలను తెరపైకి తెచ్చాయి. ఇప్పటివరకు ఒసామా బిన్ లాడెన్ పేరు వినగానే ప్రధానంగా అమెరికాపై జరిగిన 9/11 దాడులే గుర్తుకొస్తాయి. కానీ అతడి వ్యూహం ఒక్క అమెరికాకే పరిమితం కాలేదని.. 1990ల చివరి నాటికే అనేక దేశాలను లక్ష్యంగా చేసుకునే స్థాయిలో అల్‌ఖైదా తన నెట్‌వర్క్‌ను విస్తరించిందని అమెరికా సీఐఏ పత్రాలు సూచిస్తున్నాయి. ఇందులో భారత్ పేరు ఉండటమే ఇప్పుడు ఆసక్తికరంగా మారింది.

1998లోనే భారత్ పేరు

1998 ఆగస్టు 28 నాటి ‘బిన్ లాడెన్ టెర్రరిస్ట్ నెట్‌వర్క్ స్టిల్ ఎ థ్రెట్’ పేరుతో రూపొందించిన ఇంటెలిజెన్స్ బ్రీఫింగ్‌లో భారత్ ప్రస్తావన కనిపించింది. బిన్ లాడెన్ నెట్‌వర్క్ భారత్‌తో పాటు పాకిస్థాన్, ఈజిప్ట్, కువైట్, సౌదీ అరేబియా, యెమెన్, ఉగాండా, నైజీరియా వంటి దేశాల్లో దాడుల అవకాశాలను పరిశీలిస్తున్నట్లు అందులో పేర్కొన్నారు. అయితే ఇక్కడ ఒక విషయం కీలకం. భారత్‌లో ఏ ప్రాంతాన్ని లక్ష్యంగా చేసుకున్నారు? ఏ తేదీన దాడి చేయాలని భావించారు? ఏ తరహా ఆపరేషన్‌కు ప్లాన్ చేశారు? వంటి నిర్దిష్ట వివరాలు మాత్రం అందుబాటులోకి వచ్చిన పత్రాల్లో లేవు. అందువల్ల భారత్‌పై ఒక నిర్దిష్ట దాడి ప్రణాళిక సిద్ధమైందని చెప్పడం కంటే అల్‌ఖైదా లక్ష్యాల పరిధిలో భారత్ కూడా ఉన్నట్లు నిఘా సమాచారం సూచించింది.

అసలు షాకింగ్ విషయం ‘హిట్ లిస్ట్’ మాత్రమే కాదు

ఈ పత్రాల్లో భారత్ పేరు కనిపించడం ఒక కోణమైతే.. అంతకంటే ఆందోళన కలిగించే అంశం అప్పటికే అల్‌ఖైదా ఎంత విస్తృతమైన నెట్‌వర్క్‌ను నిర్మించుకుందన్నదే. అఫ్గానిస్థాన్‌లోని ఉగ్ర స్థావరాలపై అమెరికా క్షిపణి దాడులు చేసినప్పటికీ బిన్ లాడెన్‌తో పాటు కీలక నేతలు తప్పించుకున్నారని అప్పటి నిఘా అంచనాలు పేర్కొన్నాయి. వారి కమ్యూనికేషన్ వ్యవస్థ పూర్తిగా కుప్పకూలలేదని.. శిక్షణ కార్యకలాపాలను తిరిగి ప్రారంభించే సామర్థ్యం కూడా ఉందని హెచ్చరించాయి. అంటే అప్పటికే అల్‌ఖైదా ఒక ప్రాంతానికి పరిమితమైన ఉగ్రసంస్థగా కాకుండా.. వివిధ దేశాల్లోని అనుబంధ గ్రూపులు, వ్యక్తులు, మద్దతుదారులను ఉపయోగించుకొని ఎక్కడైనా దాడులు చేయగల అంతర్జాతీయ ఉగ్ర నెట్‌వర్క్‌గా రూపాంతరం చెందుతోందని అమెరికా నిఘా వ్యవస్థ గుర్తించింది.

హెచ్చరికలు వచ్చాయి.. కానీ 9/11ను ఆపలేకపోయారు

తాజాగా బయటకు వచ్చిన పత్రాల్లో అత్యంత కీలకమైన అంశం ఇదే. 1998 నుంచి 2001 మధ్య బిన్ లాడెన్ నుంచి పెరుగుతున్న ముప్పు గురించి అప్పటి అమెరికా అధ్యక్షులు బిల్ క్లింటన్, జార్జ్ డబ్ల్యూ బుష్‌లకు నిఘా సంస్థలు పలుమార్లు సమాచారం ఇచ్చినట్లు తెలుస్తోంది. విమానాలను కేవలం ప్రయాణ సాధనాలుగా కాకుండా దాడులకు ఆయుధాలుగా ఉపయోగించే ప్రమాదం ఉందన్న హెచ్చరికలు కూడా అమెరికా నిఘా వ్యవస్థలో చర్చకు వచ్చినట్లు ఈ పత్రాలు సూచిస్తున్నాయి. కానీ చివరకు 2001 సెప్టెంబర్ 11న ప్రపంచం ఊహించని ఘోరం జరిగింది. అల్‌ఖైదాకు చెందిన 19 మంది ఉగ్రవాదులు నాలుగు ప్రయాణికుల విమానాలను హైజాక్ చేశారు. రెండు విమానాలు న్యూయార్క్‌లోని వరల్డ్ ట్రేడ్ సెంటర్ ట్విన్ టవర్స్‌ను ఢీకొట్టాయి. మరో విమానం పెంటగాన్‌ను ఢీకొట్టగా నాలుగో విమానం పెన్సిల్వేనియాలో కూలిపోయింది. దాదాపు మూడు వేల మంది ప్రాణాలు కోల్పోయారు.

భారత్ పేరు ఇప్పుడు ఎందుకు కీలకం?

ఈ పత్రాలను కేవలం ‘లాడెన్ హిట్ లిస్ట్‌లో భారత్’ అనే సంచలన కోణం ఉన్నా అది అమలు కాలేదు.. 1990ల చివరి నాటికే అంతర్జాతీయ ఉగ్రవాదం సరిహద్దులను దాటి విస్తరిస్తోందని నిఘా సంస్థలు గుర్తించాయనడానికి ఇవి మరో సంకేతంగా కనిపిస్తున్నాయి. ముఖ్యంగా భారత్ పేరు అప్పటి నిఘా నివేదికల్లో కనిపించడం.. అల్‌ఖైదా వ్యూహాత్మక దృష్టి ఎంత విస్తృతంగా ఉండేదో తెలియజేస్తోంది. అదే సమయంలో ఒక దేశం పేరు లక్ష్యాల జాబితాలో ఉండటం, ఆ దేశంలో నిర్దిష్ట దాడికి పూర్తి స్థాయి ఆపరేషనల్ ప్లాన్ సిద్ధం కావడం రెండూ ఒకటే కాదన్న విషయాన్ని గుర్తుంచుకోవాలి.

28 ఏళ్ల తర్వాత బయటపడిన పాత హెచ్చరిక

1998లో అత్యంత రహస్యంగా అమెరికా అధ్యక్షుడి ముందుకు వెళ్లిన సమాచారం.. దాదాపు మూడు దశాబ్దాల తర్వాత ప్రపంచం ముందుకు రావడంతో బిన్ లాడెన్ నెట్‌వర్క్‌కు సంబంధించిన మరో అధ్యాయం తెరుచుకుంది. 9/11 తర్వాత ప్రపంచ దేశాలు ఉగ్రవాదాన్ని చూసే విధానమే మారిపోయింది. కానీ తాజా పత్రాలు మరో విషయాన్ని గుర్తుచేస్తున్నాయి. ఆ మహా విషాదానికి ముందే ప్రమాద సంకేతాలు కనిపించాయి. భారత్ సహా అనేక దేశాల పేర్లు నిఘా రాడార్‌పైకి వచ్చాయి. అసలు ప్రశ్న మాత్రం ఇప్పటికీ అలాగే ఉంది. ఆ హెచ్చరికలను అప్పట్లో మరింత తీవ్రంగా తీసుకుని ఉంటే చరిత్ర మరోలా ఉండేదా? అన్నదే ఇప్పుడు అందరినీ అనుకునేలా చేస్తోంది.