గ్లోబల్ టాపిక్‌గా మన 'వీసా బాలాజీ'.. ఫ్రాన్స్ మీడియా ప్రశంసలు, అమెరికా సెనేటర్ అక్కసు!

హైదరాబాద్‌ శివార్లలోని చారిత్రాత్మక చిలుకూరు బాలాజీ దేవాలయం మరోసారి అంతర్జాతీయంగా హాట్ టాపిక్‌గా మారింది. విదేశాలకు వెళ్లాలనే కలలు కనే లక్షలాది మంది భారతీయ యువతకు ఆశాకిరణంగా నమ్మకానికి నిలువెత్తు రూపంగా నిలిచిన ఈ ఆలయం.. ఇప్పుడు గ్లోబల్ మీడియా ప్రశంసలు, అమెరికా రాజకీయ నాయకుల విమర్శల నడుమ తీవ్ర చర్చకు దారితీసింది. ఒకవైపు ఫ్రాన్స్‌కు చెందిన ప్రముఖ అంతర్జాతీయ వార్తా సంస్థ ఫ్రాన్స్ 24 ఈ ఆలయ విశిష్టతపై అత్యంత గౌరవప్రదమైన ప్రత్యేక కథనాన్ని ప్రసారం చేయగా.. మరోవైపు అమెరికాకు చెందిన ఓ ప్రముఖ సెనేటర్ చేసిన వివాదాస్పద వ్యాఖ్యలు ప్రపంచవ్యాప్తంగా ఉన్న హిందూ భక్తులను, భారతీయులను తీవ్ర ఆగ్రహానికి గురిచేస్తున్నాయి. దీంతో "వీసా బాలాజీ"గా ఖ్యాతిగాంచిన చిలుకూరు క్షేత్రం మరోసారి ప్రపంచవ్యాప్తంగా వార్తల్లో నిలిచింది.

'వీసా గాడ్' వెనుక ఉన్న అపారమైన నమ్మకం!

చిలుకూరు బాలాజీ ఆలయానికి కేవలం తెలుగు రాష్ట్రాల నుంచే కాకుండా దేశ విదేశాల నుంచి భక్తులు పోటెత్తుతుంటారు. ముఖ్యంగా అమెరికా, కెనడా, బ్రిటన్, ఆస్ట్రేలియా వంటి దేశాలకు ఉన్నత చదువుల కోసమో సాఫ్ట్‌వేర్ ఉద్యోగాల కోసమో వెళ్లాలనుకునే యువతకు ఈ ఆలయం ఒక దివ్యధామం. ఇక్కడికి వచ్చే భక్తులు ముందుగా 11 ప్రదక్షిణలు చేసి, తమ వీసా లేదా ఉద్యోగ కోరికను స్వామివారికి విన్నవించుకుంటారు. ఆ తర్వాత అనుకున్నట్లుగా వీసా రావడం లేదా ఉద్యోగం లభించిన తర్వాత.. కృతజ్ఞతగా ఆలయానికి చేరుకుని 108 ప్రదక్షిణలు చేసి మొక్కు తీర్చుకోవడం ఇక్కడ దశాబ్దాలుగా వస్తున్న ఆనవాయితీ. 1980-90వ దశకంలో చెన్నై యుఎస్ ఎంబసీకి వెళ్లేముందు కొంతమంది ఇంజినీరింగ్ విద్యార్థులు ఇక్కడ పూజలు చేయడం, వారికి వీసాలు లభించడంతో ఈ ఆలయానికి "వీసా బాలాజీ" లేదా "వీసా గాడ్" అనే ప్రత్యేక గుర్తింపు వచ్చింది.

ఫ్రాన్స్ మీడియా ప్రశంసలు.. భారతీయ ఆశలకు అద్దం పట్టిన కథనం!

ఇటీవల అంతర్జాతీయ మీడియా దిగ్గజం ఫ్రాన్స్ 24 చిలుకూరు ఆలయంపై ఒక ప్రత్యేకమైన గ్రౌండ్ రిపోర్ట్‌ను ప్రసారం చేసింది. భారతీయ యువతలో ఉన్న 'అమెరికన్ డ్రీమ్' అమెరికా వెళ్లాలనే కల , విదేశీ అవకాశాల కోసం వారు పడే తపనను.. వారి ఆధ్యాత్మిక విశ్వాసాలతో ముడిపెడుతూ ఈ కథనాన్ని రూపొందించింది. వేలాది మంది చదువుకున్న యువతీ యువకులు తమ ఉజ్వల భవిష్యత్తు కోసం, మానసిక ధైర్యం కోసం భగవంతుడిని ఆశ్రయించడాన్ని ఎంతో సానుకూలంగా గౌరవప్రదంగా చూపించింది. భారతీయుల అపారమైన నమ్మకం, కష్టపడి పైకి రావాలనే వారి పట్టుదలకు ఈ ఆలయం ఒక సజీవ ప్రతీక అని ఫ్రాన్స్ ఛానల్ కొనియాడింది.

అమెరికా సెనేటర్ వ్యాఖ్యలపై వెల్లువెత్తుతున్న నిరసనలు!

ఒకవైపు అంతర్జాతీయ మీడియా భారతీయ సంస్కృతిని, విశ్వాసాన్ని అభినందిస్తుంటే.. మరోవైపు అమెరికా రాజకీయ వర్గాల నుంచి అక్కసు వెళ్లగక్కడం వివాదాస్పదమైంది. అమెరికా సెనేటర్ ఎరిక్ స్మిత్ హెచ్-1బీ వీసా విధానాలపై విమర్శలు గుప్పిస్తూ.. చిలుకూరు బాలాజీ ఆలయాన్ని లక్ష్యంగా చేసుకున్నారు. ఆలయానికి సంబంధించిన ఫోటోను సోషల్ మీడియాలో షేర్ చేస్తూ.. దీనిని "వీసా కార్టెల్" గా అభివర్ణించడం తీవ్ర దుమారం రేపింది.

ఈ వ్యాఖ్యలపై భారతీయ నెటిజన్లు, భక్తులు సోషల్ మీడియా వేదికగా తీవ్రస్థాయిలో విరుచుకుపడుతున్నారు. కోట్ల మంది నమ్మకాన్ని, పవిత్రమైన దేవాలయాన్ని కించపరచడం అమెరికా నేతల సంకుచిత మనస్తత్వానికి నిదర్శనమని మండిపడుతున్నారు. అమెరికా ఐటీ రంగంలో భారతీయుల ప్రతిభ, నైపుణ్యం పెరిగిపోతుండటాన్ని జీర్ణించుకోలేకనే.. కొందరు అక్కడి రాజకీయ నాయకులు వీసా విధానాలను తమ స్వార్థ రాజకీయ ఆయుధంగా మార్చుకుంటూ ఇలాంటి పవిత్ర క్షేత్రాలపై బురదజల్లుతున్నారని భక్తులు ఆగ్రహం వ్యక్తం చేస్తున్నారు.

హుండీ లేని అద్భుత క్షేత్రం.. నిరాడంబరతకు నిదర్శనం!

విమర్శలు చేసేవారికి చిలుకూరు ఆలయ విశిష్టత తెలియదని భక్తులు గుర్తుచేస్తున్నారు. సుమారు 500 సంవత్సరాల సుదీర్ఘ చరిత్ర కలిగిన ఈ ఆలయంలో ఎలాంటి హుండీ ఉండదు. ఇక్కడ కానుకలు, డబ్బు రూపంలో ఎలాంటి విరాళాలు స్వీకరించరు. అలాగే ఇక్కడ ఎవరికీ వీఐపీ దర్శనాలు ఉండవు. సామాన్యుడైనా, దేశ ప్రధాని అయినా.. అంతా ఒకే క్యూలైన్‌లో నిలబడి స్వామివారిని దర్శించుకోవాల్సిందే. ఇంతటి పారదర్శకత, నిరాడంబరత ఉన్న ఆలయాన్ని ఒక కార్టెల్‌గా పోల్చడం వారి అజ్ఞానానికి పరాకాష్ట అని ఆలయ అర్చకులు, భక్తులు హితవు పలుకుతున్నారు.

భారతీయ సమాజంలో దేవాలయాలు కేవలం పూజా స్థలాలు మాత్రమే కావు.. అవి ఒత్తిడిలో ఉన్న యువతకు మానసిక ప్రశాంతతను, కొత్త ఆశలను ఇచ్చే కౌన్సిలింగ్ కేంద్రాలు. ప్రపంచం ఎంత ఆధునికత వైపు పరుగెడుతున్నా.. నమ్మకానికి, కష్టపడే తత్వానికి ప్రతీకగా నిలిచిన చిలుకూరు బాలాజీ స్థానం భారతీయుల గుండెల్లో శాశ్వతం. అమెరికా నేతల విమర్శలు ఎలా ఉన్నా.. మన 'వీసా దేవుడు' అంతర్జాతీయంగా పొందుతున్న గుర్తింపు మాత్రం చెదరనిది!