తన గురువు చంద్రబాబు నుంచి ఇదే రేవంత్ నేర్చుకోవాలి

ఆంధ్రప్రదేశ్ ముఖ్యమంత్రి నారా చంద్రబాబు నాయుడు తీసుకున్న ఒక నిర్ణయం ఇప్పుడు స్థానిక క్రీడాకారుల ప్రోత్సాహంలో ఆయనకున్న నిబద్ధతను మరోసారి చాటిచెప్పింది. ఇటీవల అంతర్జాతీయ క్రికెట్ క్రీడాకారిణి శ్రీ చరణి రెడ్డిని ఆయన తన కార్యాలయానికి ఆహ్వానించి ఘనంగా సన్మానించారు. రాయలసీమ ప్రాంతానికి చెందిన ఈ యువ ప్రతిభను గుర్తించడంలో చంద్రబాబు ఏమాత్రం ఆలస్యం చేయలేదు.

* ఏపీ ప్రభుత్వం భారీ ప్రోత్సాహం

శ్రీ చరణి రెడ్డికి చంద్రబాబు ప్రకటించిన ప్రోత్సాహం సాధారణమైనది కాదు.. 1000 చదరపు గజాల నివాస స్థలం, రూ.2.5 కోట్ల భారీ నగదు బహుమతి , గ్రూప్–1 ఉద్యోగం ఇచ్చి గౌరవించాడు. ఈ ప్రకటనలు ఏపీలోని క్రీడాకారులలో ముఖ్యంగా యువతలో, అపారమైన ఉత్సాహాన్ని నింపాయి. తన వాగ్దానాలు ఎప్పుడు కార్యరూపం దాల్చినా, స్థానిక ప్రతిభకు దక్కే గౌరవం ఇదే అని చంద్రబాబు నాయుడు స్పష్టం చేశారు.

* తెలంగాణలో నిరాశ: అరుంధతి రెడ్డికి దక్కని గౌరవం

ఒకవైపు ఆంధ్రప్రదేశ్ ప్రభుత్వం తన క్రీడాకారులకు భారీ ప్రోత్సాహం అందిస్తుంటే, పొరుగు రాష్ట్రమైన తెలంగాణలో మాత్రం పరిస్థితి భిన్నంగా ఉంది. తెలంగాణకు ప్రాతినిధ్యం వహిస్తున్న మరో అంతర్జాతీయ క్రీడాకారిణి అరుంధతి రెడ్డి కూడా ఇటీవల జాతీయ జట్టులో చోటు దక్కించుకుంది.

ప్రధాన మ్యాచ్‌ల్లో ఆడే అవకాశం రాకపోయినా, జాతీయ జట్టులో స్థానం సంపాదించడం అనేది సంవత్సరాల కష్టం, పట్టుదలకు నిదర్శనం. అయితే, ఇప్పటివరకు తెలంగాణ ముఖ్యమంత్రి రేవంత్ రెడ్డి గానీ, రాష్ట్ర ప్రభుత్వం గానీ ఆమెను ఆహ్వానించలేదు, అభినందించలేదు, కనీసం ఎటువంటి ప్రోత్సాహక బహుమతిని కూడా ప్రకటించలేదు.

* ప్రజల అభిప్రాయం: రేవంత్ నేర్చుకోవాలి

తెలంగాణ క్రీడాకారిణి అయినప్పటికీ అరుంధతి రెడ్డికి రాష్ట్ర ప్రభుత్వం నుంచి సరైన గౌరవం దక్కలేదనే అభిప్రాయం ప్రజల్లో బలంగా వ్యక్తమవుతోంది. క్రీడాకారులను గుర్తించి, వారిని సన్మానించడం కేవలం ఒక లాంఛనం మాత్రమే కాదు, అది రాబోయే తరాల క్రీడాకారులకు ఒక పాజిటివ్ సందేశం.

చంద్రబాబు నాయుడు చూపించిన చొరవను రేవంత్ రెడ్డి కూడా గ్రహించాల్సిన అవసరం ఉంది. స్థానిక ప్రతిభను సముచితంగా గౌరవించి, ప్రోత్సహిస్తేనే రాష్ట్ర క్రీడా రంగం మరింత అభివృద్ధి చెందుతుంది.

ప్రస్తుతానికి, రాష్ట్ర ప్రజల మాట ఒక్కటే "చంద్రబాబు దగ్గర నుంచి స్థానిక ప్రతిభను గౌరవించడం అనే పాఠం రేవంత్ రెడ్డి ఇంకా నేర్చుకోలేదు." వెంటనే అరుంధతి రెడ్డిని సన్మానించి, తగిన ప్రోత్సాహాన్ని ప్రకటించడం ద్వారా రేవంత్ రెడ్డి ప్రభుత్వం ఈ లోపాన్ని సరిదిద్దుకోవాలి.