దేశంలో కొత్త వైరస్.. అసలేంటి 'చాందీపుర వైరస్' .. ఎవరికి డేంజర్.. జాగ్రత్తలివీ

గుజరాత్ రాష్ట్రంలో చాందీపురా వైరస్ మరోసారి తీవ్ర కలకలం సృష్టిస్తోంది. రోజురోజుకూ పెరుగుతున్న బాధితుల సంఖ్యతో ప్రజలు భయాందోళనలకు గురవుతుండగా.. రాష్ట్ర ఆరోగ్య శాఖ తీవ్ర స్థాయిలో అప్రమత్తమైంది. ముఖ్యంగా పదిహేనేళ్ల లోపు వయసున్న చిన్నారులపై ఈ వైరస్ తీవ్రమైన ప్రభావం చూపుతుండటం ఆందోళన కలిగిస్తోంది. ఇప్పటివరకు వెలుగుచూసిన గణాంకాల ప్రకారం సుమారు 184 అనుమానిత కేసులు నమోదు కాగా వాటిలో 35 మందికి ఈ మహమ్మారి సోకినట్లు వైద్య పరీక్షల్లో నిర్ధారణ అయింది. అత్యంత బాధాకరమైన విషయమేమిటంటే ఈ వైరస్ తీవ్రతను తట్టుకోలేక ఇప్పటికే 22 మంది చిన్నారులు ప్రాణాలు కోల్పోవడం పరిస్థితి ఎంత తీవ్రంగా ఉందో తెలియజేస్తోంది. మరికొన్ని నమూనాల ఫలితాలు రావాల్సి ఉండటంతో ప్రభుత్వం ప్రత్యేక ఐసీయూ వార్డులను సిద్ధం చేసి నిరంతరం నిఘా ఉంచింది.

చాందీపురా వైరస్ అంటే ఏమిటి?

ఈ చాందీపురా వైరస్ అనేది కొత్తగా వచ్చినదేమీ కాదు. 1965వ సంవత్సరంలో మహారాష్ట్రలోని చాందీపురా అనే గ్రామంలో తొలిసారిగా దీని ఉనికిని శాస్త్రవేత్తలు గుర్తించారు. ఆ గ్రామం పేరు మీదుగానే ఈ వైరస్‌కు ‘చాందీపురా వైరస్’ అని నామకరణం చేశారు. ఇది శాస్త్రీయంగా రాబ్డోవిరిడే రకానికి చెందిన ఆర్‌ఎన్‌ఏ వైరస్ విభాగంలోకి వస్తుంది.

ఈ వైరస్ ఒకరి నుంచి మరొకరికి నేరుగా వ్యాపించే అంటువ్యాధి కాకపోవడం కొంతవరకు ఊరట కలిగించే అంశమైనప్పటికీ కీటకాల ద్వారా వేగంగా సోకుతుంది. ప్రధానంగా శాండ్‌ఫ్లైలు అని పిలిచే ఇసుక ఈగలు, కొన్ని ప్రత్యేక రకాల దోమలు, పేలు కుట్టడం ద్వారా ఈ వైరస్ మానవ శరీరంలోకి ప్రవేశిస్తుంది. సాధారణంగా మట్టి గోడల పగుళ్లు, పశువుల పాకలు, తేమ ఎక్కువగా ఉండే ప్రాంతాల్లో ఈ ఇసుక ఈగలు అధికంగా వృద్ధి చెందుతాయి. పెద్దవారితో పోలిస్తే తొమ్మిది నెలల నుంచి పదిహేనేళ్ల లోపు పిల్లల్లో రోగనిరోధక శక్తి తక్కువగా ఉండటం వల్ల వారు ఈ వైరస్ బారిన సులభంగా పడుతున్నారు.

వైరస్ ప్రభావం, ప్రాణాంతక లక్షణాలు

చాందీపురా వైరస్ సోకిన తొలి దశలో సాధారణ అనారోగ్య సమస్యలే కనిపిస్తాయి. బాధితుల్లో తీవ్రమైన జ్వరం రావడం, వాంతులు కావడం, విరేచనాలు, శరీరం తీవ్రమైన బలహీనతకు గురికావడం వంటి ప్రాథమిక లక్షణాలు బయటపడతాయి. అయితే ఈ వైరస్ అత్యంత ప్రమాదకరంగా మారడానికి ప్రధాన కారణం.. ఇది వేగంగా మానవ మెదడుపై దాడి చేయడమే.

వైరస్ ప్రభావం తీవ్రమైతే మెదడు వాపు వ్యాధి లేదా ఎన్సెఫాలిటిస్‌కు దారితీస్తుంది. ఈ పరిస్థితి ఏర్పడినప్పుడు పిల్లలకు తీవ్రమైన మూర్ఛలు లేదా ఫిట్స్ రావడం, స్పృహ కోల్పోవడం.. కొన్నిసార్లు కోమాలోకి వెళ్లే ప్రమాదం ఉంటుంది. వ్యాధి లక్షణాలు కనిపించిన స్వల్ప వ్యవధిలోనే బాధితుల పరిస్థితి విషమించే అవకాశం ఉన్నందున ఏ చిన్న సంకేటాన్ని కూడా నిర్లక్ష్యం చేయవద్దని వైద్యులు తీవ్రంగా హెచ్చరిస్తున్నారు.

ప్రత్యేక చికిత్స, వ్యాక్సిన్ లభ్యత

ప్రస్తుతానికి చాందీపురా వైరస్‌కు వ్యతిరేకంగా పనిచేసే నిర్దిష్టమైన టీకా గానీ లేదా ప్రత్యేకమైన యాంటీవైరల్ మందులు గానీ అందుబాటులో లేవు. వైద్యులు పూర్తిగా రోగి శరీరంలో కనిపించే లక్షణాల ఆధారంగానే సహాయక వైద్య సేవలు అందిస్తున్నారు. శ్వాస తీసుకోవడంలో ఇబ్బందులు ఏర్పడటం లేదా శరీరంలోని ఇతర ముఖ్య అవయవాలు దెబ్బతినే పరిస్థితులు తలెత్తితే వెంటిలేటర్, ఐసీయూ చికిత్సను అందించాల్సి వస్తుంది. సమయానికి తగిన సపోర్టివ్ ట్రీట్‌మెంట్ అందిస్తేనే పిల్లలను ప్రాణాపాయం నుంచి రక్షించే అవకాశం ఉంటుంది.

వైరస్ విజృంభణను అరికట్టడానికి గుజరాత్ ఆరోగ్య శాఖ యుద్ధప్రాతిపదికన చర్యలు చేపట్టింది. గ్రామీణ ప్రాంతాల్లో ప్రత్యేక బృందాలను రంగంలోకి దింపి మట్టి గోడల పగుళ్లను పూడ్చివేయడం, పశువుల పాకల వద్ద క్రిమిసంహారక మందులు పిచికారీ చేయడం వంటి కార్యక్రమాలు నిర్వహిస్తోంది. గాంధీనగర్, రాజ్‌కోట్, భావ్‌నగర్, పటాన్ వంటి ప్రాంతాల్లోని ప్రముఖ సివిల్ ఆస్పత్రుల్లో ప్రత్యేక ఐసీయూ బెడ్లు, ఆక్సిజన్ , వెంటిలేటర్ సౌకర్యాలను అత్యవసరంగా అందుబాటులో ఉంచారు.

ఈ వైరస్ బారిన పడకుండా ఉండాలంటే ముందస్తు నివారణ చర్యలే ఏకైక మార్గం. ముఖ్యంగా వర్షాకాలంలో ఇసుక ఈగలు, దోమల సంతతి పెరుగుతుంది కాబట్టి ఇళ్ల పరిసరాలను ఎప్పటికప్పుడు పరిశుభ్రంగా ఉంచుకోవాలి. పిల్లలకు పూర్తి శరీరాన్ని కప్పే దుస్తులు తొడగడం, రాత్రి వేళల్లో దోమతెరలు వాడడం చాలా అవసరం. చిన్నారుల్లో జ్వరం, వాంతులు లేదా మూర్ఛ వంటి లక్షణాలు కనిపిస్తే ఏమాత్రం అలసత్వం వహించకుండా వెంటనే సమీపంలోని ఆస్పత్రికి తరలించడం ద్వారానే వారి ప్రాణాలను కాపాడుకోవచ్చని వైద్య నిపుణులు స్పష్టం చేస్తున్నారు.