4 వారాలైనా గాయం మానకపోతే జాగ్రత్త… క్యాన్సర్ ప్రారంభ లక్షణాలు ఇవే

క్యాన్సర్ అనే మాట వినగానే మనలో ఒక రకమైన ఆందోళన మొదలవుతుంది. కానీ నిజానికి, మన శరీరం ఏదైనా ముప్పు వాటిల్లే ముందు కొన్ని హెచ్చరిక సంకేతాలను ఇస్తుంది. అమెరికన్ క్యాన్సర్ సొసైటీ పరిశోధనల ప్రకారం, చిన్నపాటి మార్పులను కూడా నిర్లక్ష్యం చేయకూడదు. ముఖ్యంగా నాలుగు వారాలైనా గాయం మానకపోవడం వంటి లక్షణాలు కనిపిస్తే అప్రమత్తం కావాలి. సకాలంలో గుర్తిస్తే ఈ మహమ్మారిని జయించడం చాలా సులభం. ఆ ప్రాథమిక లక్షణాలు ఏంటో ఇప్పుడు తెలుసుకుందాం.

శరీరం ఇచ్చే చిన్న చిన్న సంకేతాలు:

మన నిత్యజీవితంలో అలసటగా అనిపించడం సహజం. కానీ, మీరు తగినంత విశ్రాంతి తీసుకున్నా కూడా విపరీతమైన నీరసం వేధిస్తుంటే అది ఒక హెచ్చరిక కావచ్చు. అలాగే, ఎటువంటి డైట్ లేదా వ్యాయామం చేయకుండానే అకస్మాత్తుగా బరువు తగ్గిపోవడం మంచి లక్షణం కాదు. జ్వరం వస్తూ పోతూ ఉండటం లేదా ఎన్ని మందులు వాడినా తగ్గకపోవడం వంటివి లోపల ఏదో ఇన్ఫెక్షన్ లేదా వ్యాధి ముదురుతోందని చెప్పడానికి సంకేతాలు. మన శరీరం తనను తాను రక్షించుకోవడానికి ప్రయత్నిస్తున్నప్పుడు ఇలాంటి మార్పులు వస్తాయి, అందుకే వీటిని 'సాధారణ సమస్యలే కదా' అని వదిలేయకుండా డాక్టరును సంప్రదించడం చాలా ముఖ్యం.

గాయాలు మానట్లేదా? చర్మం రంగు మారుతోందా?సాధారణంగా దెబ్బ తగిలితే వారం పది రోజుల్లో తగ్గిపోతుంది. కానీ, ఒక గాయం నాలుగు వారాలు దాటినా మానడం లేదంటే అది చర్మ క్యాన్సర్ లేదా ఇతర లోతైన సమస్యలకు దారితీయవచ్చు. అలాగే చర్మంపై పుట్టుమచ్చలు అసాధారణంగా పెరగడం, చర్మం రంగు మారి ముదురు రంగులోకి రావడం లేదా పసుపు రంగులోకి మారడం గమనించాలి. గొంతులో ఏదో అడ్డుపడినట్లు అనిపించడం, ఆహారం మింగడానికి ఇబ్బంది పడటం వంటివి అన్నవాహిక లేదా గొంతు క్యాన్సర్‌కు ప్రాథమిక లక్షణాలు కావచ్చు. ఇవన్నీ చిన్నవిగా అనిపించినా, క్యాన్సర్ ప్రారంభ దశలో బయటపడే అతి ముఖ్యమైన సంకేతాలు.

విసర్జనలో మార్పులు.. నిర్లక్ష్యం చేస్తే ప్రమాదమే:

మన ఆరోగ్య పరిస్థితిని,మన అలవాట్లు ప్రతిబింబిస్తాయి. మలవిసర్జన సమయంలో రక్తం పడటం లేదా మూత్రంలో ఎరుపు రంగు కనిపిస్తే అస్సలు ఆలస్యం చేయకూడదు. ఇది మూత్రాశయం లేదా పేగు క్యాన్సర్‌కు దారితీసే అవకాశం ఉంటుంది. అలాగే జీర్ణక్రియలో మార్పులు, బరువు తగ్గటం, తరచుగా కడుపు ఉబ్బరంగా అనిపించడం కూడా గమనించదగ్గ విషయాలే. గుర్తుంచుకోండి, క్యాన్సర్ అంటే భయం కాదు, అవగాహన ముఖ్యం. ప్రారంభ దశలో గుర్తిస్తే వైద్యం చాలా సులభం అవుతుంది. మన శరీరం చెప్పే భాషను అర్థం చేసుకుంటే, ప్రాణాంతక వ్యాధుల నుండి మనల్ని మనం కాపాడుకోవచ్చు.