అసెంబ్లీ బాయ్ కాట్ బీఆర్ఎస్ కు బూమరాంగ్ గా మారిందా..?

రాజకీయాల్లో ఒక్కోసారి తీసుకునే నిర్ణయం ఆ క్షణానికి సరైనదిగా అనిపించవచ్చు. కానీ అదే నిర్ణయం కాలక్రమంలో స్వయంకృతాపరాధంగా మారితే..? తెలంగాణ అసెంబ్లీలో బీఆర్ఎస్‌ తీసుకున్న ‘బాయ్‌కాట్‌’ నిర్ణయం ఇప్పుడు అలాంటి ప్రశ్నలకే దారి తీస్తోంది. అధికార పక్షాన్ని ఇరుకున పెట్టాలన్న ఉద్దేశంతో చేసిన ఆ నిర్ణయం, చివరకు కాంగ్రెస్‌కు వేదికగా మారిపోయిందన్న విమర్శలు బలపడుతున్నాయి.

ఆయుధాన్ని పక్కన పెట్టడం సరైందేనా?

అసెంబ్లీ అనేది ప్రతిపక్షానికి అతిపెద్ద ఆయుధం. అక్కడే ప్రశ్నలు, విమర్శలు, ప్రత్యామ్నాయ వాదనలు వినిపించాలి. కానీ ఆ వేదికను స్వయంగా వదిలేసినప్పుడు, అధికార పక్షానికి అడ్డుకట్ట వేసే అవకాశం ఎక్కడుంటుంది? బీఆర్ఎస్‌ సభ్యులు సభలో లేకపోవడంతో కాంగ్రెస్‌ నేతలు ఆరోపణలు చేయడంలో ఎలాంటి ఆటంకం ఎదురుకాలేదు. ప్రభుత్వ వైఫల్యాలపై బీఆర్ఎస్‌ వాదనలు సభలో వినిపించాల్సిన చోట, అవి బయట మీడియా బ్రీఫింగ్స్‌కే పరిమితమయ్యాయి.

కృష్ణాజలాలపై వాదించని బీఆర్ఎస్

ప్రత్యేకంగా కృష్ణా జలాల అంశంలో ఈ పరిస్థితి మరింత స్పష్టంగా కనిపించింది. కాంగ్రెస్ ప్రభుత్వం పవర్‌పాయింట్ ప్రెజెంటేషన్‌తో గణాంకాలు, మ్యాపులు, డాక్యుమెంట్లను సభలో ఉంచి దాడికి దిగింది. బీఆర్ఎస్‌ పాలనలో జరిగిన తప్పిదాలపై తీవ్ర ఆరోపణలు చేసింది. సభలో ఉంటే వెంటనే కౌంటర్ ఇవ్వగలిగే అవకాశముండేది. కానీ బాయ్‌కాట్‌తో ఆ అవకాశం చేజారిపోయింది. బయట ఇచ్చిన కౌంటర్లు అంత ప్రభావం చూపలేకపోయాయి. అసెంబ్లీ వేదికపై చెప్పిన మాటకు, బయట చెప్పిన మాటకు ఉండే బరువు ఒక్కటే కాదు అన్న నిజం మరోసారి బయటపడింది. బీఆర్ఎస్‌ ఈ బాయ్‌కాట్‌ను కోపావేశంతో తీసుకున్న నిర్ణయంగా రాజకీయ వర్గాలు విశ్లేషిస్తున్నాయి. ప్రభుత్వ తీరుపై నిరసన వ్యక్తం చేసేందుకు బాయ్‌కాట్ ఒక మార్గమే అయినా, అది చివరి ఆయుధంగా ఉండాలన్న అభిప్రాయం ఉంది. అసెంబ్లీని ఖాళీ చేయడం ద్వారా ప్రజలకు వెళ్లే సందేశం కూడా కీలకం. ‘ప్రతిపక్షం ఎందుకు మాట్లాడటం లేదు?’ అనే ప్రశ్న సామాన్యుల్లో కలగడం సహజం. ఇది రాజకీయంగా కాంగ్రెస్‌కు అనుకూలంగా మారిందన్న వాదన వినిపిస్తోంది.

కాంగ్రెస్ కే దక్కిన బలం..

ఇంకో వైపు కాంగ్రెస్ వ్యూహం కూడా స్పష్టంగా కనిపిస్తోంది. ప్రతిపక్షం లేని సభలో తమ వాదనను ఏకపక్షంగా ప్రజల్లోకి తీసుకెళ్లే అవకాశం దక్కింది. బీఆర్ఎస్‌ హయాంలో జరిగిన నిర్ణయాలపై విమర్శలు చేస్తూ.., తమ పాలనకు న్యాయబద్ధత కల్పించుకునే ప్రయత్నం చేసింది. దీనికి బీఆర్ఎస్‌ నుంచి తక్షణ ప్రతివాదం లేకపోవడం కాంగ్రెస్‌కు అదనపు లాభంగా మారింది. రాజకీయాల్లో ‘లేనివాడే ఓడినవాడు’ అన్న మాటకు ఈ పరిణామాలు బలమిస్తున్నాయి. సభలో ఉండి పోరాడడం ఒక విధానం. బయట నిరసన మరో విధానం. కానీ రెండింటినీ సమతుల్యంగా నడపకపోతే నష్టం తప్పదన్న హెచ్చరికగా ఈ ఘటన మారుతోంది. బీఆర్ఎస్‌ నాయకత్వం ఈ బాయ్‌కాట్‌ నిర్ణయాన్ని తిరిగి సమీక్షించుకోవాలా? లేక ఇదే వ్యూహాన్ని కొనసాగిస్తుందా? అన్న ప్రశ్నలు ఇప్పుడు చర్చకు వస్తున్నాయి.

ప్రతిపక్షంపై విమర్శలు..

ప్రజాస్వామ్యంలో ప్రతిపక్షం పాత్ర కేవలం విమర్శలకే పరిమితం కాదు. అధికార పక్షాన్ని నిలదీయడం, వాస్తవాలను ప్రజల ముందుంచడం, తప్పులను ఎత్తిచూపడం అన్నీ ప్రధానంగా అసెంబ్లీ వేదికపైనే జరుగాలి. ఆ వేదికను ఖాళీ చేస్తే, రాజకీయ యుద్ధంలో ఒక చేయి కట్టుకున్నట్టే అవుతుంది. బీఆర్ఎస్‌ బాయ్‌కాట్‌ నిర్ణయం అచ్చంగా అలాంటి పరిస్థితిని సృష్టించిందన్న అభిప్రాయం బలపడుతోంది. ఇప్పుడు ప్రశ్న ఒక్కటే ఇది తాత్కాలిక వ్యూహాత్మక తప్పిదమా? లేక భవిష్యత్ రాజకీయాలకు ప్రభావం చూపే స్వయంకృతాపరాధమా? సమాధానం రాబోయే అసెంబ్లీ సమావేశాల్లో బీఆర్ఎస్‌ తీసుకునే నిర్ణయాలపై ఆధారపడి ఉంటుంది. కానీ ఒక విషయం మాత్రం స్పష్టం—అసెంబ్లీ బాయ్‌కాట్‌ ఈసారి బీఆర్ఎస్‌కు అనుకున్న లాభం ఇవ్వలేకపోయింది.