రష్యా, చైనా, భారత్ ఒక్కటైతే.. అమెరికాకు ప్రమాదమే..

అమెరికా మాజీ జాతీయ భద్రతా సలహాదారు జాన్ బోల్టన్, అమెరికా అధ్యక్షుడు డొనాల్డ్ ట్రంప్ అనుసరించిన విదేశీ విధానాలపై తీవ్ర విమర్శలు గుప్పించారు. ముఖ్యంగా భారతదేశంపై విధించిన వాణిజ్య సుంకాలు అమెరికాకు వ్యూహాత్మకంగా ఎంత ప్రమాదకరమో ఆయన స్పష్టం చేశారు. ఈ నిర్ణయాలు రష్యా, చైనా, భారతదేశాలను ఒక కూటమిగా దగ్గర చేస్తాయని, ఇది అమెరికాకు భారీ నష్టం కలిగిస్తుందని ఆయన హెచ్చరించారు.

-భారత్‌పై సుంకాల వెనుక కారణం

రష్యా నుంచి చమురు దిగుమతి చేసుకుంటున్న కారణంగా భారతదేశంపై అమెరికా 25 శాతం అదనపు సుంకం విధించింది. కానీ, రష్యా చమురును భారీగా కొనుగోలు చేస్తున్న చైనాపై మాత్రం ఎలాంటి సుంకాలూ విధించకపోవడంపై బోల్టన్ అన్యాయమని మండిపడ్డారు. ఈ పక్షపాత వైఖరి భారత్‌లో తీవ్ర అసంతృప్తికి కారణమైందని ఆయన వెల్లడించారు.

-వ్యూహాత్మక ప్రమాదం: మోస్కో, బీజింగ్‌, ఢిల్లీ

బోల్టన్ తన వ్యాఖ్యలలో ఒక ముఖ్యమైన విషయాన్ని ప్రస్తావించారు: "మాస్కో, బీజింగ్‌, ఢిల్లీ ఒక్కటైతే అమెరికాకు వ్యూహాత్మకంగా భారీ నష్టం జరుగుతుంది." భారత్‌పై సుంకాలు విధించడం వల్ల ఈ మూడు దేశాల మధ్య సంబంధాలు మరింత బలోపేతం అవుతాయని, ఇది ట్రంప్ ప్రభుత్వం చేసిన అతి పెద్ద పొరపాటని ఆయన అభిప్రాయపడ్డారు. రష్యా, చైనా, భారత్ మధ్య సంబంధాలు ఇప్పటికే అమెరికాకు ఆందోళన కలిగిస్తున్నాయని బోల్టన్ గుర్తు చేశారు. గతంలో పుతిన్ భారత్ పర్యటన, ప్రధాని మోదీ చైనా పర్యటనలు ఈ ఆందోళనలను మరింత పెంచాయని ఆయన పేర్కొన్నారు.

-భవిష్యత్ సవాళ్లు

రష్యా అధ్యక్షుడు పుతిన్ త్వరలో భారత్‌ను సందర్శించనుండటం, అదే విధంగా ప్రధాని మోదీ షాంఘై సహకార సంస్థ శిఖరాగ్ర సమావేశానికి హాజరవుతుండటం వంటి పరిణామాలు అమెరికాకు కొత్త వ్యూహాత్మక సవాళ్లను సృష్టిస్తాయని బోల్టన్ స్పష్టం చేశారు.

ట్రంప్ విధించిన వాణిజ్య సుంకాలు భారతదేశాన్ని అమెరికా నుంచి దూరం చేసి, చైనా-రష్యా వైపు మరింత దగ్గర చేసే అవకాశాలు ఉన్నాయని జాన్ బోల్టన్ గట్టిగా హెచ్చరించారు. ఈ నిర్ణయాలు అమెరికా ప్రపంచ నాయకత్వానికి ప్రమాదకరమని ఆయన అన్నారు.