బిట్‌కాయిన్‌ : డిజిటల్‌ యుగంలో కొత్త ఆర్థిక విప్లవం

డిజిటల్ యుగంలో బిట్‌కాయిన్‌ సృష్టించిన ప్రకంపనలు ఇప్పటికీ కొనసాగుతున్నాయి. 2009లో మర్మమైన సతోషి నకమోటో చేత ఒక ప్రయోగంగా మొదలైన ఈ క్రిప్టోకరెన్సీ.. నేడు ప్రపంచవ్యాప్తంగా పెట్టుబడిదారుల దృష్టిని ఆకర్షిస్తూ ఒక భారీ ఆర్థిక విప్లవంకు నాంది పలికింది.

*అనూహ్యంగా ఆకాశాన్ని తాకిన విలువ

బిట్‌కాయిన్‌ ప్రయాణం ఒక అద్భుతమైన వృద్ధి కథనం. 2010లో ఒక్క కాయిన్‌ విలువ భారత కరెన్సీలో కేవలం రూ.2గా ఉండగా, కాలక్రమేణా దాని విలువ అమాంతం పెరిగింది. ప్రస్తుత మార్కెట్ ట్రెండ్‌ల ప్రకారం, ఒక్క బిట్‌కాయిన్ విలువ సుమారుగా $1,25,000 డాలర్ల మార్కును దాటింది. భారత కరెన్సీ ప్రకారం ఇది దాదాపు రూ.1.08 కోట్ల నుండి రూ.1.11 కోట్లకు పైగానే ఉంది. ఈ స్థాయిలో విలువ పెరగడానికి వెనుక ముఖ్యంగా రెండు బలమైన కారణాలు ఉన్నాయి.

మొత్తం బిట్‌కాయిన్‌లు 21 మిలియన్లు మాత్రమే మైన్ చేయబడతాయి. బంగారం మాదిరిగానే దీనికి పరిమితత్వం ఉండడం వల్ల డిమాండ్ పెరిగి, విలువ పెరుగుతోంది. ఏ ప్రభుత్వం, బ్యాంక్ లేదా సంస్థ నియంత్రణ లేకుండా బ్లాక్‌చెయిన్‌ అనే వికేంద్రీకృత టెక్నాలజీపై పనిచేయడం వలన పెట్టుబడిదారులు దీనిని స్వతంత్ర , సురక్షిత ఆస్తిగా భావిస్తున్నారు.

*విలువ పెరగడానికి తాజా కారణాలు

ఇటీవలి కాలంలో బిట్‌కాయిన్ విలువ ఇంత భారీగా పెరగడానికి అంతర్జాతీయంగా కొన్ని కీలక పరిణామాలు తోడ్పడ్డాయి. అమెరికా ప్రభుత్వ 'షట్‌డౌన్‌' వంటి అంశాల కారణంగా పెట్టుబడిదారులలో ఆందోళన పెరిగి, డాలర్ విలువ తగ్గిన సందర్భాలలో, డబ్బును సురక్షితమైన ఆస్తులలో ఉంచుకోవాలనే ధోరణి పెరిగింది. దీనితో బిట్‌కాయిన్ వంటి డిజిటల్ ఆస్తులలోకి పెట్టుబడులు మళ్లాయి.

పెద్ద పెద్ద ఆర్థిక సంస్థలు, కార్పొరేట్లు బిట్‌కాయిన్ లింక్డ్ ఎక్స్ఛేంజ్ ట్రేడెడ్ ఫండ్స్‌ (ETFs) లో పెట్టుబడులు పెట్టడం, క్రిప్టోకరెన్సీపై విశ్వాసాన్ని మరింత పెంచింది. క్రిప్టోకరెన్సీపై భవిష్యత్తులో కఠినమైన నియంత్రణలు ఉండకపోవచ్చనే రాజకీయ సంకేతాలు కూడా మార్కెట్‌లో సానుకూల వాతావరణాన్ని సృష్టించాయి.

ఈ పరిస్థితులు బిట్‌కాయిన్‌కు రికార్డు స్థాయిలో పెట్టుబడులను, స్థిరమైన డిమాండ్‌ను తీసుకువచ్చాయి.

* రిస్క్‌తో కూడిన రివార్డ్‌: నిపుణుల హెచ్చరిక

బిట్‌కాయిన్ అనేది పూర్తిగా మార్కెట్ డిమాండ్‌పై ఆధారపడి ఉంటుంది. దీని వెనుక సెంట్రల్‌ బ్యాంక్ లేకపోవడం వలన ఇది అత్యంత అస్థిరత కలిగిన పెట్టుబడి. ఒక్కరోజులోనే లక్షల్లో పెరగడం లేదా పడిపోవడం జరగవచ్చు. అందుకే ఆర్థిక నిపుణులు దీనిని "హై రిస్క్‌ – హై రివార్డ్‌" కలిగిన పెట్టుబడిగా వ్యవహరిస్తున్నారు.

క్రిప్టోకరెన్సీలను నియంత్రించాలా లేదా నిషేధించాలా అనే దానిపై ఇప్పటికీ ప్రపంచ దేశాల మధ్య, ముఖ్యంగా జీ20 వేదికల్లో, కసరత్తు జరుగుతోంది. అంతర్జాతీయంగా ఏకాభిప్రాయం అవసరం అని నిపుణులు భావిస్తున్నారు.

భారత్‌లో హైప్

ఒకప్పుడు క్రిప్టో కరెన్సీని వేగంగా అడాప్ట్ చేసుకున్న దేశాలలో భారతదేశం అగ్రస్థానంలో ఉంది. అయితే ద్రవ్యోల్బణం ప్రభావం, భవిష్యత్తు కరెన్సీగా దీనికి ఉన్న అస్థిరత వంటి అంశాలపై చర్చలు ఇంకా కొనసాగుతున్నాయి.

భవిష్యత్‌ దిశ: బిట్‌కాయిన్ VS డిజిటల్ రూపాయి

బిట్‌కాయిన్ ఒక ప్రైవేట్ వర్చువల్ కరెన్సీగా ఉండగా.. భారత రిజర్వ్ బ్యాంక్ (RBI) తీసుకొచ్చిన 'డిజిటల్ రూపాయి' (CBDC) అనేది కేంద్ర బ్యాంక్ నియంత్రణలో ఉండే డిజిటల్ కరెన్సీ.

డిజిటల్ రూపాయి (e₹): ఇది క్రిప్టోకరెన్సీల మాదిరిగా వికేంద్రీకృతం కాదు, దీనిపై ఆర్బీఐ నియంత్రణ ఉంటుంది. దీని ద్వారా నకిలీ కరెన్సీ, హవాలా వంటి మోసాలకు చెక్ పెట్టవచ్చని, చెల్లింపుల నిర్వహణ ఖర్చు తగ్గుతుందని నిపుణులు భావిస్తున్నారు.

బిట్‌కాయిన్ (BTC): ఇది నియంత్రణ లేని, ప్రపంచవ్యాప్త లావాదేవీలకు ఉపయోగపడే ఒక పెట్టుబడి ఆస్తిగా తన ప్రభావాన్ని చూపుతోంది.

ఏదేమైనా డిజిటల్ కరెన్సీల యుగం మొదలైంది అనడంలో ఎలాంటి సందేహం లేదు. బిట్‌కాయిన్ ఈ ప్రయాణంలో మొదటి అడుగు వేసింది.