ఇంజిన్ లో ఇరుక్కున్న పక్షి.. విశాఖ-హైదరాబాద్ విమానం

విశాఖపట్నం నుంచి హైదరాబాద్ వెళ్తున్న ఎయిర్ ఇండియా విమానానికి పెను ప్రమాదం తృటిలో తప్పింది. గురువారం మధ్యాహ్నం 2.20 గంటలకు విశాఖపట్నం అంతర్జాతీయ విమానాశ్రయం నుంచి టేకాఫ్ అయిన వెంటనే విమానం ఇంజిన్‌లోకి ఒక పక్షి దూసుకువచ్చి ఇరుక్కుపోయింది. ఈ ఘటనతో ఇంజిన్‌లో సాంకేతిక సమస్యలు తలెత్తే పరిస్థితి ఏర్పడింది. విమానంలో 103 మంది ప్రయాణికులు.. సిబ్బంది ఉన్నారు.

* పైలట్ అప్రమత్తతతో ల్యాండింగ్:

విమానంలో సాంకేతిక సమస్య తలెత్తిన వెంటనే పైలట్ అప్రమత్తంగా వ్యవహరించారు. విమానం ఇంజిన్‌లో సమస్య ఉన్నట్లు గుర్తించిన వెంటనే ఎయిర్ ట్రాఫిక్ కంట్రోల్ (ఏటీసీ)కి సమాచారం అందించారు. అనంతరం విమానాన్ని వెనక్కి మళ్లించి విశాఖ ఎయిర్‌పోర్టులో సురక్షితంగా ల్యాండ్ చేశారు. ఈ అత్యవసర ల్యాండింగ్ వల్ల ప్రయాణికులు, సిబ్బంది అందరూ సురక్షితంగా బయటపడ్డారు. పైలట్ చాకచక్యానికి అందరూ ప్రశంసలు కురిపించారు.

ఎయిర్ ఇండియా చర్యలు:

ఈ ఘటనపై స్పందించిన ఎయిర్ ఇండియా అధికారులు, ప్రయాణికులను సురక్షితంగా వారి గమ్యస్థానాలకు చేర్చడానికి ప్రత్యామ్నాయ ఏర్పాట్లు చేశారు. ప్రయాణికుల భద్రతకు తాము అత్యధిక ప్రాధాన్యత ఇస్తామని వారు స్పష్టం చేశారు. విమానం సాంకేతిక సమస్యను పరిష్కరించడానికి ఇంజనీర్ల బృందం పని ప్రారంభించింది.

పక్షుల బెడద - విమానయాన భద్రతపై చర్చ:

ఈ ఘటనతో విమానయాన భద్రతపై మరోసారి చర్చ మొదలైంది. విమానాశ్రయాల చుట్టుపక్కల పక్షుల బెడదను నియంత్రించడంపై మరింత శ్రద్ధ పెట్టాలని నిపుణులు సూచిస్తున్నారు. గత కొద్ది రోజులుగా ఇలాంటి సంఘటనలు పెరుగుతుండడం ఆందోళన కలిగిస్తోంది. నాలుగు రోజుల క్రితం లక్నో నుంచి ఢిల్లీకి బయల్దేరిన ఇండిగో విమానానికి కూడా సాంకేతిక సమస్యలు తలెత్తడంతో చివరి నిమిషంలో టేకాఫ్ నిలిపివేయాల్సి వచ్చింది. ఆ ఘటనలో 151 మంది ప్రయాణికులు సురక్షితంగా బయటపడ్డారు.

విమానాశ్రయ పరిసరాల్లో పక్షుల సంచారాన్ని తగ్గించడానికి అధునాతన సాంకేతిక పరిజ్ఞానాన్ని ఉపయోగించడం, పక్షులను తరిమికొట్టడానికి ప్రత్యేక బృందాలను ఏర్పాటు చేయడం వంటి చర్యలు తీసుకోవాలని నిపుణులు సూచిస్తున్నారు. ఈ ఘటనల పునరావృతం కాకుండా ఉండటానికి పౌర విమానయాన సంస్థలు మరింత పకడ్బందీ చర్యలు తీసుకోవాలని ప్రయాణికులు కోరుతున్నారు.