దేశంలో 'టమోటా' వైరస్... పిల్లలు జాగ్రత్త.. స్కూల్స్ హెచ్చరికలు!

కోవిడ్-19 మహమ్మారి తరువాత దేశంలో మరో సరికొత్త వైరస్ తెరపైకి వచ్చింది. ఇందులో భాగంగా... మధ్యప్రదేశ్ రాష్ట్ర రాజధాని భోపాల్ లోని పాఠశాల పిల్లలలో ఒక ప్రత్యేకమైన అనారోగ్యం వ్యాపిస్తూ కలకలం సృష్టిస్తోంది. ఈ వైరస్ సోకిన వారికి చేతులు, పాదాలు, అరికాళ్లు, మెడ కింద, నోటిలో ఎర్రటి దద్దుర్లు కనిపిస్తున్నాయి. తర్వాత అవి బొబ్బలుగా మారుతున్నాయి.

అవును... మధ్యప్రదేశ్‌ లో టమోటా వైరస్ కలకలం సృష్టిస్తోంది. ఇందులో భాగంగా ఆ రాష్ట్ర రాజధాని భోపాల్‌ లో పాఠశాల పిల్లల్లో ఈ వైరస్ వ్యాప్తి చెందుతోంది. చిన్నారుల్లో దురద, మంట, నొప్పిగా అనిపించడంతో పాటు జ్వరం, గొంతునొప్పి లక్షణాలు కనిపిస్తున్నాయని.. ఇది ఒకరి నుంచి ఒకరికి వ్యాపిస్తుందని చెబుతున్నారు. ఈ లక్షణాలతో అప్రమత్తగా ఉండాలని సూచిస్తున్నారు.

12 సంవత్సరాల కంటే తక్కువ వయస్సు ఉన్న పిల్లలకు ఎఫెక్ట్!:

ఈ వైరస్ గురించి పిల్లల వైద్య నిపుణులు మాట్లాడుతూ... టమోటా వైరస్ ను సాధారణంగా 'హ్యాండ్, ఫుట్, మౌత్ డిసీజ్' (హెచ్‌.ఎఫ్‌.ఎం.డీ) అని పిలుస్తారని.. ఈ వ్యాధి ఎచినోకాకస్, కాక్స్సాకీవైరస్ వల్ల వస్తుందని తెలిపారు. ఈ వ్యాధి సాధారణంగా 6 నెలల నుండి 12 సంవత్సరాల మధ్య వయస్సు ఉన్న పిల్లలలో సంభవిస్తుందని.. ఇది చేతులు, కాళ్ళు, నోటి లోపల స్పష్టమైన దద్దుర్లుతో పాటు జ్వరాన్ని కలిగిస్తుందని తెలిపారు.

ఇదే సమయంలో... ఈ హెచ్‌.ఎఫ్‌.ఎం.డీ మామూలు సమస్యేనని, పెద్దగా ఆందోళన పడాల్సిన పనిలేదని చెప్పిన డాక్టర్ రాజేష్... ఈ వైరస్ వారం, పది రోజుల్లో దానంతటదే తగ్గిపోతుందని అన్నారు. దీనికి కారణమయ్యే వైరస్‌ చాలావరకు మల విసర్జన తర్వాత చేతులు సరిగా కడుక్కోకపోవటం, పరిశుభ్రత పాటించకపోవడం వల్ల వ్యాపిస్తుందని తెలిపారు.

పాఠశాలలు హెచ్చరిక జారీ!:

భోపాల్‌ లోని చాలా ప్రీ-స్కూళ్లలో పిల్లలు టమాటో వైరస్ బారిన పడ్డారని అంటున్నారు. ఈ నేపథ్యంలో ఈ వైరస్ బారిన పడిన పిల్లలున్న పాఠశాలల యాజమాన్యం ఈ వ్యాధి గురించి తల్లిదండ్రులను అప్రమత్తం చేసి, అలాంటి పిల్లలను పాఠశాలకు పంపవద్దని విజ్ఞప్తి చేసింది. ఈ వ్యాధి ఒకరి నుండి మరొకరికి వ్యాపిస్తుండటం వల్ల.. మన బిడ్డకు ఈ వ్యాధి ఉంటే, అతన్ని ఇతర పిల్లలతో కలవనివ్వకండని.. ఇది మన సామాజిక బాధ్యత కూడా అని వైద్యులు చెబుతున్నారు.