మ్యాచ్ లో బంతి మెడకు తగిలి.. మరో యువ క్రికెటర్ దుర్మరణం
ఆస్ట్రేలియా క్రికెట్లో మరో విషాదం చోటుచేసుకుంది. పదకొండేళ్ల క్రితం ఫిల్ హ్యూస్ తలకు బంతి తగిలి మైదానంలోనే కుప్పకూలిన ఘటన ప్రపంచాన్ని కుదిపేసింది.
By: A.N.Kumar | 30 Oct 2025 12:18 PM IST
ఆస్ట్రేలియా క్రికెట్లో మరో విషాదం చోటుచేసుకుంది. పదకొండేళ్ల క్రితం ఫిల్ హ్యూస్ తలకు బంతి తగిలి మైదానంలోనే కుప్పకూలిన ఘటన ప్రపంచాన్ని కుదిపేసింది. ఇప్పుడా ఘటనను తలపించేలా 17 ఏళ్ల యువ క్రికెటర్ బెన్ అస్టిన్ దుర్మరణం పాలయ్యాడు.
మెల్బోర్న్కు చెందిన అస్టిన్ మంగళవారం మధ్యాహ్నం ఫెర్న్ట్రీ గల్లీలోని వ్యాలీ ట్యూ రిజర్వ్ మైదానంలో టీ20 మ్యాచ్కు సిద్ధమవుతూ నెట్స్లో ప్రాక్టీస్ చేస్తున్నాడు. బౌలింగ్ మెషీన్ నుంచి వచ్చిన ఓ బంతి అతడి హెల్మెట్ కింద భాగంలో, తల-మెడ మధ్యలో బలంగా తాకింది. ఆ దెబ్బతో అస్టిన్ మైదానంలోనే కుప్పకూలిపోయాడు. సహచరులు వెంటనే స్పందించి అత్యవసర చికిత్స అందించినా ఫలితం లేకపోయింది.
అస్టిన్ను మోనాష్ మెడికల్ సెంటర్కు తరలించి రెండు రోజులపాటు వైద్యులు ప్రాణం కోసం పోరాడారు. అయితే గురువారం ఉదయం వైద్యులు అతడి మృతిని ధృవీకరించారు.
క్లబ్ తీవ్ర విచారం
ఫెర్న్ట్రీ గల్లీ క్రికెట్ క్లబ్ ఒక ప్రకటన విడుదల చేస్తూ “బెన్ ఆకస్మిక మరణం మమ్మల్ని తీవ్రంగా కలచివేసింది. అతడి మృతి మా క్రికెట్ కమ్యూనిటీలో ప్రతి ఒక్కరినీ ప్రభావితం చేస్తుంది. ఈ సమయంలో బెన్ కుటుంబానికి గోప్యత ఇవ్వాలని మనమందరం కోరుతున్నాం” అని తెలిపింది.
భవిష్యత్తుపై ఎన్నో కలలు
బెన్ అస్టిన్ ప్రతిభావంతుడైన యువ ఆటగాడు. భవిష్యత్తులో ఆస్ట్రేలియా జాతీయ జట్టుకు ప్రాతినిధ్యం వహించాలని కలగన్నాడు. క్రికెట్తో పాటు ఫుట్బాల్ ఆటలోనూ అతడు చురుకుగా పాల్గొనేవాడు. క్రికెట్ బ్యాట్ పట్టకముందు వేవర్లీ పార్క్ హాక్స్ తరపున జూనియర్ ఫుట్బాల్ ఆడాడు. తరువాత ముల్గ్రేవ్, ఎల్డాన్ పార్క్ క్లబ్లకు ప్రాతినిధ్యం వహించాడు.
క్రికెటర్లు, మాజీ ఆటగాళ్లు, అభిమానులు సోషల్ మీడియాలో సంతాపం వ్యక్తం చేస్తున్నారు. పదకొండేళ్ల క్రితం ఫిల్ హ్యూస్ దురదృష్టవశాత్తూ తలకు బంతి తగిలి మరణించిన సంఘటన తర్వాత మళ్లీ ఇలాంటి ఘటన జరగడం క్రీడా ప్రపంచాన్ని కలవరపెడుతోంది.
బెన్ అస్టిన్ స్మృతిలో ఆస్ట్రేలియా క్రికెట్ సమాజం దుఃఖంలో మునిగిపోయింది.