కొడుకు నిశ్చితార్థంపై క్లారిటీ ఇచ్చిన సచిన్

క్రికెట్‌ దిగ్గజం సచిన్‌ టెండూల్కర్‌ కుమారుడు అర్జున్‌ టెండూల్కర్‌ నిశ్చితార్థంపై ఎట్టకేలకు స్పష్టత వచ్చింది. ఇటీవల కాలంగా సోషల్‌ మీడియాలో ఈ విషయంపై అనేక వార్తలు, ఊహాగానాలు చక్కర్లు కొట్టాయి. ఈ నేపథ్యంలో సచిన్ టెండూల్కర్ స్వయంగా ఈ విషయాన్ని ధృవీకరించడంతో అభిమానులలో ఆనందం నెలకొంది.

- ప్రైవేట్ వేడుకలో ఉంగరాలు మార్చుకున్న అర్జున్ - సానియా

క్రికెటర్ అర్జున్ టెండూల్కర్‌కు ముంబైకి చెందిన వ్యాపారవేత్త రవి ఘై మనవరాలైన సానియా చందోక్‌తో ఈ నెల 13న నిశ్చితార్థం జరిగింది. ఈ వేడుక అత్యంత ప్రైవేట్‌గా, కేవలం ఇరు కుటుంబ సభ్యులు.. సన్నిహితుల మధ్య జరిగింది. అందుకే దీనికి సంబంధించిన ఎలాంటి ఫోటోలు కూడా బయటికి రాలేదు.

- సచిన్ నోటి నుంచి అధికారిక ప్రకటన

సచిన్ టెండూల్కర్ ఒక సోషల్ మీడియా "ఆస్క్ మీ ఎనీథింగ్" సెషన్‌లో ఒక అభిమాని అడిగిన ప్రశ్నకు బదులిస్తూ, తన కుమారుడి నిశ్చితార్థం విషయాన్ని ధృవీకరించారు. “అవును, అతనికి నిశ్చితార్థం జరిగింది. అతడి కొత్త ప్రయాణం పట్ల మేమంతా చాలా సంతోషంగా ఉన్నాం” అని సచిన్ వెల్లడించారు. ఈ ప్రకటనతో ఇప్పటివరకు సాగిన ఊహాగానాలకు తెరపడింది.

-అర్జున్ - సానియా నేపథ్యం

25 ఏళ్ల అర్జున్ టెండూల్కర్ ప్రస్తుతం దేశీయ క్రికెట్‌లో గోవా జట్టుకు ప్రాతినిధ్యం వహిస్తున్నాడు. అలాగే ఐపీఎల్‌లో ముంబయి ఇండియన్స్‌ తరఫున ఆడాడు. అర్జున్ లెఫ్టార్మ్ ఫాస్ట్ బౌలర్, బ్యాటర్‌గా ఆల్ రౌండర్ పాత్ర పోషిస్తాడు.

26 ఏళ్ల సానియా చందోక్ ప్రముఖ వ్యాపారవేత్త రవి ఘై మనవరాలు. రవి ఘై 'గ్రావిస్ గ్రూప్'ను నిర్వహిస్తారు. ఈ సంస్థ ఫుడ్, హాస్పిటాలిటీ రంగాల్లో ప్రముఖ స్థానంలో ఉంది. 'బాస్కిన్ రాబిన్స్ ఇండియా' ఫ్రాంచైజీ, 'బ్రూక్లిన్ క్రీమరీ' వంటి బ్రాండ్లు ఈ గ్రూప్ లోనివే. గత ఆర్థిక సంవత్సరంలో ఈ సంస్థ రూ.624 కోట్ల టర్నోవర్‌ సాధించినట్లు సమాచారం.

- శుభాకాంక్షల వెల్లువ

అర్జున్, సానియా సోషల్ మీడియాలో నిశ్చితార్థం గురించి ఎలాంటి పోస్టులు చేయకపోయినా, ఈ శుభవార్త తెలిసిన అభిమానులు, క్రికెట్ ప్రేమికులు వారికి శుభాకాంక్షల వెల్లువ కురిపిస్తున్నారు.