ఆటో డ్రైవర్ లుక్ లో బాబు, పవన్, లోకేష్... పిక్స్ వైరల్!

ఆటో, ట్యాక్సీ, మ్యాక్సీ క్యాబ్‌ డ్రైవర్లకు ఆర్థికసాయం అందించే 'ఆటో డ్రైవర్ల సేవలో' పథకాన్ని ఆంధ్రప్రదేశ్ ముఖ్యమంత్రి చంద్రబాబు ప్రారంభించారు. విజయవాడ సింగ్‌ నగర్‌ లోని బసవపున్నయ్య స్టేడియంలో జరిగిన ఈ కార్యక్రమంలో చంద్రబాబుతో పాటు ఉప ముఖ్యమంత్రి పవన్ కల్యాణ్, మంత్రి నారా లోకేష్ పాల్గొన్నారు. ఈ సందర్భంగా వీరి ఫోటోలు వైరల్ గా మారాయి.

అవును... ఆటో, ట్యాక్సీ, మ్యాక్సీ క్యాబ్‌ డ్రైవర్లకు ఆర్థికసాయం అందించే ‘ఆటో డ్రైవర్ల సేవలో’ పథకాన్ని చంద్రబాబు ప్రారంభించారు. ఈ పథకం ద్వారా ఆటో డ్రైవర్లకు ఏడాదికి రూ.15 వేల ఆర్థిక సాయం అందించింది. ఈ క్రమంలో... తొలి ఏడాది 2,90,669 మంది డ్రైవర్లకు రూ.436 కోట్ల మేర వారి వారి ఖాతాల్లో ప్రభుత్వం జమ చేసింది.

ఈ పథకం వల్ల 2.64 లక్షల మంది ఆటో డ్రైవర్లకు, 20,072 మంది ట్యాక్సీ క్యాబ్‌ డ్రైవర్లకు, 6,400 మంది మ్యాక్సీ క్యాబ్‌ డ్రైవర్లకు లబ్ధి చేకూరనుంది. అర్హులై ఉండి ఈ పథకం అందనివారి ఫిర్యాదుల స్వీకరించేందుకు ప్రభుత్వం ప్రత్యేక వ్యవస్థను ఏర్పాటు చేసింది.

ఆటో డ్రైవర్స్ లుక్ లో నేతలు..!:

ఈ కార్యక్రమం సందర్భంగా... ఉండవల్లి నుంచి ఆటోలో సింగ్‌ నగర్‌ కు ఏపీ సీఎం చంద్రబాబు నాయుడు, డిప్యూటీ సీఎం పవన్ కల్యాణ్, మంత్రి నారా లోకేష్ బయల్దేరారు. ఈ సందర్భంగా ఈ ముగ్గురు కీలక వ్యక్తులు ఆటో డ్రైవర్ యూనిఫాంలో కనిపించారు. దానితో పాటు ఆటో డ్రైవర్లతో కలిసి కూర్చుని వారితో సంభాషించారు. దీనికి సంబంధించిన ఫోటోలు, వీడియోలు వైరల్ గా మారాయి.

ఈ సందర్భంగా స్పందించిన చంద్రబాబు.... ఆటో డ్రైవర్లలో చాలా మంది పేద వాళ్లే ఉంటారని, వారికి ఏడాదికి రూ.15 వేలు ఇస్తే కొంత ఊరటగా ఉంటుందని తెలిపారు. ఇదే సమయంలో... గత ప్రభుత్వంలో రోడ్లన్నీ గతుకులే గతుకులని, ఆ గతుకుల రోడ్లతో డ్రైవర్లు చాలా ఇబ్బంది పడ్డారని.. అయితే, మన ప్రభుత్వంలో ఎప్పుడూ ఆ పరిస్థితి రానివ్వమని అన్నారు.