నేతాజీ అవశేషాలు: మోడీకి నేతాజీ కుమార్తె భావోద్వేగపూరిత విజ్ఞప్తి

భారత స్వాతంత్ర్య పోరాట యోధుడు నేతాజీ సుభాష్ చంద్రబోస్ కుమార్తె అనితా బోస్ ప్పాఫ్, ప్రధాని నరేంద్ర మోదీకి ఒక భావోద్వేగపూరిత విజ్ఞప్తి చేశారు. తన తండ్రి అవశేషాలను జపాన్‌లోని టోక్యో నుంచి భారతదేశానికి తీసుకురావాలని ఆమె కోరారు. ప్రధాని మోదీ ప్రస్తుతం జపాన్ పర్యటనలో ఉన్న సందర్భంగా ఈ అభ్యర్థన చేశారు.

-నేతాజీ మరణంపై ఉన్న అస్పష్టత:

1945 ఆగస్టు 18న తైవాన్‌లోని తైపేలో జరిగిన విమాన ప్రమాదంలో నేతాజీ మరణించారని సాధారణంగా నమ్ముతారు. ఆ తర్వాత ఆయన అవశేషాలను జపాన్‌లోని రెంకోజీ బౌద్ధ దేవాలయంలో భద్రపరిచినట్లు చెబుతారు. అయితే, ఈ విమాన ప్రమాదంలో నేతాజీ మరణించలేదని, అది ఒక కుట్ర అని కొందరు చరిత్రకారులు వాదిస్తూ వచ్చారు. ఈ అంశంపై దశాబ్దాలుగా అనేక వివాదాలు, సందేహాలు కొనసాగుతున్నాయి. అనేక కమిషన్లు కూడా నేతాజీ మరణంపై నివేదికలు సమర్పించినప్పటికీ, ఈ విషయంలో స్పష్టత రాలేదు.

అనితా బోస్ ప్పాఫ్ విజ్ఞప్తి

తన తండ్రి అవశేషాలను తిరిగి భారతదేశానికి తీసుకురావాలని అనితా బోస్ ప్పాఫ్ చాలాకాలంగా కోరుతున్నారు. ప్రధాని మోదీ జపాన్ పర్యటన నేపథ్యంలో ఆమె ఈ అవకాశాన్ని ఉపయోగించుకుని “నా తండ్రి ఈ మట్టి కోసం, ఈ జాతి కోసం తన ప్రాణాలను అర్పించారు. ఆయనకు తగిన గౌరవం ఇవ్వాలంటే అవశేషాలు భారత్‌లో ఉండాలి. దానిని సాధించగల సామర్థ్యం మీకు ఉంది మోదీజీ,” అని ప్రధానిని కోరారు.

-ప్రభుత్వ స్పందనపై ఉత్కంఠ

నేతాజీ వారసులు, కుటుంబ సభ్యులు, అలాగే దేశ ప్రజలు దశాబ్దాలుగా ఆయన అవశేషాలను తిరిగి తీసుకురావాలని డిమాండ్ చేస్తున్నారు. గతంలో ఈ విషయంలో వివిధ ప్రభుత్వాలు చొరవ చూపినప్పటికీ స్పష్టమైన పురోగతి లేదు. ఈ నేపథ్యంలో ప్రధాని మోదీ ఈ విజ్ఞప్తిపై ఎలా స్పందిస్తారన్న దానిపై దేశవ్యాప్తంగా ఆసక్తి నెలకొంది. నేతాజీకి తగిన గౌరవం ఇవ్వడం, దేశ ప్రజల ఆకాంక్షలను నెరవేర్చడం కోసం ప్రభుత్వం ఎలాంటి నిర్ణయం తీసుకుంటుందో వేచి చూడాలి.