వలసదారులే వలసలను అనడమా? నిక్కీ హేలీ కొడుక్కి జర్నలిస్ట్ ఇచ్చిపడేశాడు

అమెరికా రాజకీయాల్లో మరోసారి వలసల అంశం చర్చకు దారితీసింది. రిపబ్లికన్ నేత, మాజీ ఐక్యరాజ్యసమితి రాయబారి నిక్కీ హేలీ కుమారుడు నలిన్ హేలీ చేసిన ఒక ట్వీట్ ఇప్పుడు అమెరికా సోషల్ మీడియాలో హాట్ టాపిక్ అయింది. సామూహిక వలసలు అమెరికా ఉద్యోగ అవకాశాలను దెబ్బతీస్తున్నాయని ఆయన చేసిన వ్యాఖ్యలపై తీవ్రమైన విమర్శలు వెల్లువెత్తుతున్నాయి.

* నలిన్ హేలీ వివాదాస్పద ట్వీట్

"అమెరికాకు వలసలు ఆపాలి. విదేశాల నుంచి వచ్చే వలసల వల్ల స్థానిక అమెరికన్లకు ఉద్యోగాలు దొరకడం లేదు" అంటూ నలిన్ హేలీ ట్వీట్ చేశారు. ఈ ట్వీట్ అమెరికా అంతటా చర్చకు దారితీసింది. వలసలు, వీసాలు, ఉద్యోగాలు అనే సున్నితమైన అంశంపై ఆయన చేసిన వ్యాఖ్యలను చాలామంది 'ద్వేషపూరితం'గా అభివర్ణించారు.

* "మీ తాత కూడా ఇండియా నుంచే వచ్చారు" : మెహదీ హసన్ రిప్లై

ఆ ట్వీట్‌కు బ్రిటిష్-అమెరికన్ జర్నలిస్ట్ మెహదీ హసన్ ఘాటు సమాధానం ఇచ్చారు. "మీ తాత అజిత్ సింగ్ రంధవా 1969లో ఇండియా నుంచి అమెరికా వలస వచ్చారు. మీరు ఇప్పుడు మాట్లాడుతున్న మాటలు మీ కుటుంబ చరిత్రను మరిచిపోయినట్టు ఉన్నాయి. మీ తాత కూడా వలసదారుడే. మీరు వలసలను విమర్శిస్తే, అదే మీకు వర్తిస్తుంది" అంటూ హసన్ కౌంటర్ ఇచ్చారు. హసన్ రిప్లై సోషల్ మీడియాలో వైరల్ అవ్వడంతో నలిన్ హేలీకి సమాధానం ఇవ్వలేని స్థితి ఏర్పడింది.

* భారతీయుల కష్టపడి సాధించిన స్థానాలు

ప్రస్తుతం అమెరికాలోని టాప్ కంపెనీలలో అనేక సంస్థలకు భారతీయులు సీఈవోలుగా ఉన్నారు. గూగుల్ (సుందర్ పిచాయ్), మైక్రోసాఫ్ట్ (సత్య నాదెళ్ల), అడోబ్ (శాంతను నారాయణ్) మొదలైన వారు. భారతీయులు ఐటి, సైన్స్ అండ్ టెక్నాలజీ, ఫార్మా, బయోటెక్, రీసెర్చ్ వంటి రంగాల్లో కష్టపడి పనిచేసి అమెరికా ఆర్థికవ్యవస్థకు పెద్దదైన తోడ్పాటు అందిస్తున్నారు. తక్కువ వేతనాలతోనైనా అధిక నిబద్ధతతో పనిచేయడం వల్ల అమెరికన్ కంపెనీలు భారతీయులపై విశ్వాసం పెంచుకున్నాయి.

* వలసల ప్రభావం — రెండు కోణాలు

అమెరికాలో వలసలపై రెండు విభిన్న అభిప్రాయాలు ఉన్నాయి. వలసల వల్ల స్థానికులకు ఉద్యోగాలు తగ్గుతున్నాయి. వలసలు అమెరికా ఆర్థిక వ్యవస్థను బలపరిచాయి; టెక్ రంగంలో నైపుణ్యం కలిగిన ప్రజలు కొత్త ఆవిష్కరణలకు మార్గం సుగమం చేశారు.

* ట్రంప్ తర్వాత పెరిగిన వలస వ్యతిరేకత

డొనాల్డ్ ట్రంప్ అధ్యక్షుడిగా వచ్చిన తర్వాత అమెరికాలో "అమెరికా ఫస్ట్ ’’ అనే నినాదం బలంగా వినిపించింది. వీసా నిబంధనలను కఠినతరం చేయడం, వలసదారులపై ఒత్తిడి పెంచడం వంటి చర్యలు తీసుకున్నారు. ఈ విధానాలే నిక్కీ హేలీ కుటుంబానికి దగ్గరగా ఉన్న రాజకీయ వర్గాలలో ఇప్పటికీ కొనసాగుతున్నాయి.

నలిన్ హేలీ చేసిన ట్వీట్ ఒక విషయం స్పష్టంగా చూపించింది. అమెరికాలో వలసల అంశం ఎంత సున్నితమైనదో. అయితే మెహదీ హసన్ ఇచ్చిన రిప్లై మరో ముఖ్యమైన సందేశాన్ని ఇచ్చింది. “ఈరోజు అమెరికా ప్రపంచ శక్తిగా నిలిచినందుకు కారణం వలసదారుల కృషే.” నిక్కీ హేలీ కుటుంబ చరిత్ర కూడా ఆ సత్యాన్ని తేలికగా నిరాకరించలేదనే విషయం ఈ ఘటన మరోసారి నిరూపించింది. “మీ తాత కూడా ఇండియా నుంచే వచ్చాడు” అన్న వాక్యం.. వలసల విలువను గుర్తు చేసే బలమైన సందేశం.