24 ఏళ్లకే రూ.1.8 కోట్ల ఇల్లు.. బెంగళూరులో జెన్జీ యువ పారిశ్రామికవేత్త సక్సెస్ స్టోరీ వైరల్
సొంతిల్లు అనేది చాలా మందికి జీవితకాల కల. ముఖ్యంగా బెంగళూరు వంటి మెట్రో నగరాల్లో రోజురోజుకూ పెరుగుతున్న రియల్ ఎస్టేట్ ధరల మధ్య ఇల్లు కొనుగోలు చేయడం అంత తేలికైన విషయం కాదు.
By: A.N.Kumar | 2 Aug 2026 1:43 AM IST
సొంతిల్లు అనేది చాలా మందికి జీవితకాల కల. ముఖ్యంగా బెంగళూరు వంటి మెట్రో నగరాల్లో రోజురోజుకూ పెరుగుతున్న రియల్ ఎస్టేట్ ధరల మధ్య ఇల్లు కొనుగోలు చేయడం అంత తేలికైన విషయం కాదు. అలాంటి పరిస్థితుల్లో కేవలం 24 ఏళ్ల వయసులోనే రూ.1.8 కోట్ల విలువైన అపార్ట్మెంట్ను సొంతం చేసుకున్న యువ స్టార్టప్ వ్యవస్థాపకుడు ఆకాశ్ నారాయణ్ ప్రస్తుతం సోషల్ మీడియాలో హాట్ టాపిక్గా మారారు. అయితే ఈ విజయాన్ని ఆయన వ్యక్తిగత ఘనతగా కాకుండా తన కుటుంబం, మెంటార్లు, స్నేహితులు, టీమ్ అందరి కృషి ఫలితంగా అభివర్ణించడం మరింత మందిని ఆకట్టుకుంటోంది.
ఆకాశ్ నారాయణ్ బెంగళూరుకు చెందిన లీగల్-టెక్ స్టార్టప్ లీగలిట్ వ్యవస్థాపకుడు. ఆయన వెల్లడించిన వివరాల ప్రకారం బెంగళూరులోని ఎలక్ట్రానిక్ సిటీ సమీపంలో ఉన్న కాసాగ్రాండ్ వివాసిటీ ప్రాజెక్ట్లో రూ.1.8 కోట్ల విలువైన అపార్ట్మెంట్ను కొనుగోలు చేశారు. ప్రస్తుతం నిర్మాణ దశలో ఉన్న ఈ ప్రాజెక్ట్లోని ఫ్లాట్ 2027 ఏప్రిల్ నాటికి ఆయనకు అప్పగించే అవకాశం ఉందని తెలిపారు. ఆయన సంస్థ వార్షిక స్థూల ఆదాయం సుమారు రూ.13 కోట్ల వరకు ఉంటుందని సమాచారం.
తన తొలి ఇంటి కొనుగోలు సందర్భంగా సోషల్ మీడియాలో చేసిన పోస్ట్లో ఆకాశ్ భావోద్వేగంగా స్పందించారు. "24 ఏళ్లకే నా మొదటి అపార్ట్మెంట్ కొనుగోలు చేశాను. కానీ ఇది నా విజయం మాత్రమే కాదు. నా ప్రయాణంలో ప్రతి అడుగులోనూ నా కుటుంబం, మెంటార్లు, స్నేహితులు, నా తొలి టీమ్ సభ్యులు నాతో నిలబడ్డారు. వారి సహకారం లేకపోతే ఈ రోజు సాధ్యమయ్యేది కాదు" అని పేర్కొన్నారు.
ఒకప్పుడు సొంత ఇల్లు కొనడం తనకు అందని కలగా అనిపించేదని ఆయన గుర్తు చేసుకున్నారు. కుటుంబం ఎదుర్కొన్న ఆర్థిక అనిశ్చితి, వ్యక్తిగత సవాళ్లను అధిగమిస్తూ తన తల్లి ఇచ్చిన ప్రోత్సాహం తన జీవితాన్ని మార్చిందని చెప్పారు. అలాగే తనతో కలిసి కష్టపడి పనిచేసిన సహచరులకు ప్రత్యేకంగా కృతజ్ఞతలు తెలిపారు.
తొలి ఇంటి కొనుగోలును జీవితంలో అంతిమ లక్ష్యంగా కాకుండా మరో కొత్త ప్రయాణానికి నాంది అని ఆకాశ్ పేర్కొన్నారు. "ఇది ముగింపు కాదు... ప్రారంభం మాత్రమే" అంటూ తన పోస్టును ముగించారు.
ఆకాశ్ నారాయణ్ కథ ప్రస్తుతం జెన్జీ యువతకు స్ఫూర్తిగా నిలుస్తోంది. చిన్న వయసులోనే పెద్ద విజయాలు సాధించడం మాత్రమే కాదు, ఆ విజయానికి వెనుక ఉన్న కుటుంబం, గురువులు, సహచరుల పాత్రను గుర్తించి వారికి కృతజ్ఞతలు చెప్పడం కూడా నిజమైన విజయానికి నిదర్శనమని నెటిజన్లు ప్రశంసిస్తున్నారు. సోషల్ మీడియాలో ఆయన పోస్ట్కు వేలాది లైకులు, శుభాకాంక్షలు వెల్లువెత్తుతుండగా "కష్టపడితే కలలు నిజమవుతాయి" అనే సందేశాన్ని ఈ యువ పారిశ్రామికవేత్త మరోసారి నిరూపించారని పలువురు అభిప్రాయపడుతున్నారు.