డిజిటల్ మాయాజాలం: టీనేజర్లనే లక్ష్యంగా చేసుకుంటున్న అడల్ట్ కంటెంట్ క్రియేటర్లు!

నేటి డిజిటల్ యుగంలో సోషల్ మీడియా అనేది ఒక శక్తివంతమైన సాధనంగా మారింది. అయితే నాణేనికి ఉన్న రెండో పార్శ్వంలా ఇందులో పొంచి ఉన్న ప్రమాదాలు కూడా అదే స్థాయిలో పెరుగుతున్నాయి. తాజాగా విడుదలైన ఒక నివేదిక సృష్టికర్తల ప్రపంచంలో ఒక ఆందోళనకరమైన ధోరణిని బయటపెట్టింది. పెద్దల కోసం ఉద్దేశించిన అశ్లీల కంటెంట్‌ను రూపొందించే కొంతమంది క్రియేటర్లు.. ఇప్పుడు తమ పంథాను మార్చుకుని టీనేజ్ ప్రేక్షకులను ఆకర్షించేలా తమ ఆన్‌లైన్ ప్రొఫైల్స్‌ను తీర్చిదిద్దుకుంటున్నారు. ఇది డిజిటల్ భద్రత, సామాజిక బాధ్యతపై తీవ్రమైన ప్రశ్నలను లేవనెత్తుతోంది.

ద్వంద్వ వ్యక్తిత్వం వెనుక దాగి ఉన్న కుట్ర

సాధారణంగా సబ్‌స్క్రిప్షన్ ఆధారిత ప్లాట్‌ఫామ్‌లలో ఉదాహరణకు ఓన్లీ ఫ్యాన్స్ వంటివి అశ్లీల కంటెంట్‌ను విక్రయించే క్రియేటర్లు.. ఇప్పుడు టిక్ టాక్ , ఇన్ స్టాగ్రామ్ వంటి వేదికలపై అత్యంత సాధారణమైన కంటెంట్‌తో కనిపిస్తున్నారు. వీరు పోస్ట్ చేసే వీడియోలు ప్రధానంగా లైఫ్‌స్టైల్ వ్లాగ్స్, ఫ్యాషన్, మేకప్ టిప్స్, రోజువారీ జీవనశైలి వీడియోలు ఉంటాయి. పైకి చూస్తే ఇవి చాలా నిరాపరాధంగా, ఆకర్షణీయంగా కనిపిస్తాయి. కానీ ఈ వీడియోల అసలు ఉద్దేశ్యం టీనేజర్ల దృష్టిని ఆకర్షించి వారిని తమ ప్రొఫైల్స్ వైపు మళ్లించుకోవడం. ఒకసారి టీనేజర్లు ఈ క్రియేటర్లను అనుసరించడం మొదలుపెడితే పరోక్షంగా వారి అసలు కంటెంట్ వైపు వెళ్ళే అవకాశం ఎక్కువగా ఉంటుందని నిపుణులు హెచ్చరిస్తున్నారు.

ఆల్గోరిథమ్స్.. ముప్పును పెంచుతున్న సాంకేతికత

ఈ సమస్య ఇంత వేగంగా విస్తరించడానికి సోషల్ మీడియా ప్లాట్‌ఫామ్‌ల ఆల్గోరిథమ్స్ కూడా ఒక కారణం. ఈ ఆల్గోరిథమ్స్ కేవలం ఎంగేజ్‌మెంట్‌ ఆధారంగానే పనిచేస్తాయి. అంటే ఒక వీడియోను ఎంతమంది చూస్తున్నారు.. ఎన్ని లైక్స్ వస్తున్నాయి అనేదే ప్రామాణికంగా తీసుకుంటాయి తప్ప ఆ వీడియో వెనుక ఉన్న క్రియేటర్ నేపథ్యం ఏమిటి లేదా దాని వెనుక ఉన్న ఉద్దేశ్యం ఏమిటి అనేది విశ్లేషించవు. ఫలితంగా టీనేజర్ల ఫీడ్స్‌లోకి ఈ తరహా కంటెంట్ సులభంగా చేరిపోతోంది. "కంటెంట్ వెనుక ఉన్న సందర్భాన్ని గుర్తించడంలో ఆల్గోరిథమ్స్ విఫలమవుతున్నాయి. ఇది పిల్లల మానసిక వికాసంపై భద్రతపై ప్రతికూల ప్రభావం చూపుతుంది." అని డిజిటల్ సెక్యూరిటీ నిపుణులు భావిస్తున్నారు.

ఎదురయ్యే ప్రమాదాలు.. నిపుణుల సూచనలు

ఈ 'సాఫ్ట్ మార్కెటింగ్' విధానం వల్ల టీనేజర్లు తమకు తెలియకుండానే తప్పుడు దారిలోకి వెళ్లే ప్రమాదం ఉంది. ఒక క్రియేటర్ అసలు నేపథ్యం తెలియకుండా వారిని రోల్ మోడల్స్‌గా భావించడం వల్ల భవిష్యత్తులో నైతిక విలువలు దెబ్బతినవచ్చు. ఈ సవాలును ఎదుర్కోవడానికి నిపుణులు కొన్ని కీలక సూచనలు చేస్తున్నారు. క్రియేటర్లు తమ కంటెంట్ స్వభావాన్ని స్పష్టంగా వెల్లడించేలా నిబంధనలు ఉండాలి. అడల్ట్ కంటెంట్ ప్లాట్‌ఫామ్‌లలో ఖాతా ఉన్న వ్యక్తులు సాధారణ ప్లాట్‌ఫామ్‌లలో టీనేజర్లను లక్ష్యంగా చేసుకోకుండా ఏఐ ఆధారిత పర్యవేక్షణ పెంచాలి.

తల్లిదండ్రులు తమ పిల్లలు సోషల్ మీడియాలో ఎవరిని అనుసరిస్తున్నారు, ఎలాంటి కంటెంట్ చూస్తున్నారు అనే అంశంపై నిరంతరం నిఘా ఉంచాలి. లాభాల కంటే వినియోగదారుల.. ముఖ్యంగా మైనర్ల భద్రతకే ప్రాధాన్యత ఇవ్వాలి.

క్రియేటర్ ఎకానమీ విస్తరిస్తున్న కొద్దీ ఇలాంటి నైతిక సమస్యలు ఉత్పన్నం కావడం సహజం. అయితే స్వేచ్ఛ పేరుతో చిన్నారుల భవిష్యత్తును పణంగా పెట్టడం అంగీకరించదగ్గ విషయం కాదు. వినియోగదారుల భద్రతను కాపాడుతూ క్రియేటర్ల స్వేచ్ఛను సమతుల్యం చేయడం సోషల్ మీడియా దిగ్గజాల ముందున్న సవాల్. ఈ విషయాన్ని ఇప్పుడే అరికట్టకపోతే డిజిటల్ ప్రపంచంపై యూజర్లకు ఉన్న నమ్మకం దీర్ఘకాలంలో దెబ్బతినే ప్రమాదం ఉంది.