Begin typing your search above and press return to search.

ఓ అద్భుతం జరిగింది.. ఒకే తేదీన ఐదు తరాల జననమైంది..

అమెరికాకు చెందిన బెల్ కుటుంబం అరుదైన గిన్నిస్ వరల్డ్ రికార్డు సాధించింది. ఆ కుటుంబంలోని ఐదు తరాలకు చెందిన వారు సెప్టెంబర్ 14నే జన్మించారు. 1907 నుంచి 2025 వరకు జన్మించిన చిన్నారి ఆర్థర్, అతడి తల్లి ఎమ్మా, తాత, ముత్తాతమ్మ, ముత్తాత ఒకే తేదీన పుట్టడం విశేషం. ఇప్పటివరకు నాలుగు తరాల పేరిట ఉన్న రికార్డును బెల్ కుటుంబం అధిగమించింది.

By:  A.N.Kumar   |   13 Nov 2026 5:00 PM IST
ఓ అద్భుతం జరిగింది.. ఒకే తేదీన ఐదు తరాల జననమైంది..
X

పుట్టినరోజు.. ప్రతి మనిషి జీవితంలో ఒక మధురమైన జ్ఞాపకం. అమ్మ ఒడిలో మొదటిసారి కళ్లు తెరిచిన ఆ క్షణం.. జీవితాంతం మనకు ప్రత్యేకంగానే నిలిచిపోతుంది. కానీ కాలం మారినా.. తరాలు మారినా.. ఒకే కుటుంబంలోని ఐదు తరాల వారందరూ సరిగ్గా ఒకే నెల.. ఒకే తేదీన ఈ భూమిపైకి అడుగుపెట్టడం ఎప్పుడైనా విన్నారా? వినడానికి ఏదో సినిమా కథలా అనిపించినా.. అమెరికాకు చెందిన 'బెల్' కుటుంబంలో జరిగిన ఈ అద్భుతమైన ఈ జననాలు నేడు ప్రపంచవ్యాప్తంగా అందరి హృదయాలను కదిలిస్తున్నాయి. ఏకంగా గిన్నిస్ వరల్డ్ రికార్డులలో తన పేరును సువర్ణాక్షరాలతో లిఖించుకుంది.

ఈ అపురూపమైన ప్రయాణానికి కేంద్రబిందువు చిన్నారి ఆర్థర్ బెల్. గతేడాది సెప్టెంబర్ 14న ఆర్థర్ ఈ లోకంలోకి అడుగుపెట్టినప్పుడు ఆ కుటుంబం ఆనందానికి అవధుల్లేవు. అయితే ఆ పసివాడి జననం కేవలం ఒక కొత్త జీవితానికి ఆరంభం మాత్రమే కాదు.. ఆ కుటుంబపు చరిత్రలో దాగి ఉన్న ఒక గొప్ప రహస్యాన్ని ప్రపంచానికి పరిచయం చేసింది. ఆర్థర్ తల్లి ఎమ్మా కూడా సరిగ్గా 1997 సెప్టెంబర్ 14నే జన్మించారు. తల్లీకొడుకులు ఒకే రోజున పుట్టినరోజు జరుపుకోవడం కంటే ఒక తల్లికి అంతకంటే గొప్ప బహుమతి ఇంకేముంటుంది?

కథ ఇక్కడితో ముగిసిపోలేదు. ఆర్థర్ కుటుంబ వృక్షాన్ని వెనక్కి తిరిగి చూస్తే.. కళ్లు చెదిరే నిజాలు బయటపడ్డాయి. ఆర్థర్ కుటుంబంలోని మిగిలిన తరాల పుట్టిన తేదీలను పరిశీలిస్తే మరింత ఆశ్చర్యకరమైన విషయం బయటపడింది. అతడి తాత 1972 సెప్టెంబర్ 14న, ముత్తాతమ్మ 1949 సెప్టెంబర్ 14న జన్మించారు. ఇక ఆర్థర్‌కు చెందిన ఐదో తరం వ్యక్తి అంటే గ్రేట్-గ్రేట్-గ్రాండ్ ఫాదర్ 1907 సెప్టెంబర్ 14న పుట్టారు. అంటే 1907 నుంచి 2025 వరకు.. దాదాపు 118 ఏళ్ల వ్యవధిలో ఒకే కుటుంబంలోని ఐదు తరాలకు చెందిన వ్యక్తులు ఒకే తేదీన జన్మించారు. తరాలు మారినా పుట్టినరోజు మాత్రం మారకపోవడం ఈ కుటుంబానికి ప్రత్యేక గుర్తింపును తీసుకొచ్చింది.

ఇప్పటివరకు ప్రపంచంలో ఒకే తేదీన జన్మించిన అత్యధిక తరాల రికార్డు నాలుగు తరాల పేరిట ఉండేది. కానీ చిన్నారి ఆర్థర్ రాకతో బెల్ కుటుంబం ఐదు తరాల మైలురాయిని చేరుకుని పాత రికార్డులను చెరిపేసింది. ఈ అరుదైన నమ్మశక్యం కాని నిజాన్ని గిన్నిస్ వరల్డ్ రికార్డ్స్ అధికారికంగా గుర్తించి గౌరవించింది.

సాధారణంగా ఏ ఇంట్లోనైనా పుట్టినరోజు అంటే ఒక వ్యక్తికి సంబంధించిన వేడుక. కానీ బెల్ కుటుంబంలో మాత్రం సెప్టెంబర్ 14 అంటే ఒక పండుగ.. ఒక చరిత్ర.. ఐదు తరాల ప్రేమకు నిదర్శనం. తాతల ఆశీస్సులు.. తల్లిదండ్రుల మమకారం, పిల్లల కేరింతల మధ్య ఆ ఒక్క రోజు వారి ఇంట్లో వెల్లివిరిసే ఆనందాన్ని మాటల్లో వర్ణించలేం. ప్రకృతి రాసిన ఈ అద్భుతమైన కవిత్వం.. రక్తసంబంధం కంటే గొప్పదైన ఒక విడదీయరాని అనుబంధాన్ని ఆ కుటుంబానికి అందించింది. నిజంగా బెల్ కుటుంబం సాధించిన ఈ రికార్డు కేవలం ఒక సంఖ్య మాత్రమే కాదు.. తరతరాలకు గుర్తుండిపోయే ఒక మధుర కావ్యం..