అమెరికాలో మళ్లీ లేఆఫ్స్ సునామీ: 'లో హైర్, లో ఫైర్' యుగం ముగిసిందా?

అమెరికా ఉద్యోగ మార్కెట్‌లో స్థిరత్వానికి తెర పడినట్లు స్పష్టంగా కనిపిస్తోంది. కొంతకాలంగా కొనసాగిన "తక్కువ నియామకాలు (లో హైర్), తక్కువ తొలగింపులు (లో ఫైర్)" అనే జాగ్రత్త ధోరణి నుంచి, ఇప్పుడు భారీ తొలగింపుల (ఫైర్) దశ మొదలైంది. ఇది అమెరికన్ ఆర్థిక వ్యవస్థలో మాంద్యం మరింత తీవ్రంగా రూపుదాల్చే ప్రమాదం ఉందని ఆర్థిక నిపుణులు హెచ్చరిస్తున్నారు.

* పెరిగిన ఉద్యోగ కోతలు: సంఖ్యలు ఏం చెబుతున్నాయి?

బ్లూమ్‌బెర్గ్ తాజా నివేదికల ప్రకారం అమెరికాలోని అనేక పెద్ద కంపెనీలు తిరిగి భారీ స్థాయిలో ఉద్యోగులను తొలగిస్తున్నాయి. ముఖ్యంగా టెక్నాలజీతో పాటు ఇతర రంగాల్లోనూ ఈ ప్రభావం తీవ్రంగా ఉంది.

* స్టార్‌బక్స్: సుమారు 900 మంది ఉద్యోగులు

* పారామౌంట్: దాదాపు 1,000 మంది ఉద్యోగులు

* టార్గెట్: 1,800 మంది ఉద్యోగులు

* అమెజాన్: ఏకంగా 14,000 మంది ఉద్యోగులు

బ్లూమ్‌బెర్గ్ గణాంకాల ప్రకారం, 2025 సెప్టెంబర్ వరకు సుమారు 9.5 లక్షల ఉద్యోగాలు కోల్పోయాయి. కోవిడ్ సంవత్సరాలను మినహాయిస్తే, 2009 తర్వాత ప్రతి సంవత్సరం కంటే ఇదే అత్యధిక సంఖ్య. “మనం ఇక ‘లో హైర్, లో ఫైర్’ దశలో లేము... ఇప్పుడు నిజంగా ‘ఫైర్’ దశ మొదలైంది,” అని ఒక ఆర్థిక నిపుణుడు వ్యాఖ్యానించడం పరిస్థితి తీవ్రతను తెలియజేస్తుంది.

* లేఆఫ్స్‌కు కారణాలు: AI, ఖర్చుల తగ్గింపు

కంపెనీలు ఈ నిర్ణయాలు తీసుకోవడానికి ప్రధానంగా మూడు కారణాలు ఉన్నాయి.

కృత్రిమ మేధస్సు (AI) విస్తరణ: ఆర్టిఫిషియల్ ఇంటెలిజెన్స్ టెక్నాలజీని పెద్ద ఎత్తున వినియోగించడం వల్ల అనేక కార్యకలాపాలు ఆటోమేట్ అవుతున్నాయి. దీనితో, ఆయా పనులకు అవసరమయ్యే మానవ శ్రామిక శక్తిపై ఆధారపడాల్సిన అవసరం తీవ్రంగా తగ్గుతోంది.

సంస్థల పునర్‌వ్యవస్థీకరణ : నెమ్మదిగా ఉన్న వృద్ధి , మారుతున్న మార్కెట్ పరిస్థితులకు అనుగుణంగా కంపెనీలు తమ వ్యాపార విభాగాలను, ఉద్యోగుల పాత్రలను పునర్వ్యవస్థీకరిస్తున్నాయి.

ఖర్చు తగ్గింపు చర్యలు: పెరుగుతున్న ఆపరేషనల్ ఖర్చులు.. ఆర్థిక అనిశ్చితి దృష్ట్యా, లాభాలను పెంచుకోవడానికి కంపెనీలు సిబ్బందిని తగ్గించే దిశగా కఠిన చర్యలు తీసుకుంటున్నాయి.

* భవిష్యత్తుపై హెచ్చరికలు

గత రెండేళ్లుగా కంపెనీలు ఉద్యోగులను తొలగించకుండా జాగ్రత్త వహించినప్పటికీ, ఇప్పుడు ఆ ధోరణి పూర్తిగా మారిపోయింది. కొత్తగా మొదలైన ఈ తక్కువ నియామకాలు, ఎక్కువ లేఆఫ్స్‌ అనే దశ ఇబ్బందిగా మారింది. ... నిపుణుల హెచ్చరికల ప్రకారం, ఈ లేఆఫ్స్ ధోరణి ఇలాగే కొనసాగితే, 2026 నాటికి ఉద్యోగాల కోసం ఎదురుచూసే నిరుద్యోగులకు ఇది కఠిన పరీక్షా సమయం ఎదురుకావచ్చు. ఈ పరిణామాలు అమెరికా ఆర్థిక వ్యవస్థకు కూడా ఒక ప్రమాద సూచనగా మారే అవకాశం ఉంది.

సమర్థత కోసం కంపెనీలు ఆర్టిఫిషియల్ ఇంటెలిజెన్స్ వైపు మొగ్గు చూపుతూ పునర్వ్యవస్థీకరణ చేస్తుండగా, దీని ప్రభావం వేలాది మంది సాధారణ ఉద్యోగుల భవిష్యత్తుపై తీవ్రంగా పడుతోంది. ఉద్యోగ మార్కెట్‌లో వచ్చిన ఈ మార్పు, రాబోయే రోజుల్లో అమెరికన్ కార్మికులకు పెద్ద సవాలు విసరనుంది.