‘సాయంత్రం 5కే లాగ్‌ఆఫ్‌?’.. అమెరికా వర్క్‌ కల్చర్‌పై భారతీయ మహిళ సంచలన వ్యాఖ్యలు

‘సాయంత్రం 5 గంటలకే లాగ్‌ఆఫ్’ అనేది ఒక అందమైన భ్రమ మాత్రమేనా? విదేశాల్లో ఉద్యోగం, డాలర్ల ఆదాయం, సాయంత్రం కాగానే సొంత సమయం.. విదేశాలకు వెళ్లే ప్రతి ఒక్కరూ కనే కల ఇది. కానీ సరిహద్దులు దాటినా సముద్రాలు దాటినా కొన్ని రూల్స్ మారవు. ముఖ్యంగా కార్పొరేట్ ఒత్తిడికి ఎలాంటి పాస్‌పోర్ట్ ఉండదు. ఈ చేదు నిజాన్ని ప్రపంచం ముందుకు తెచ్చారు అమెరికాలో తొమ్మిదేళ్ల పాటు కన్సల్టెంట్‌గా పనిచేసి ఇటీవల ముంబైకి తిరిగి వచ్చిన పరిణయ. అమెరికాలోనూ ఓవర్‌వర్క్, ఆఫీస్ ఒత్తిడి, బర్నౌట్‌ సాధారణమేనని ఆమె వెల్లడించారు.

పరిణయ అమెరికాలో దాదాపు తొమ్మిదేళ్ల పాటు కన్సల్టెంట్‌గా పనిచేశారు. తన అనుభవాలను ఇన్‌స్టాగ్రామ్‌లో షేర్ చేస్తూ.. ‘‘అమెరికాలో సాయంత్రం 5 గంటలకు లాగ్‌ఆఫ్‌ అవుతారనే మిథ్‌ ఇక చనిపోవాలి’’ అంటూ వ్యాఖ్యానించారు. అమెరికన్ ఉద్యోగులు సాధారణంగా 5 గంటలకు పని ముగించుకుని వ్యక్తిగత జీవితానికి సమయం కేటాయిస్తారనే భావన వాస్తవానికి చాలా దూరంగా ఉందని ఆమె అన్నారు.

7 గంటలకు మేనేజర్ మెసేజ్..

తన ఉద్యోగ జీవితంలో పని గంటలు ముగిసిన తర్వాత కూడా ఆఫీస్‌ మెసేజ్‌లు రావడం సాధారణమని పరిణయ చెప్పారు. ఒక సందర్భంలో సాయంత్రం 7 గంటల సమయంలో తన మేనేజర్ నుంచి మెసేజ్ వచ్చిందని ఆమె గుర్తుచేసుకున్నారు. తాను పంపిన ఈమెయిల్‌కు ఎందుకు స్పందించలేదని మేనేజర్ ప్రశ్నించారని తెలిపారు. దీంతో అధికారిక పని సమయం ముగిసిన తర్వాత కూడా ఉద్యోగి అందుబాటులో ఉండాలనే అంచనాలు ఉంటాయని ఆమె వివరించారు.

అయితే అమెరికా పని సంస్కృతిని పూర్తిగా తప్పుబట్టడం తన ఉద్దేశం కాదని పరిణయ స్పష్టం చేశారు. ఏ దేశంలోనైనా ఉద్యోగం, కంపెనీ, పరిశ్రమ, బాధ్యతలను బట్టి పని గంటలు మారుతాయని చెప్పారు. కానీ ‘హసిల్ కల్చర్’ లేదా ఎప్పుడూ పనికి అందుబాటులో ఉండాలనే ఒత్తిడి ఒక్క దేశానికే పరిమితం కాదని ఆమె పేర్కొన్నారు.

అమెరికాలోనూ ఎక్కువ గంటల పని

తన వాదనకు మద్దతుగా పరిణయ ప్రస్తావించిన గణాంకాల ప్రకారం, అమెరికాలో సుమారు 32 శాతం మంది ఉద్యోగులు వారానికి 45 గంటలు లేదా అంతకంటే ఎక్కువ సమయం పనిచేస్తున్నారు. జర్మనీలో ఈ సంఖ్య 18 శాతంగా.. ఫ్రాన్స్‌లో కేవలం 4 శాతంగా ఉందని ఆమె పేర్కొన్నారు. అలాగే దాదాపు 29 శాతం మంది అమెరికన్లు వారాంతాల్లో కూడా పని చేస్తున్నారని తెలిపారు. ఈ గణాంకాలు చూస్తే 40 గంటల పని వారమే ప్రామాణికంగా ఉన్నప్పటికీ.. పెద్ద సంఖ్యలో ఉద్యోగులు దాని కంటే ఎక్కువ సమయం పనిచేస్తున్న విషయం స్పష్టమవుతుందని ఆమె అభిప్రాయపడ్డారు.

‘ఓవర్‌వర్క్‌ ఏ ఒక్క దేశానిదీ కాదు’

‘‘ఓవర్‌వర్క్ అనేది ఒక దేశానికి సంబంధించిన విషయం కాదు. అది ప్రతిచోటా ఉంది. ఉద్యోగాలు వేరు.. కంపెనీలు వేరు.. కానీ ఎప్పుడూ అందుబాటులో ఉండాలనే ఒత్తిడి మాత్రం ఒకటే’’ అని పరిణయ అన్నారు.

తన అనుభవంలో మరో అంశం కూడా తనను ఆలోచింపజేసిందని ఆమె చెప్పారు. చాలా కాల్స్‌లో తానే ఏకైక ‘బ్రౌన్ పర్సన్‌’గా ఉండేదానినని.. కొన్ని సందర్భాల్లో ఇతర సహోద్యోగులతో పోలిస్తే తనను మరింత కఠినంగా ప్రశ్నిస్తున్నారా అనే అనుమానం కలిగేదని తెలిపారు. అయితే దీనిని నిరూపించడానికి తన వద్ద ఆధారాలు లేవని.. అది కేవలం తనకు కలిగిన భావన మాత్రమేనని ఆమె స్పష్టం చేశారు.

ముంబైకి ఎందుకు తిరిగొచ్చారు?

అమెరికాలో దాదాపు తొమ్మిదేళ్లు కెరీర్‌ నిర్మించుకున్న తర్వాత పరిణయ తిరిగి ముంబైకి వచ్చారు. కెరీర్‌లో ముందుకు వెళ్లాలనే ప్రయత్నంలో పెరుగుతూ వచ్చిన పని ఒత్తిడి, వ్యక్తిగత జీవితంపై ప్రభావం తన నిర్ణయాన్ని ప్రభావితం చేశాయని ఆమె తెలిపారు. చివరకు కెరీర్‌ కంటే మానసిక ప్రశాంతతకు ప్రాధాన్యత ఇవ్వాలని నిర్ణయించుకున్నట్లు చెప్పారు.

అమెరికాలో ఉద్యోగం చేస్తే తప్పనిసరిగా మెరుగైన వర్క్‌-లైఫ్ బ్యాలెన్స్ లభిస్తుందనే అపోహను తన అనుభవం తొలగించిందని ఆమె అభిప్రాయపడ్డారు. విదేశాల్లో ఉద్యోగం అంటే అవకాశాలు, మంచి ఆదాయం, కెరీర్‌ గ్రోత్‌ మాత్రమే కాకుండా.. అక్కడి పని సంస్కృతి, ఉద్యోగ ఒత్తిళ్లను కూడా పరిగణనలోకి తీసుకోవాల్సిన అవసరం ఉందని ఆమె కథనం చెబుతోంది.

చివరగా పరిణయ చెప్పిన మాట ఇప్పుడు సోషల్ మీడియాలో చర్చకు దారితీస్తోంది.. ‘‘మానసిక ప్రశాంతత అన్నింటికంటే ముఖ్యం.’’ ఆమె అనుభవం ఒక విషయం మాత్రం స్పష్టం చేస్తోంది. ఓవర్‌వర్క్‌కు పాస్‌పోర్ట్ ఉండదు. దేశం మారినా, కంపెనీ మారినా.. ఉద్యోగిపై ‘ఎప్పుడూ అందుబాటులో ఉండాలి’ అనే ఒత్తిడి ఉంటే బర్నౌట్ తప్పకపోవచ్చు.

డాలర్ల కలల కంటే, కెరీర్ మైలురాళ్ల కంటే చివరికి మనిషికి మిగిలేది, కావాల్సింది మానసిక ప్రశాంతత మాత్రమే. అందుకే పరిణయ తన తొమ్మిదేళ్ల అమెరికా కెరీర్‌ను పక్కన పెట్టి, మానసిక ఆరోగ్యం కోసం తిరిగి ముంబై చేరుకోవాలని నిర్ణయించుకున్నారు. దేశం మారితే జీవితం మారిపోతుందని నమ్మే ప్రతి ఒక్కరికీ ఈ కథనం ఒక మేల్కొలుపు. పని ఎక్కడైనా పని చేయాల్సిందే.. కానీ ఆ పని మన ప్రశాంతతను, ఆరోగ్యాన్ని మింగేసే స్థాయికి వెళ్లకూడదనే సత్యాన్ని ఇది మరోసారి గుర్తుచేస్తోంది.