క్యాన్స‌ర్ ముప్పు: ఈ 10 త‌ప్పుల‌తో 150కోట్ల మంది భార‌తీయులు ప్ర‌మాదంలో?

ఆధునిక జీవనశైలిలో ప్లాస్టిక్ ఒక అంతర్భాగమైపోయింది. అయితే మనం పీల్చే గాలి నుండి తాగే నీటి వరకు ప్రతిచోటా విస్తరించిన మైక్రోప్లాస్టిక్స్ (సూక్ష్మ ప్లాస్టిక్ కణాలు) ఇప్పుడు మానవ మనుగడకే ముప్పుగా పరిణమించాయి. 150 కోట్ల మంది భారతీయులు అనునిత్యం తెలియకుండానే చేస్తున్న కొన్ని చిన్న చిన్న తప్పుల వల్ల ఈ ప్లాస్టిక్ కణాలు శరీరంలోకి ప్రవేశించి భయంకరమైన క్యాన్సర్ మహమ్మారికి పునాది వేస్తున్నాయి. ప్లాస్టిక్‌లోని విషపూరిత రసాయనాలు శరీర కణాల నిర్మాణాన్ని మార్చివేస్తాయని.. తద్వారా దీర్ఘకాలంలో ప్రాణాంతక వ్యాధులు వస్తాయని పరిశోధనలు హెచ్చరిస్తున్నాయి.

మనం చేసే అతిపెద్ద తప్పు ప్లాస్టిక్ బాటిళ్లలోని నీటిని తాగడం. ప్లాస్టిక్ సీసాల్లో నిల్వ ఉన్న నీటి ద్వారా వేల సంఖ్యలో మైక్రోప్లాస్టిక్స్ నేరుగా కడుపులోకి చేరుతాయి. దీనికి ప్రత్యామ్నాయంగా గాజు లేదా స్టెయిన్‌లెస్ స్టీల్ బాటిళ్లను వాడటం ఉత్తమం. అలాగే, మైక్రోవేవ్ ఓవెన్లలో ప్లాస్టిక్ పాత్రలను పెట్టి ఆహారాన్ని వేడి చేయడం అత్యంత ప్రమాదకరం. వేడి తగిలినప్పుడు ప్లాస్టిక్ నుండి రసాయనాలు విడుదలయ్యి ఆహారంలో కలిసిపోతాయి. అంతేకాకుండా.. దెబ్బతిన్న నాన్-స్టిక్ పాన్‌లను వాడటం వల్ల వాటిలోని పి.ఎఫ్.ఏ.ఎస్ వంటి విషపూరిత రసాయనాలు శరీరంలోకి చేరి హార్మోన్ల సమతుల్యతను దెబ్బతీస్తాయి.

కేవలం ఆహారం ద్వారానే కాకుండా.. మనం వాడే సౌందర్య సాధనాలు.. వస్త్రాల ద్వారా కూడా ప్లాస్టిక్ ఎక్స్‌పోజర్ జరుగుతోంది. చాలా రకాల ఫేస్ వాష్‌లు... షాంపూలలో ఉండే `మైక్రోబీడ్స్` చర్మం ద్వారా లేదా నీటి ద్వారా శరీరానికి హాని కలిగిస్తాయి. అలాగే పాలిస్టర్, నైలాన్ వంటి సింథటిక్ దుస్తులను ఉతికినప్పుడు లక్షల సంఖ్యలో మైక్రోఫైబర్స్ గాలిలోకి.. నీటిలోకి విడుదలవుతాయి. సాధ్యమైనంత వరకు కాటన్ లేదా జనపనార వంటి సహజ సిద్ధమైన దుస్తులకు ప్రాధాన్యత ఇవ్వడం వల్ల ఈ ముప్పును కొంతవరకు తగ్గించవచ్చు. మన ఇంట్లోని ధూళిలో కూడా అధిక మొత్తంలో ప్లాస్టిక్ కణాలు ఉంటాయని గుర్తించాలి.

పరిశుభ్రత పై చూపే చిన్న నిర్లక్ష్యం కూడా భారీ మూల్యానికి దారితీస్తుంది. భోజనానికి ముందు చేతులు కడుక్కోకపోవడం వల్ల చేతులకు అంటుకున్న ప్లాస్టిక్ ధూళి కణాలు ఆహారంతో పాటు లోపలికి వెళ్తాయి. అలాగే బయటి నుండి తెచ్చే వేడి వేడి ఆహారాన్ని ప్లాస్టిక్ డబ్బాల్లో ప్యాక్ చేయడం వల్ల కెమికల్ రియాక్షన్ జరిగి ఆహారం కలుషితమవుతుంది. ఇంట్లోని ఫర్నిచర్ ..ఎలక్ట్రానిక్ వస్తువులపై పేరుకుపోయే దుమ్మును క్రమం తప్పకుండా తడి బట్టతో శుభ్రం చేయడం.. వారానికి ఒకసారి వ్యాక్యూమ్ క్లీనింగ్ చేయడం ద్వారా గాలిలోని ప్లాస్టిక్ కణాల ప్రభావాన్ని తగ్గించవచ్చు.

చివరగా.. ప్యాక్ చేసిన .. ప్రాసెస్ చేసిన ఆహార పదార్థాల కంటే తాజా కూరగాయలు, పండ్లను తీసుకోవడం ద్వారా శరీరానికి ప్లాస్టిక్ ముప్పును తగ్గించవచ్చు. ఎండోక్రైన్ వ్యవస్థను దెబ్బతీసి హార్మోన్ల అసమతుల్యతకు కారణమయ్యే ఈ మైక్రోప్లాస్టిక్స్ విష‌యంలో ప్రతి ఒక్కరూ అవగాహన పెంచుకోవాల్సిన సమయం ఆసన్నమైంది. పైన పేర్కొన్న 10 తప్పులను సరిదిద్దుకోవడం ద్వారా మనల్ని మనం క్యాన్సర్ వంటి భయంకరమైన వ్యాధుల నుండి కాపాడుకోవచ్చు. వ్యక్తిగత స్థాయిలో తీసుకునే ఈ చిన్న జాగ్రత్తలే రేపటి ఆరోగ్యకరమైన సమాజానికి పునాది కానున్నాయి.