ఐఫోన్ పాకెట్: 'సాక్స్‌' లాంటి కవర్‌కు ₹20 వేలు... యాపిల్‌పై నెటిజన్ల ఫైర్!

ఐఫోన్ యజమానుల కోసం యాపిల్ కంపెనీ తీసుకొచ్చిన కొత్త యాక్సెసరీ 'ఐఫోన్ పాకెట్' ఇప్పుడు ఇంటర్నెట్‌లో హాట్ టాపిక్‌గా మారింది. ఈ 'పాకెట్' ధర , డిజైన్ చూసి నెటిజన్లు తీవ్రంగా విమర్శిస్తున్నారు.

ధర తెలిస్తే షాక్!

ఐఫోన్‌ను పెట్టుకునేందుకు ఉద్దేశించిన ఈ పాకెట్ ధర అక్షరాలా $229.95. అంటే భారత కరెన్సీలో సుమారు ₹20,390 దాదాపుగా ఉండొచ్చు.. ఈ అధిక ధర వినియోగదారులను షాక్‌కు గురిచేసింది, ఎందుకంటే ఈ పాకెట్ చూడటానికి సాధారణంగా ఉండే సాక్స్ లాగా ఉందని చాలా మంది అభిప్రాయపడుతున్నారు. లాంగ్ స్ట్రాప్ వెర్షన్ $229.95 (సుమారు ₹20,390),షార్ట్ స్ట్రాప్ వెర్షన్ $149.95 (సుమారు ₹13,300) గా నిర్ణయించడంపై విమర్శలు వస్తున్నాయి.

'సాక్స్' తరహా డిజైన్!

జపనీస్ ఫ్యాషన్ లేబుల్ 'ఇస్సి మియాకే' తో కలిసి యాపిల్ ఈ 3D-అల్లిన పాకెట్‌ను రూపొందించింది. ఇది ఐఫోన్‌ను సురక్షితంగా ఉంచడానికి, క్రాస్‌బాడీ బ్యాగ్‌లాగా ధరించడానికి వీలుగా ఉంది. అయితే దీని సాగిన , మెలికలు తిరిగిన డిజైన్ కారణంగా ఇది పాత ఐపాడ్ సాక్స్‌ను లేదా కేవలం డిజైనర్ సాక్స్‌ను పోలి ఉందని సోషల్ మీడియాలో విపరీతంగా ట్రోల్స్ వస్తున్నాయి.

చాలా మంది నెటిజన్లు ఇంత డబ్బు పెట్టి కేవలం ఫోన్‌ను పెట్టుకునేందుకు ఒక 'సాక్' కొనుగోలు చేయాలా అని ప్రశ్నిస్తున్నారు. ప్రముఖ టెక్ యూట్యూబర్లు కూడా యాపిల్ కంపెనీ తమ అభిమానుల సహనాన్ని పరీక్షిస్తోందని అభిప్రాయపడ్డారు.

లిమిటెడ్ ఎడిషన్...

ఈ యాక్సెసరీని పరిమిత సంఖ్యలోనే విక్రయించనున్నట్లు యాపిల్ ప్రకటించింది. డిజైన్, సింప్లిసిటీకి ప్రాధాన్యత ఇచ్చే తమ ఫిలాసఫీకి అనుగుణంగానే దీనిని రూపొందించామని యాపిల్ పేర్కొంది. ఈ సహకారం స్టీవ్ జాబ్స్ ధరించే ఐకానిక్ బ్లాక్ టర్టిల్‌నెక్‌ను రూపొందించిన ఇస్సి మియాకేతో యాపిల్‌కు ఉన్న పాత బంధాన్ని కూడా గుర్తు చేస్తుంది.

టెక్నాలజీకి ఫ్యాషన్ హంగులు అద్దే క్రమంలో యాపిల్ ఇలాంటి ఖరీదైన ఉత్పత్తులను మార్కెట్‌లోకి తీసుకురావడం ఇదే మొదటిసారి కాదు. గతంలో కూడా యాపిల్ పాలిషింగ్ క్లాత్ వంటి చిన్న ఉపకరణాలను సైతం అధిక ధరకు విక్రయించి వార్తల్లో నిలిచింది.