రాజభోగం అంటే ఇదే..కోట్ల విలువ చేసే ఐస్‌క్రీమ్.. ప్రత్యేకత ఏంటో తెలుసా?

సాధారణంగా ఒక ఐస్‌క్రీమ్ ధర ఎంత ఉంటుంది? మహా అయితే వందలు లేదా వేలల్లో ఉంటుంది. కానీ ఇప్పుడు మనం చెప్పుకోబోయే ఐస్‌క్రీమ్ ధర వింటే మీ ఫ్యూజులు ఎగిరిపోవడం ఖాయం! ఇది కేవలం ఒక స్వీట్ మాత్రమే కాదు, ఒక విలాసవంతమైన అనుభూతి. ఇటలీకి చెందిన అత్యంత ఖరీదైన పదార్థాలు, పైన బంగారు పూతతో తయారైన ఈ ఐస్‌క్రీమ్ గురించి వింటే.. "ఇంత రేటు ఉంటే ఎవరైనా తింటారా?" అని ఆశ్చర్యపోక తప్పదు. ఆ విశేషాలేంటో ఇప్పుడు చూద్దాం..

ఖరీదైన వైట్ ట్రఫుల్స్ రహస్యం:

ఈ ఐస్‌క్రీమ్ ధర ఇంత భారీగా ఉండటానికి ప్రధాన కారణం ఇందులో వాడే పదార్థాలు. ఇటలీలో మాత్రమే దొరికే అత్యంత అరుదైన ‘వైట్ ట్రఫుల్స్’ ను ఇందులో ప్రధానంగా ఉపయోగిస్తారు. మీకు తెలుసా? అంతర్జాతీయ మార్కెట్‌లో వీటి ధర కిలో ఏకంగా రూ. 12 లక్షల వరకు ఉంటుంది. ఇవి ఐస్‌క్రీమ్‌కు ఒక ప్రత్యేకమైన రుచిని, సువాసనను ఇస్తాయి.

పైన బంగారు పూత.. అలంకరణే వేరు:

కేవలం రుచి ఉంటే సరిపోదు కదా, చూడటానికి కూడా రాజసం ఉట్టిపడాలి. అందుకే ఈ ఐస్‌క్రీమ్ పైన తినగలిగే స్వచ్ఛమైన బంగారు పొరను గార్నిషింగ్‌గా వేస్తారు. ఇక ఇది తింటున్నప్పుడు మనకు ఒక మహారాజు లేదా మహారాణి విందు ఆరగిస్తున్న అనుభూతి కలుగుతుంది.

వెండి స్పూన్ ఉచితం:

ఈ విలాసవంతమైన ఐస్‌క్రీమ్‌ను కొనుగోలు చేసిన వారికి కంపెనీ ఒక అదిరిపోయే గిఫ్ట్ ఇస్తుంది. దీన్ని తినడం కోసం చేతితో ప్రత్యేకంగా డిజైన్ చేసిన, ఎంతో విలువైన ‘వెండి స్పూన్‌’ను కస్టమర్లకు ఉచితంగా అందిస్తుంది. ఇక ఈ స్పూన్‌ను మీరు జ్ఞాపికగా ఇంటికి తీసుకెళ్లవచ్చు. అంటే ఐస్‌క్రీమ్‌తో పాటు వెండి కూడా మీ సొంతమవుతుందన్నమాట.

నాణ్యతలో నో కాంప్రమైజ్:

తయారీ విధానం విషయానికి వస్తే.. కంపెనీ చాలా కఠినమైన నిబంధనలు పాటిస్తుంది. ప్రతి బ్యాచ్‌ను కంపెనీకి చెందిన ప్రధాన చెఫ్‌లు స్వయంగా రుచి చూసి పరీక్షిస్తారు. రుచి, నాణ్యత మరియు సువాసనలో అన్నీ సరిగ్గా ఉన్నాయని వారు ధృవీకరించిన తర్వాతే అది విక్రయానికి సిద్ధమవుతుంది. ఇక ఇందులో వాడే చీజ్ కూడా సంప్రదాయ పద్ధతుల్లో తయారైన అత్యంత నాణ్యమైనది కావడం విశేషం.

అరుదైన పదార్థాల సమ్మేళనం, బంగారు అలంకరణ, వెండి స్పూన్.. ఇవన్నీ కలిసి ఈ ఐస్‌క్రీమ్‌ను ప్రపంచంలోనే అత్యంత విలాసవంతమైనదిగా నిలబెట్టాయి. ఇది సామాన్యులకు అందుబాటులో లేకపోయినా, దీని గురించి వినడం మాత్రం చాలా ఆసక్తికరంగా ఉంది కదూ!.. ఇంతకూ ఈ ఐస్ క్రీమ్ ధర ఎంతో చెప్పలేదు కదా.. ఒక్క స్కూప్ అక్షరాలా రూ.5.5 లక్షలు.. ఏది ఏమైనా ఐస్‌క్రీమ్ కోసం లక్షలు ఖర్చు చేయడం అంటే అది నిజంగా రాజభోగమే అని చెప్పాలి.